ଓଡ଼ିଶାଲାଇଭ୍ ବ୍ୟୁରୋ
ଯାହା ଲାଗୁଛି ବଲିଉଡର ଭାଇଜାନ୍ ସଲମାନ ଖାନଙ୍କ ଫିଲ୍ମ ‘ଟାଇଗର ଅଭି ଜିନ୍ଦା ହୈ’ର ଡାଏଲଗ କେବଳ ଲୋକଙ୍କ ମନ ଜିଣିନି ବରଂ ମଧ୍ୟପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ଶିବରାଜ ସିଂହଙ୍କ ମନକୁ ବି ଛୁଇଁଛି। ବୁଦନୀ ବିଧାନସଭା ନିର୍ବାଚନ ମଣ୍ଡଳୀରେ କର୍ମୀଙ୍କୁ ଧନ୍ୟବାଦ ଜଣାଇବା ଅବସରରେ ଏଭଳି ବୟାନ ଦେଇଛନ୍ତି ଶିବରାଜ।
ଫିଲ୍ମ ଷ୍ଟାଇଲରେ ଏଭଳି ବୟାନ ଦେଇ ଶିବରାଜ ନିଜର ରାଜନୈତିକ ଶକ୍ତି ଦେଖାଇଛନ୍ତି। ଭୋପାଳ ମୁଖ୍ୟମନ୍ତ୍ରୀ ନିବାସରେ ଶିବରାଜ କର୍ମୀଙ୍କୁ କହିଥିଲେ, “କେହି ଚିନ୍ତା କରନି, ଟାଇଗର ଅଭି ଜିନ୍ଦା ହୈ।”
ମୁଖ୍ୟମନ୍ତ୍ରୀ ନିବାସରେ ଶିବରାଜ ଆହୁରି ମଧ୍ୟ କହିଛନ୍ତି ଯେ ଏଠାକୁ ଫେରି ଆସିବାକୁ ତାଙ୍କୁ ୫ ବର୍ଷ ବି ଲାଗିନପାରେ।
ବିଦାୟ କାର୍ଯ୍ୟକ୍ରମରେ ଶିବରାଜଙ୍କୁ ଭେଟିବା ପାଇଁ ସମର୍ଥକଙ୍କ ଲମ୍ବା ଲାଇନ ଲାଗିଥିଲା। ବିଧାନସଭା ନିର୍ବାଚନ ମଣ୍ଡଳୀରୁ ବି ହଜାର ହଜାର ଲୋକ ଶିବରାଜଙ୍କୁ ଭେଟିବାକୁ ଆସିଥିଲେ। ଖୁବଶୀଘ୍ର ମୁଖ୍ୟମନ୍ତ୍ରୀ ବଙ୍ଗଳା ଖାଲି କରି ସେ ନୂଆ ଘରକୁ ସିଫ୍ଟ ହେବେ।
ବେଳେବେଳେ ଏଭଳି ସିନେମା କଥା କହି ଚର୍ଚ୍ଚାରେ ରହିଥାନ୍ତି ଶିବରାଜ। ସେ ଗତ ବିଧାନସଭା ନିର୍ବାଚନ ଅବସରରେ ରାହୁଲ ଗାନ୍ଧିଙ୍କ ଉଦ୍ଦେଶ୍ୟରେ କହିଥିଲେ, ‘ତୁମ୍ ତୋ ଠହରେ ପରଦେଶୀ ସାଥ୍ କ୍ୟା ନିଭାଓଗେ’।
ନିକଟରେ ମଧ୍ୟପ୍ରଦେଶରେ କଂଗ୍ରେସ କ୍ଷମତାକୁ ଫେରିଛି ଫଳରେ ଗତ ୧୫ ବର୍ଷ ଧରି ଶାସନ କରୁଥିବା ବିଜେପି ଗାଦିରୁ ହଟିଛି। ଏବେ ଏଠାକାର ମୁଖ୍ୟମନ୍ତ୍ରୀ ଅଛନ୍ତି କମଲ ନାଥ।
ଶିବରାଜ ସିଂହ ଚୌହ୍ଵାନଙ୍କ ‘ଟାଇଗର ଅଭି ଜିନ୍ଦା ହୈ’ ଡାଏଲଗ୍ ଏବେ ସୋସିଆଲ୍ ମିଡିଆରେ ଭାଇରାଲ୍ ହେବାରେ ଲାଗିଛି।
