ଓଡ଼ିଶାଲାଇଭ୍ ବ୍ୟୁରୋ
ଖଣିଜ ପଦାର୍ଥ ପରିବହନ ନିମନ୍ତେ ରୂପରେଖ, ନିର୍ମାଣ ଏବଂ କାର୍ଯ୍ୟ ଦୃଷ୍ଟିରୁ ଦୂରଗାମୀ ପାଇପ୍ଲାଇନ୍ର ସମ୍ପର୍କିତ ଦୁଇ ଦିନିଆ ଭର୍ଚୁଆଲ୍ କର୍ମଶାଳା ଶିକ୍ଷା ଓ ଅନୁସନ୍ଧାନ (ସୋଆ) ପକ୍ଷରୁ ହେବ। ଜାନୁଆରି ୮ ତାରିଖରୁ ଏହି କର୍ମଶାଳା ଆୟୋଜନ କରାଯାଉଛି।
ସୋଆ ପରିଚାଳିତ ଇନ୍ଷ୍ଟିଚ୍ୟୁଟ୍ ଅଫ୍ ଟେକ୍ନିକାଲ୍ ଏଜୁକେସନ୍ ଆଣ୍ଡ ରିସର୍ଚ୍ଚ (ଆଇଟିଇଆର)ର ମେକାନିକାଲ୍ ଇଞ୍ଜିନିୟରିଂ ବିଭାଗ ଓ କୋଲକାତାସ୍ଥିତ ଆଥା (ATHA) ଗ୍ରୁପ୍ର ମିଳିତ ସହଭାଗିତାରେ ଏହି କର୍ମଶାଳା ଆୟୋଜନ କରାଯାଉଥିବା ବିଭାଗୀୟ ମୁଖ୍ୟ ପ୍ରଫେସର ଡକ୍ଟର ଡିଏନ୍ ଥାଟୋଇ ସୂଚନା ଦେଇଛନ୍ତି।
ଦୂରଗାମୀ ପାଇପ୍ଲାଇନ୍ ଦ୍ୱାରା ଖଣିଜ ପଦାର୍ଥର ହାଇଡ୍ରୋଲିକ୍ ପରିବହନ କିଭଳି ହୋଇପାରିବ ତା’ ର ରୂପରେଖ ଓ ଆବଶ୍ୟକତା, ସିଏଫ୍ଡି ପର୍ଯ୍ୟବେସିତ ସିମୁଲେସନ୍ ଏବଂ ମଡେଲିଂ ସଫ୍ଟୱେୟାର ସମ୍ପର୍କରେ ଅଧିକ ଜ୍ଞାନ ଆହରଣ କରିବା ସହ ଶିଳ୍ପାନୁଷ୍ଠାନ ଏବଂ ଗବେଷଣା କେନ୍ଦ୍ର ଓ ଶିକ୍ଷାନୁଷ୍ଠାନଗୁଡ଼ିକ ମଧ୍ୟରେ ଆଲୋଚନାକୁ ସୁଯୋଗ ଦେବା ଏହି କର୍ମଶାଳାର ମୂଳ ଲକ୍ଷ୍ୟ ବୋଲି ପ୍ରଫେସର ଥାଟୋଇ କହିଛନ୍ତି।
ଏହି କର୍ମଶାଳାରେ ପାଇପ୍ଲାଇନ୍ ଡିଜାଇନ୍, ଇଞ୍ଜିନିୟରିଂ ଆଣ୍ଡ ପମ୍ପ୍ସ, କନ୍ଷ୍ଟ୍ରକ୍ସନ୍, ଭାଲ୍ଭ୍ସ ଆଣ୍ଡ ଅପରେସନ୍, ମେନ୍ଟେନାନ୍ସ ଆଣ୍ଡ ସେଫ୍ଟି ସମ୍ପର୍କରେ ଆଲୋଚନା କରାଯିବ ବୋଲି ସେ କହିଛନ୍ତି ।
ୟୁଏସ୍ଏସ୍ଥିତ ଅସେନ୍କୋ ପାଇପ୍ଲାଇନ୍ ସିଷ୍ଟମ୍ସର ରାଜେନ୍ଦ୍ର ତାଲାମୁଡୁପୁଲା ଏବଂ ଜୁଲି ହାରିସ୍, ପିଟରସନ୍ ଆଣ୍ଡ କୁକ୍ ର ଜୁଲିଆନ୍ ରସ୍କୋନି ଏବଂ ମାଇକ୍ ଟର୍ନେ, ଆଥା ଗ୍ରୁପ୍ର ସଭାପତି (ପ୍ରୋଜେକ୍ଟସ୍) ଏନ୍.ଡି. ରାଓ, ନୂଆଦିଲ୍ଲୀସ୍ଥିତ ମେକନ୍ର ଅମିତ୍ ଗଙ୍ଗଲ୍, ନେଦରଲ୍ୟାଣ୍ଡ ଗେହୋର ଶ୍ରୀ ମାଲ୍କମ୍. ଜେ. ହାରିସନ୍, ଭୁବନେଶ୍ୱରସ୍ଥିତ ଆଇଏମଏମ୍ଟିର ଚିଫ୍ ସାଇନ୍ଟିଷ୍ଟ ଡକ୍ଟର ଏସ୍କେ ବିଶ୍ୱାଳ, ଜର୍ମାନୀ ଫେଲୁୱାର ହେନ୍ କ୍ରିମ୍ପେନ୍ଫୋର୍ଟ, ଭାରତର ଏସାର୍ ମିନ୍ମେଟ୍ର ଏଏସ୍ ପ୍ରସାଦ, ଆର୍ସେଲର୍ ମିତଲ୍ର ୟୁଏସ୍ଆର୍ ରାଜୁ ଏବଂ ଚିଲିସ୍ଥିତ ଅସେନ୍କୋର ଜର୍ଜ ମାର୍ଟିନେଜଙ୍କ ଭଳି ଆନ୍ତର୍ଜାତୀୟ ବିଶେଷଜ୍ଞ ଏହି କର୍ମଶାଳାରେ ଯୋଗଦେବେ।