ଓଡ଼ିଶାଲାଇଭ୍ ବ୍ୟୁରୋ
ବଲିଉଡ୍ କଳାକାରଙ୍କୁ ହତ୍ୟା ଧମକ ମିଳିବାର ଧାରା କମିବାର ନାଁ ଧରୁନି। ଏଥର ଏକାସାଙ୍ଗରେ ଚାରି ଚାରି ଜଣ ସେଲିବ୍ରିଟିଙ୍କୁ ମିଳିଛି ଧମକପୂର୍ଣ୍ଣ ଇମେଲ୍। ଏମାନଙ୍କ ମଧ୍ୟରେ ଅଛନ୍ତି କମେଡିଆାନ କପିଲ ଶର୍ମା, ଅଭିନେତା ରାଜପାଲ ଯାଦବ, କୋରିଓଗ୍ରାଫର ରେମା ଡିସୁଜା ଏବଂ ସୁଗନ୍ଧା ମିଶ୍ର। ଏନେଇ ପୋଲିସ ମାମଲା ରୁଜୁ କରି ଘଟଣାର ଯାଞ୍ଚ କରୁଛି।
କପିଲ ଶର୍ମା ଏବଂ ରାଜପାଲ ଯାଦବଙ୍କ ଅଭିଯୋଗକୁ ଭିତ୍ତି କରି ମୁମ୍ବାଇର ଅମ୍ବୋଲି ପୋଲିସ ଷ୍ଟେସନରେ ଏଫଆଇଆର ରୁଜୁ ହୋଇଥିଲା। ଅନ୍ୟପକ୍ଷେ ସୁଗନ୍ଧା ମିଶ୍ରଙ୍କ ଅଭିଯୋଗ କ୍ରମେ ଓଶିୱାରା ପୋଲିସ ଷ୍ଟେସନରେ ମାମଲା ହୋଇଛି। ରେମୋ ଡି’ସୁଜାଙ୍କୁ ମିଳିଥିବା ଧମକପୂର୍ଣ୍ଣ ଚିଠିକୁ ପୋଲିସ ଯାଞ୍ଚ କରୁଛି।
ଧମକ ଦେଇଥିବା ବ୍ୟକ୍ତି ଇମେଲରେ ନିଜ ନାଁ ବିଷ୍ଣୁ ବୋଲି ଉଲ୍ଲେଖ କରିଛି। ଅଭିନେତା ସୈଫ ଅଲ୍ଲି ଖାନଙ୍କୁ ତାଙ୍କ ଘରେ ଆକ୍ରମଣ ହେବା ପରେ ଏପରି ଧମକ ଆସିଛି। ତେଣୁ ପୋଲିସ ଏହାକୁ ଗୁରୁତର ସହ ନେଇଛି। ତେବେ ପ୍ରାଥମିକ ଯାଞ୍ଚ ପରେ ଇମେଲ୍ ପଠା ଯାଇଥିବା ଆଇପି ଆଡ୍ରେସ୍ ପାକିସ୍ତାନର ହୋଇଥିବା ସୂଚନା ମିଳିଛି। ଯାହାକୁ ନେଇ ପୋଲିସ ଅଧିକ ସତର୍କ ହୋଇପଡ଼ିଛି।
ଏହି ଧମକପୂର୍ଣ୍ଣ ଚିଠିରେ ଉଲ୍ଲେଖ ରହିଛି, “ଆମେ ଆପଣଙ୍କ ପ୍ରତ୍ୟେକ କାର୍ଯ୍ୟକଳାପ ଉପରେ ନଜର ରଖିଛୁ। ଆମେ ଏକ ସମ୍ବେଦନଶୀଳ ମାମଲାରେ ଆପଣଙ୍କ ଦୃଷ୍ଟି ଆକର୍ଷଣ କରିବାକୁ ଚାହୁଁଛୁ। ଏହା କୌଣସି ପବ୍ଲିକ ଷ୍ଟଣ୍ଟ ବା ଆପଣଙ୍କୁ ହଇରାଣ କରିବା ପାଇଁ ନୁହେଁ। ଆମର ଅନୁରୋଧ, ଆପଣ ଏହି ସୂଚନାକୁ ଗମ୍ଭୀରତାର ସହ ନେବେ ଏବଂ ଗୋପନୀୟ ରଖିବେ। ଯଦି ଏପରି ନ କରନ୍ତି ତେବେ ଆପଣଙ୍କର ବୃତ୍ତିଗତ ଏବଂ ବ୍ୟକ୍ତିଗତ ଜୀବନ ପ୍ରତି ବିପଦ ସୃଷ୍ଟି ହୋଇପାରେ।”
ଜାତୀୟ ମିଡିଆ ତଥ୍ୟରୁ ଜଣାଯଶଇଛି, ଏହି ୪ ଜଣ ସେଲିବ୍ରିଟିଙ୍କୁ ଅଲଗା ଅଲଗା ସମୟରେ ମେଲ୍ ଆସିଛି। ଧାରା ୩୫୧ (କ) ଅନୁସାରେ, କେସ ଫାଇଲ କରି ପୋଲିସ ଏହି ମାମଲାର ଯାଞ୍ଚ କରୁଛି।
ପ୍ରଥମ ଥର ପାଇଁ ବଲିଉଡ୍ ଅଭିନେତାଙ୍କୁ ଏପରି ଧମକ ମିଳିନି। ଏହା ପୂର୍ବରୁ ଅନେକ ଧମକ ଏମିତି ଆସିଛି। ଗତବର୍ଷ ସଲମାନ ଖାନ ଏବଂ ପଞ୍ଜାବୀ ଗାୟକ ଏପି ଢିଲ୍ଲୋନଙ୍କୁ ହତ୍ୟା ଧମକ ମିଳିଥିଲା। ଏପରିକି ସଲମାନଙ୍କ ଘର ବାହାରେ ଫାୟାରିଂ ବି ହୋଇଥିଲା।
Tags: #KapilSharma #BollywoodCelebrity #DeathThreat #Email #Mumbai #India
