ଓଡ଼ିଶାଲାଇଭ୍ ଏଣ୍ଟରଟେନମେଣ୍ଟ ବ୍ୟୁରୋ
କେଉଁ ଓଲିଉଡ ସେଲିବ୍ରିଟି ୨୦୨୦ରେ ବିବାହ ବନ୍ଧନରେ ବାନ୍ଧି ହୋଇଛନ୍ତି ଜାଣନ୍ତୁ ଓଡ଼ିଶାଲାଇଭ୍ ଫ୍ଲାସବ୍ୟାକ୍ ରିପୋର୍ଟରେ।
କରୋନା, ଲକଡାଉନ, ସଟଡାଉନ ପାଇଁ କିଛି ଦିନ ଜୀବନଯାତ୍ରା ଅଟକି ଯାଇଥିଲା। କିନ୍ତୁ ଏହି ସମୟରେ କିଛି ଓଲିଉଡ ସେଲିବ୍ରିଟି ଆଉ ପାଦେ ଆଗକୁ ବାଢ଼ି ହାତକୁ ଦି ହାତ ହୋଇଛନ୍ତି। ଏହି ତାଲିକାରେ ଅଭିନେତା ଅମ୍ଳାନଙ୍କଠାରୁ ଗାୟିକା ଦୀପ୍ତିରେଖା ପାଢ଼ୀ ଅଛନ୍ତି।
ଅମ୍ଳାନ
ଓଡ଼ିଆ ଫିଲ୍ମ ଜଗତର ଜଣାଶୁଣା, ଲୋକପ୍ରିୟ ବରିଷ୍ଠ ଅଭିନେତା ମିହିର ଦାସଙ୍କ ପୁଅ ଅମ୍ଳାନ ଫେବ୍ରୁଆରି ୮ରେ ତାଙ୍କ ଗାର୍ଲଫ୍ରେଣ୍ଡ ଭୂମିକାଙ୍କୁ ବିବାହ କରିଥିଲେ। କଟକର ସିଡିଏ ସେକ୍ଟର ୮ରେ ଥିବା ତାଙ୍କ ବାସଭବନରେ ଏହି ବିବାହ ହୋଇଥିଲା। ଓଲିଉଡ ଅଭିନେତା ବୁଦ୍ଧାଦିତ୍ୟ, ଅଭିନେତ୍ରୀ ମହେଶ୍ୱତା, ଜିନା ଓ ତାଙ୍କ ସ୍ୱାମୀ, ଅଭିନେତ୍ରୀ ଦିବ୍ୟା, ତମନ୍ନା ଯୋଗ ଦେଇଥିଲେ।
ଅର୍ଦ୍ଧେନ୍ଦୁ
‘ଅ ଆ ହର୍ଷେଇ’, ‘ଟପୋରି’, ‘ବ୍ଲାକମେଲ’ ଓ ‘ମୁଁ ପରଦେଶୀ ଚଢ଼େଇ’ ଭଳି ଫିଲ୍ମରେ ଅଭିନେତା ସାଜିଥିବା ଅର୍ଦ୍ଧେନ୍ଦୁ ଏହି ୨୦୨୦ରେ ବିବାହ କରିଥିଲେ। ପିପିଲି ବିଧାୟକ ପ୍ରଦୀପ ମହାରଥୀଙ୍କ ଝିଅ ପଲ୍ଳବୀଙ୍କୁ ସେ ସାତ ଜନ୍ମର ସାଥୀ କରିଥିଲେ। ବାହାଘର ସମୟରେ ଅର୍ଦ୍ଧେନ୍ଦୁ ଓ ପଲ୍ଲବୀଙ୍କ ଫଟୋ ସୋସିଆଲ ମିଡିଆରେ ଭାଇରାଲ ହୋଇଥିଲା।
ଝିଲିକ
କୋଲକାତା ଝିଅ ତଥା ଓଲିଉଡ ଅଭିନେତ୍ରୀ ଝିଲିକ ଭଟ୍ଟାଚାର୍ଯ୍ୟ ୨୦୨୦, ମାର୍ଚ୍ଚ ୧୧ରେ ବିବାହ କରିଥିଲେ। ଯାଜପୁରର ସୁକିନ୍ଦା ବିଧାୟକ ପ୍ରୀତିରଞ୍ଜନ ଘଡ଼ାଇ(ଡ୍ୟାନି)ଙ୍କୁ ଜୀବନସାଥୀ ଭାବେ ଚୟନ କରିଥିଲେ। ଅଭିନେତ୍ରୀ ଝିଲିକ ତାଙ୍କ ଇନଷ୍ଟାଗ୍ରାମରେ ଏକ ବିବାହ ବେଳର ଫଟୋ ସେୟାର କରି ସୂଚନା ଦେଇଥିଲେ। ବିବାହ ପୂର୍ବରୁ ଏକାଧିକ ଓଡ଼ିଆ ଫିଲ୍ମରେ ନିଜ ଝଲକ ଦେଖାଇଥିଲେ ଝିଲିକ। ବିବାହ ପରେ କିନ୍ତୁ ତାଙ୍କୁ ଆଉ ଫିଲ୍ମରେ ଦେଖିବାକୁ ମିଳିନାହିଁ।
ଗାର୍ଗୀ ମହାନ୍ତି
ଓଲିଉଡର ଲୋକପ୍ରିୟ ଅଭିନେତ୍ରୀ ଗାର୍ଗୀ ମହାନ୍ତି। ଫିଲ୍ମ, ସିରିଏଲରେ କାମ କରି ସେ ଦର୍ଶକଙ୍କ ପ୍ରିୟ ହୋଇପାରିଛନ୍ତି। ଗାର୍ଗୀ କରୋନା କଟକଣା ଭିତରେ ଜୁନ୍ ମାସରେ ତାଙ୍କ ପିଲାବେଳର ବନ୍ଧୁ ରବିନ୍ଦ୍ର ପାଢ଼ୀଙ୍କୁ ବିବାହ କରିଥିଲେ। କରୋନା ଯୋଗୁଁ ଏହି ବିବାହ ଅତି ନିରାଡମ୍ବର ଭାବେ ହୋଇଥିଲା।
ଦୀପ୍ତିରେଖା
ଓଡ଼ିଶାର ଲୋକପ୍ରିୟ ଗାୟିକା ଦୀପ୍ତିରେଖା ପାଢ଼ୀଙ୍କର ଏଇ ହାତଗଣ୍ଠି ପଡ଼ିଛି। ଡିସେମ୍ବର ୧୧ରେ ଖୋର୍ଦ୍ଧାର ସୌମ୍ୟରଞ୍ଜନ ଶତପଥୀଙ୍କୁ ସେ ବିବାହ କରଥିଲେ। ଚନ୍ଦ୍ରଶେଖରପୁର ଅଞ୍ଚଳର ଏକ ହୋଟେଲରେ କୋଭିଡ କଟକଣାରେ ଏହି ବିବାହ ଉତ୍ସବ ଅନୁଷ୍ଠିତ ହୋଇଥିଲା। କରୋନା ପାଇଁ ଓଡ଼ିଶା ସଙ୍ଗୀତ ଜଗତର ଅଳ୍ପ କେତେଜଣ ଗାୟକ ଗାୟିକା ଏଥିରେ ଯୋଗ ଦେଇଥିଲେ।
ସୋନାଲି ଓଝା
ଏକାଧିକ ସିରିଏଲରେ ଅଭିନୟ କରି ଅଭିନେତ୍ରୀ ଓଡ଼ିଶାର ଘରେ ଘରେ ପରିଚତ ହୋଇଥିବା ସୋନାଲି ଓଝା ମଧ୍ୟ ୨୦୨୦ରେ ବିବାହ କରିଛନ୍ତି। କଟକର ଜଣେ ବିଜନେସ ମ୍ୟାନଙ୍କୁ ସେ ବିବାହ କରିଥବା ଜଣାପଡ଼ିଛି। ଏବେ ସେ ସିରିଏଲ ‘କୁଆଁରୀ ବୋହୂ’ରେ କବିତା ଅପା ଭୂମିକାରେ ନଜର ଆସୁଛନ୍ତି।
