ଓଡ଼ିଶାଲାଇଭ୍ ପଲିଟିକାଲ୍ ବ୍ୟୁରୋ
ଏବେ ସବୁଠି ଗୋଟିଏ ଚର୍ଚ୍ଚା ବିଜୁ ଜନତା ଦଳ ଲାଗି କେଉଁ ଆସନରୁ କାହାକୁ ଟିକେଟ ମିଳିବ, ନିର୍ବାଚନ ଜିତିବା ଲାଗି। କାହାକୁ ଟିକେଟ ଦେବେନି ବିଜେଡି ସୁପ୍ରିମୋ।
ଏହାରି ଭିତରେ ଭୁବନେଶ୍ୱର ଲୋକସଭା ଆସନ ଲାଗି କାହାକୁ ଟିକେଟ ମିଳିବ ସେ ନେଇ ମଧ୍ୟ ଅନେକ ସମୟରେ ଚର୍ଚ୍ଚା ହୋଇଥାଏ। କାରଣ ଭୁବନେଶ୍ୱର ଲୋକସଭା ଆସନ ଲାଗି ବିଜେଡିରୁ ଅନେକ ଦାବିଦାର ଅଛନ୍ତି। ସେହି ଦୃଷ୍ଟିରୁ ଏଥର ସାଂସଦ ପ୍ରସନ୍ନ ପାଟ୍ଟଶାଣୀଙ୍କୁ ଟିକେଟ ନମିଳିପାରେ ବୋଲି ଚର୍ଚ୍ଚା ଜୋର ଧରିଥାଏ ଅନେକ ସମୟରେ।
ଏହାଭିତରେ ନବୀନ ନିବାସରେ ରବିବାର ସଂଧ୍ୟାରେ ପହଞ୍ଚିଥିଲେ ପ୍ରସନ୍ନ ପାଟ୍ଟଶାଣୀ। ତାଙ୍କୁ ନବୀନ ନିବାସରେ ଦେଖି ସମସ୍ତେ ପଚାରିଥିଲେ ଯେ ଏଥରେ ସେ ନିର୍ବାଚନ ଲଢୁଛନ୍ତି କି ନାହିଁ।
ଯାହାର ଉତ୍ତରରେ ସେ କହିଛନ୍ତି ଯେ, “ମୁଁ ନିର୍ବାଚନ ଲଢ଼ିବି। ଯାହା ଚର୍ଚ୍ଚା ହେଉଛି ତାହା ସବୁ ମିଛ। ଚର୍ଚ୍ଚା ହେବାକୁ ଦିଆଯାଉ। ନବୀନ ବାବୁ ଯାହା କରିବେ ଠିକ୍ କରିବେ। ଦଳ ଏଥର ମଧ୍ୟ ବହୁମତରେ ଜିତିବ।”
ପାଟ୍ଟଶାଣୀଙ୍କ ଏଭଳି ମନ୍ତବ୍ୟ ପରେ ଦେଖିବାକୁ ବାକି ରହିଲା ଯେ ଦଳର ସଭାପତି ଆଗାମୀ ନିର୍ବାଚନ ଲାଗି ପାଟ୍ଟଶାଣୀଙ୍କ ଉପରେ ପୁଣିଥରେ ଭରସା କରୁଛନ୍ତି ନା ସେଠାରୁ ଆଉ କେହି ନୂଆ ଚେହେରାଙ୍କୁ ଟିକେଟ ଦେବେ। ଏ ସବୁ ବିଜେଡି ପ୍ରାର୍ଥୀ ତାଲିକା ଘୋଷଣା କରିବା ପରେ ହିଁ ସ୍ପଷ୍ଟ ହୋଇପାରିବ।
