ଓଡ଼ିଶାଲାଇଭ୍ ବ୍ୟୁରୋ
(ବିଶାଖାପାଟଣାରୁ ଯଶୋବନ୍ତ ପାଢ଼ୀ): ମ୍ୟାଚ ହାରିଗଲେ ବୋଲି ଛାତ୍ରଙ୍କୁ ଦୁମ୍ ଦୁମ୍ କରି ଛେଚି ପକେଇଲେ ଖେଳ ଶିକ୍ଷକ। ଏଭଳି ଘଟଣା ଦେଖିବାକୁ ମିଳିଛି ତାମିଲନାଡ଼ୁ ରାଜ୍ୟର ସାଲେମ ଜିଲ୍ଲାରେ। ଏହି ଘଟଣାର ଭିଡିଓ ଏବେ ସୋସିଆଲ ମିଡିଆରେ ଘୁରି ବୁଲୁଛି।
ସାଲେମ ଜିଲ୍ଲାରେ ଚାଲିଥିଲା ଆନ୍ତଃ ବିଦ୍ୟାଳୟ ଫୁଟବଲ ମ୍ୟାଚ। ଖେଳ ଶିକ୍ଷକ ଆନ୍ନାମଲାଇଙ୍କ ନେତୃତ୍ଵରେ ଭାଗ ନେଇଥିବା ଛାତ୍ରମାନେ ଫୁଟବଲ ମ୍ୟାଚରେ ଖରାପ ପ୍ରଦର୍ଶନ କରିଥିଲେ। ମ୍ୟାଚ ହାରିଯିବା ପରେ ଖେଳ ଶିକ୍ଷକ ଛାତ୍ରମାନଙ୍କ ଉପରେ ରାଗ ସୁଝେଇଥିଲେ।
ମ୍ୟାଚ ସରିବା ପରେ ପଡ଼ିଆରେ ସର୍ବସମ୍ମୁଖରେ ଛାତ୍ରମାନଙ୍କୁ ମାଡ଼ ମାରିଥିଲେ ଖେଳ ଶିକ୍ଷକ ଆନ୍ନାମଲାଇ। ଏହି ଘଟଣାର ଭିଡିଓ ସୋସିଆଲ ମିଡିଆରେ ଭାଇରାଲ ହେବା ପରେ ସମ୍ପୃକ୍ତ ଖେଳ ଶିକ୍ଷକଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି।
ଖେଳ ଶିକ୍ଷକ ଆନ୍ନାମଲାଇଙ୍କୁ ସାଲେମ ଜିଲ୍ଲା ସାଙ୍ଗଗିରୀ ବ୍ଲକ ଶିକ୍ଷା ଅଧିକାରୀ ଚାକିରିରୁ ନିଲମ୍ବିତ କରିଛନ୍ତି। ଏହି ଘଟଣାକୁ ନେଇ ରାଜ୍ୟର ବିଭିନ୍ନ ସ୍ଥାନରେ ପ୍ରତିକ୍ରିୟା ପ୍ରକାଶ ପାଇବା ସହ ସମ୍ପୃକ୍ତ ଶିକ୍ଷକଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି ହେଉଛି।
Tags: #Tamilnadu #FootballMatch #Assault #SalemDistricts
