ଓଡ଼ିଶାଲାଇଭ୍ ବ୍ୟୁରୋ
ପିଆଇବି ଭୁବନେଶ୍ୱର ପକ୍ଷରୁ ଓଡ଼ିଶା ଗଣମାଧ୍ୟମ ପ୍ରତିନିଧି ଦଳର ଛତିଶଗଡ଼ ଗସ୍ତ ଶେଷ ହୋଇଛି। ଗୁରୁବାର ଗସ୍ତର ଶେଷ ଦିନରେ ଗଣମାଧ୍ୟମ ପ୍ରତିନିଧି ଦଳର ସଦସ୍ୟମାନେ ରାୟପୁରଠାରେ ଛତିଶଗଡ଼ର ମୁଖ୍ୟମନ୍ତ୍ରୀ ବିଷ୍ଣୁ ଦେଓ ସାଏଙ୍କ ସହ ସାକ୍ଷାତ କରିଛନ୍ତି।ଏହି ଆଲୋଚନା ସାମ୍ବାଦିକମାନଙ୍କୁ ଛତିଶଗଡ଼ର ବିକାଶ ଯାତ୍ରା, ପ୍ରାକୃତିକ ସମ୍ପଦର ସମ୍ଭାବନା, ଜଙ୍ଗଲ-ଭିତ୍ତିକ ଜୀବିକା ଏବଂ ସ୍ଥାନୀୟ ସମ୍ପ୍ରଦାୟର ଅର୍ଥନୈତିକ ସଶକ୍ତୀକରଣ ପାଇଁ ନିଆଯାଇଥିବା ପଦକ୍ଷେପ ସମ୍ପର୍କରେ ପ୍ରତ୍ୟକ୍ଷ ଧାରଣା ଲାଭ କରିବାର ସୁଯୋଗ ପ୍ରଦାନ କରିଥିଲା।
ଓଡ଼ିଶାର ଗଣମାଧ୍ୟମ ପ୍ରତିନିଧି ଦଳକୁ ସ୍ୱାଗତ ଜଣାଇ ମୁଖ୍ୟମନ୍ତ୍ରୀ ବିଷ୍ଣୁ ଦେଓ ସାଏ କହିଥିଲେ, “ଓଡ଼ିଶାର ସାମ୍ବାଦିକମାନେ ଛତିଶଗଡ଼ ଗସ୍ତ କରିବା ରାଜ୍ୟ ପାଇଁ ଏକ ସୌଭାଗ୍ୟର ବିଷୟ। ଛତିଶଗଡ଼ ସରକାରଙ୍କ ବିକାଶମୂଳକ ପଦକ୍ଷେପ ଏବଂ ସରକାରୀ କାର୍ଯ୍ୟକ୍ରମଗୁଡ଼ିକୁ ଲୋକଙ୍କ ନିକଟରେ ପହଞ୍ଚାଇବାରେ ସାମ୍ବାଦିକମାନଙ୍କ ବଡ଼ ଭୂମିକା ରହିଛି।”
ଏହି ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଜନସେବାର ୨୫ ବର୍ଷ ପୂର୍ତ୍ତି ଉପଲକ୍ଷେ ସେପ୍ଟେମ୍ବର ୧୭ ରୁ ଅକ୍ଟୋବର ୧୭ ପର୍ଯ୍ୟନ୍ତ ପାଳନ କରାଯାଉଥିବା ‘ସେବା ସଂକଳ୍ପ ଅଭିଯାନ’ ବିଷୟରେ ମଧ୍ୟ ମୁଖ୍ୟମନ୍ତ୍ରୀ ଆଲୋଚନା କରିଥିଲେ। ସେ କହିଥିଲେ ଯେ ଏହି ମାସବ୍ୟାପୀ ଅଭିଯାନ ଅଧୀନରେ ୧୩ଟି ଭିନ୍ନ ଭିନ୍ନ କାର୍ଯ୍ୟକ୍ରମର ଯୋଜନା କରାଯାଇଛି ଯେଉଁଥିରେ ମହିଳା, କୃଷକ, ଶ୍ରମିକ, ବ୍ୟବସାୟୀ, ଡାକ୍ତର ଏବଂ ଇଞ୍ଜିନିୟରଙ୍କ ସମେତ ସମାଜର ବିଭିନ୍ନ ବର୍ଗର ଲୋକମାନେ ଅଂଶଗ୍ରହଣ କରିବେ।
ଛତିଶଗଡ଼ର ପ୍ରାୟ ୪୪ ପ୍ରତିଶତ ଭୂଭାଗ ଜଙ୍ଗଲ ଦ୍ୱାରା ଆଚ୍ଛାଦିତ ହୋଇ ରହିଛି ଏବଂ ‘ଏକ ପେଡ୍ ମା କେ ନାମ୍’ ଭଳି ବୃକ୍ଷରୋପଣ କାର୍ଯ୍ୟକ୍ରମ ତଥା କାମ୍ପା ପାଣ୍ଠି ମାଧ୍ୟମରେ ସମର୍ଥିତ ପ୍ରୟାସଗୁଡ଼ିକ ବିଷୟରେ ମୁଖ୍ୟମନ୍ତ୍ରୀ ଉଲ୍ଲେଖ କରିଥିଲେ।
ଗ୍ରାମୀଣ ଓ ଆଦିବାସୀ ଅର୍ଥନୀତିରେ ଜଙ୍ଗଲଜାତ ଦ୍ରବ୍ୟର ଅବଦାନ ଉପରେ ଗୁରୁତ୍ୱାରୋପ କରି ମୁଖ୍ୟମନ୍ତ୍ରୀ କହିଥିଲେ ଯେ ଛତିଶଗଡ଼ର ପ୍ରାୟ ୧୩ ଲକ୍ଷ ପରିବାର କେନ୍ଦୁ ପତ୍ର ସଂଗ୍ରହ କାର୍ଯ୍ୟ ସହ ଜଡ଼ିତ ଅଛନ୍ତି। ସରକାର ସେମାନଙ୍କୁ ପ୍ରତି ‘ଷ୍ଟାଣ୍ଡାର୍ଡ ବ୍ୟାଗ୍’ ପିଛା ୫,୫୦୦ ଟଙ୍କା ପ୍ରଦାନ କରିବା ସହ ଏହି କାର୍ଯ୍ୟରେ ନିୟୋଜିତ ବ୍ୟକ୍ତିଙ୍କୁ ଜୋତା ମଧ୍ୟ ଯୋଗାଇ ଦେଉଛନ୍ତି। ଏହାସହ କେନ୍ଦୁ ପତ୍ର ବିକ୍ରିରୁ ମିଳୁଥିବା ଲାଭ ବୋନସ୍ କିମ୍ବା ଲାଭାଂଶ (ଡିଭିଡେଣ୍ଡ) ହିତାଧିକାରୀମାନଙ୍କ ସହ ବଣ୍ଟନ କରାଯାଉଛି।
ଓଡ଼ିଶାର ଗଣମାଧ୍ୟମ ପ୍ରତିନିଧି ଦଳ ଚାଲିଥିବା ଏହି ଛତିଶଗଡ଼ ଗସ୍ତରୁ ପାଇଥିବା ଅନୁଭୂତି ମୁଖ୍ୟମନ୍ତ୍ରୀଙ୍କୁ ଜଣାଇଥିଲେ। ଏହି ଗସ୍ତ ମାଧ୍ୟମରେ ସେମାନେ ସିରପୁର, ଏସଇସିଏଲ୍ ଗେଭ୍ରା ଖଣି, ଏନଟିପିସି କୋର୍ବା ଏବଂ ବାଲକୋ ପ୍ଲାଣ୍ଟ ପରିଦର୍ଶନ କରି ଛତିଶଗଡ଼ର ପ୍ରତ୍ନତାତ୍ତ୍ୱିକ ଐତିହ୍ୟ, ଖଣି ଉତ୍ତୋଳନ, ଶକ୍ତି, ଶିଳ୍ପ ଏବଂ ସାମୁଦାୟିକ ବିକାଶ କାର୍ଯ୍ୟକ୍ରମ ସମ୍ପର୍କରେ ପ୍ରତ୍ୟକ୍ଷ ଜ୍ଞାନ ଲାଭ କରିଥିଲେ।
ଏହି ଆଲୋଚନା ଓ ପରିଦର୍ଶନ ସାମ୍ବାଦିକମାନଙ୍କୁ ସେମାନଙ୍କର କ୍ଷେତ୍ରସ୍ତରୀୟ ଅନୁଭୂତିକୁ ଛତିଶଗଡ଼ର ବ୍ୟାପକ ବିକାଶ ଦୃଷ୍ଟିକୋଣ ସହିତ ଯୋଡ଼ିବାରେ ସହାୟକ ହୋଇଥିଲା। ଏହା ସହିତ, ଜୀବିକା ନିର୍ବାହ ଓ ଅର୍ଥନୈତିକ ବିକାଶ ପାଇଁ ରାଜ୍ୟର ପ୍ରାକୃତିକ ସମ୍ପଦର ଉପଯୋଗ କରିବା ଦିଗରେ ନିଆଯାଇଥିବା ପଦକ୍ଷେପ ସମ୍ପର୍କରେ ସେମାନେ ଗଭୀର ଧାରଣା ଲାଭ କରିଥିଲେ।
ଏହି ପରିଦର୍ଶନକୁ କେନ୍ଦ୍ର ସଞ୍ଚାର ବ୍ୟୁରୋ (ସିବିସି), ସମ୍ବଲପୁରର ସହକାରୀ ନିର୍ଦ୍ଦେଶକ ମନମୋହନ ପାଢ଼ୀ ଏବଂ ପିଆଇବି, ଭୁବନେଶ୍ୱରର ସୂଚନା ସହାୟକ ବିକାଶ ରଞ୍ଜନ ଦଳାଇ ସମନ୍ୱୟ କରିଥିଲେ।
Tags: #OdishaMediaDelegation #ChhattisgarhVisit #VishnuDeoSai #CMOChhattisgarh #PIBBhubaneswar #Raipur
