ଓଡ଼ିଶାଲାଇଭ୍ ବ୍ୟୁରୋ
ମୋଦି ସରକାରଙ୍କ ଦ୍ୱିତୀୟ ପାଳିର ପ୍ରଥମ ବଜେଟ ସଂସଦରେ ଉପସ୍ଥାପିତ ହୋଇଛି। ଦେଶର ପ୍ରଥମ ମହିଳା ଅର୍ଥମନ୍ତ୍ରୀ ନିର୍ମଳା ସୀତାରମଣ ୨୦୧୯-୨୦ ବଜେଟକୁ ଉପସ୍ଥାପନ କରିଥିଲେ। ମୋଦି ସରକାର ଯେଉଁ ଜନାଦେଶ ପାଇଥିଲେ ତାହାକୁ ଆଖିରେ ରଖି ସୀତାରମଣ ଦୁଇଟି ବିଷୟ ଉପରେ ଗୁରୁତ୍ୱ ଦେଇଛନ୍ତି। ଏହି ଦୁଇଟି ହେଲା ରାଷ୍ଟ୍ରୀୟ ସୁରକ୍ଷା ଓ ଆର୍ଥିକ ଅଭିବୃଦ୍ଧି। ଅର୍ଥମନ୍ତ୍ରୀ କହିଲେ ଯେ ଆମେ ଚାହୁଁଛୁ ଦେଶରେ ଏକ ମଜବୁତ ସରକାର ଓ ମଜବୁତ ନାଗରିକ। ଆସନ୍ତୁ ଦେଖିବା କ’ଣ ରହିଛି ଏହି ବଜେଟରେ:
୧ ଆର୍ଥିକ ବିକାଶ ଉପରେ ବଜେଟରେ ଗୁରୁତ୍ୱ ଦିଆଯାଇଛି। ତାଙ୍କ ସରକାର ଏବେ ‘ରିଫର୍ମ,ଟ୍ରାନ୍ସଫର୍ମ ଓ ପରଫର୍ମ’ ଉପରେ ଧ୍ୟାନ ଦେବେ। ସେ କହିଲେ ଯେ ନିର୍ବାଚନରେ ମହିଳା ଓ ଯୁବକ ମାନେ ବିପୁଳ ସଂଖ୍ୟାରେ ଭୋଟ ଦେଇ ତାଙ୍କ ସରକାରକୁ କ୍ଷମତାକୁ ଆଣିଥିବା ହେତୁ ଏହି ବର୍ଗକୁ ପ୍ରାଧାନ୍ୟ ଦିଆଯିବ।
୨ ସୀତାରମଣ ବଜେଟ ଉପସ୍ଥାପନ ବେଳେ କହିଲେ ଯେ ଆଗାମୀ ପାଞ୍ଚ ବର୍ଷ ମଧ୍ୟରେ ଭାରତର ଅର୍ଥନୀତି ୫ ଟ୍ରିଲିୟନ ଡଲାରରେ ପହଞ୍ଚିବ। ଚଳିତ ବର୍ଷ ଶେଷ ବେଳକୁ ଭାରତୀୟ ଅର୍ଥନୀତି ୩ ଟ୍ରିଲିୟନ ଛୁଇଁଥିବ ବୋଲି ସେ କହିଛନ୍ତି। ଆସନ୍ତା ବର୍ଷ ମଧ୍ୟରେ ସରକାରଙ୍କ ପକ୍ଷରୁ ଫେସିଲିଟେସନ ସେଣ୍ଟର ମାନ ଖୋଲାଯିବ।
୩ ରେଳର ଉନ୍ନତି ପାଇଁ ସରକାର ବିପୁଳ ଖର୍ଚ୍ଚ କରିବେ। ରେଳ ଭିତ୍ତିଭୂମି ବିକାଶ ପାଇଁ ୫୦ ଲକ୍ଷ କୋଟିର ଯୋଜନା ପ୍ରସ୍ତୁତ କରାଯିବ। ସେ କହିଲେ ଯେ ସାଗରମାଳା, ଭାରତମାଳା ଓ ଉଡାନ ଆଦିରୁ ଲୋକଙ୍କୁ ବ୍ୟାପକ ସୁବିଧା ସୁଯୋଗ ମିଳିବ। ବିଦ୍ୟୁତ ବାହନର ଅଭିବୃଦ୍ଧି ପାଇଁ ସରକାର ଦୃଷ୍ଟି ଦେବେ। ପିପିପି ମୋଡ଼ରେ ଆସନ୍ତା ୧୨ ବର୍ଷ ମଧ୍ୟରେ ରେଳ ବିଭାଗ ପାଇଁ ୫୦ ଲକ୍ଷ କୋଟି ଟଙ୍କା ଖର୍ଚ୍ଚ କରାଯିବ।
୪ ଦେଶର ତିନି କୋଟି ଖୁଚୁରା ଦୋକାନୀମାନଙ୍କୁ ପେନ୍ସନ ଦେବା ପାଇଁ ବଜେଟରେ ଘୋଷଣା କରାଯାଇଛି। ଏହି ପେନସନ ପାଇଁ ଆଧାର କାର୍ଡ ଓ ବ୍ୟାଙ୍କ ଆକାଉଣ୍ଟକୁ ବ୍ୟବହାର କରାଯିବ ପାଇଁ ସେ କହିଛନ୍ତି। ଦେଢ଼ କୋଟି ବାର୍ଷିକ କାରବାର କରୁଥିବା ଦୋକାନୀଙ୍କୁ ମଧ୍ୟ ପେନସନ ମିଳିବ।
୫ ବଜେଟରେ ସୀତାରମନ ଘୋଷଣା କରିଛନ୍ତି ଯେ ସରକାର ବିଦେଶୀ ପୁଞ୍ଜି ବିନିଯୋଗ ପାଇଁ ବ୍ୟାପକ ପଦକ୍ଷେପ ଗ୍ରହଣ କରିବେ। ସିଙ୍ଗଲ ବ୍ରାଣ୍ଡ ରିଟେଲରେ ବିଦେଶୀ ପୁଞ୍ଜି ବଢିବ। ମିଡିଆରେ ମଧ୍ୟ ବିଦେଶୀ ପୁଞ୍ଜି ବିନିଯୋଗ ପାଇଁ ଅନୁମତି ମିଳିବ।
୬ ସ୍ୱଚ୍ଛତା ଓ ଗ୍ରାମାଞ୍ଚଳ ଉପରେ ବଜେଟରେ ଗୁରୁତ୍ୱ ଦିଆଯାଇଛି। ଦେଶର ପ୍ରାୟ ୫ ଲକ୍ଷ ଗ୍ରାମ ଖୋଲା ମଳ ପରିତ୍ୟାଗରୁ ମୁକ୍ତ ହୋଇ ଥିବା ବେଳେ ୨୦୧୪ ପରଠାରୁ ଦେଶରେ ୯ କୋଟିରୁ ଅଧିକ ଶୌଚାଳୟ ତିଆରି କରାଯାଇଛି। ସର୍କାର ସ୍ଵଛ ଭାରତ ମିଶନର ବିସ୍ତାର ପାଇଁ ପ୍ରତିଶୃତି ବଦ୍ଧ ବୋଲି ଅର୍ଥମନ୍ତ୍ରୀ ତାଙ୍କ ବଜେଟ ଭାଷଣରେ କହିଛନ୍ତି।