ଓଡ଼ିଶାଲାଇଭ୍ ବ୍ୟୁରୋ
ରାସଗୋବିନ୍ଦପୁର ଅଞ୍ଚଳରେ ଜଣେ ବିବାହିତ ଯୁବକଙ୍କୁ ଗଛରେ ବାନ୍ଧି ପିଟି ପିଟି ହତ୍ୟା କରାଯାଇଛି। ଏହି ଘଟଣା ଘଟିଛି ରାସଗୋବିନ୍ଦପୁର ଥାନା ଅନ୍ତର୍ଗତ ବଧିମୁହଁ ଗାଁରେ।
ଶନିବାର ବଧିମୁହଁ ଗ୍ରାମର ସରୋଜ ସିଂହ ପୁଅ ବାସୁଦେବ ସିଂହ ପଡ଼ୋଶୀ ଜଗନ୍ନାଥ ସିଂହଙ୍କ ଘରକୁ ମନ୍ଦ ଉଦ୍ଦେଶ୍ୟ ରଖି ରାତି ପ୍ରାୟ ୧୧ଟା ୩୦ମିନିଟ ସମୟରେ ପ୍ରବେଶ କରିଥିଲେ। ସେହି ସମୟରେ ଜଗନ୍ନାଥ ବାସୁଦେବଙ୍କୁ ଧରିନେଇଥିଲେ ଏବଂ ପରିବାର ଲୋକଙ୍କୁ ଡାକି ଉଠାଇଥିଲେ। ଜଗନ୍ନାଥ ଓ ତାଙ୍କ ପତ୍ନୀ ମିଶି ବାସୁଦେବଙ୍କୁ ନିର୍ଦ୍ଦୁମ ପିଟିବା ସହିତ ଘର ସମ୍ମୁଖରେ ଥିବା ଏକ ଗଛରେ ବାନ୍ଧି ପକାଇଥିଲେ। ଜଗନ୍ନାଥ ଏ ସମ୍ପର୍କରେ ଗାଁ ଲୋକଙ୍କୁ ଜଣାଇବା ସହିତ ବାସୁଦେବଙ୍କ ଘରକୁ ବି ଖବର ଦେଇଥିଲେ।
ଯୁବକଙ୍କୁ ପ୍ରବଳ ମାଡ଼ ହୋଇଥିବା କାରଣରୁ ଯୁବକଙ୍କର ମୃତ୍ୟୁ ଘଟିଥିଲା। ରବିବାର ସକାଳେ ଅମରଦା ଫାଣ୍ଡି ଅଧିକାରୀ ଘଟଣାର ଖବର ପାଇ ଘଟଣାସ୍ଥଳରେ ପହଞ୍ଚି ରାସଗୋବିନ୍ଦପୁର ଥାନକୁ ସୂଚନା ଦେଇଥିଲେ। ଥାନା ଆଇଆଇସି ରେଣକଳା ସାହୁ ଘଟଣାସ୍ଥଳରେ ପହଞ୍ଚି ମୃତ ଶରୀର ଜବତ କରିବା ସହିତ ତଦନ୍ତ ଆରମ୍ଭ କରିଥିଲେ। ତଦନ୍ତ ସମୟରେ ଜଗନ୍ନାଥ ଓ ତାଙ୍କ ପତ୍ନୀ ପୋଲିସ ପାଖରେ ଘଟଣାକୁ ନେଇ ସମସ୍ତ ତଥ୍ୟ ପ୍ରଦାନ କରିଥିଲେ।
ମୃତ ବାସୁଦେବଙ୍କର ଜଗନ୍ନାଥଙ୍କ ପତ୍ନୀଙ୍କ ପ୍ରତି ମନ୍ଦ ଉଦ୍ଦେଶ୍ୟ ରହିଥିଲା ବୋଲି ଜଗନ୍ନାଥ ସୂଚନା ଦେଇଥିଲେ।। ପୂର୍ବରୁ ମଧ୍ୟ ବାସୁଦେବ ଜଗନ୍ନାଥଙ୍କ ଘରେ ପ୍ରବେଶ କରିଥିଲେ। ସେତେବେଳେ ଏହାକୁ ଆପୋଷ ସମାଧାନ କରି ଦିଆଯାଇଥିଲା।
ତେବେ ପୋଲିସ ଅଭିଯୁକ୍ତ ଜଗନ୍ନାଥ ଓ ତାଙ୍କ ପତ୍ନୀଙ୍କୁ ଅଟକ ରଖିଛି। ଅଧିକ ସୂଚନା ପାଇଁ ତଦନ୍ତ ଜାରି ରଖିଛି।
