ଓଡ଼ିଶାଲାଇଭ୍ ବ୍ୟୁରୋ
ଭୁବନେଶ୍ୱରସ୍ଥିତ କିଟ୍ ବିଶ୍ୱ ବିଦ୍ୟାଳୟର ହଷ୍ଟେଲରେ ବି.ଟେକ୍ ତୃତୀୟ ବର୍ଷର ନେପାଳ ଛାତ୍ରୀଙ୍କ ଆତ୍ମହତ୍ୟା ଘଟଣାକୁ ଦିନକୁ ନେଇ ଦିନ ବିବାଦ ବଢ଼ି ଚାଲିଛି। ଏହି ଘଟଣାରେ ଗିରଫ ହୋଇ ଜେଲ ହାଜତରେ ଥିବା ଅଭିଯୁକ୍ତ ଆଦଭିକ ଶ୍ରୀବାସ୍ତବଙ୍କୁ ତିନିଦିନିଆ ରିମାଣ୍ଡରେ ନେଇଛି କମିଶନରେଟ ପୋଲିସ। ଅଭିଯୁକ୍ତଙ୍କର ଭଏସ୍ ସ୍ପେକ୍ଟ୍ରୋଗ୍ରାଫି ପରୀକ୍ଷା କରାଯିବ।
ଗିରଫ ହୋଇ ଝାରପଡ଼ା ଜେଲରେ ଥିବା ଅଭିଯୁକ୍ତ ଅଦଭିକଙ୍କୁ ମାରାଥନ ଜେରା କରୁଛି ପୋଲିସ। ମୃତ ନେପାଳ ଛାତ୍ରୀଙ୍କ ସହ ବାର୍ତ୍ତାଳାପର ଭାଇରାଲ କ୍ଲିପର ପରୀକ୍ଷା କରାଯିବ ବୋଲି ପୋଲିସ କହିଛି। ତିନିଦିନିଆ ରିମାଣ୍ଡରେ ନେଇ ନେପାଳ ଛାତ୍ରୀଙ୍କ ଆତ୍ମହତ୍ୟାର ଅସଲ କାରଣ ଜାଣିବାକୁ ପ୍ରୟାସ କରିବ ପୋଲିସ।
ମୃତ ଛାତ୍ରୀଙ୍କ ସହ ଅଦଭିକଙ୍କର ସମ୍ପର୍କ କେବେଠାରୁ ଆରମ୍ଭ ହୋଇଥିଲା ଓ କେବେ ଏଥିରେ ଭଟ୍ଟା ପଡ଼ିଥିଲା, କେଉଁ କାରଣରୁ ସେମାନଙ୍କ ସମ୍ପର୍କ ଭାଙ୍ଗିଥିଲା ଏବଂ ଛାତ୍ରୀଙ୍କୁ ନିର୍ଯାତନା ଦେବା ନେଇ ଆସୁଥିବା ଅଭିଯୋଗ ସମ୍ପର୍କରେ ତଥ୍ୟ ହାତେଇବାକୁ ଚେଷ୍ଟା କରିବ ପୋଲିସ।
ମୃତ ନେପାଳ ଛାତ୍ରୀଙ୍କ ଆତ୍ମହତ୍ୟା ଘଟଣା ପରେ ଏକ ଅଡିଓ କଲର କ୍ଲିପ ସୋସିଆଲ ମିଡିଆରେ ଭାଇରାଲ ହୋଇଥିଲା। ଏହି ଭଏସ୍ ମୃତ ଛାତ୍ରୀ ଏବଂ ଅଭିଯୁକ୍ତ ଆଦଭିକ୍ଙ୍କର ବୋଲି କୁହାଯାଉଛି। ଏହି ଅଡିଓ କ୍ଲିପରେ ଅନେକ କଟୁ ଏବଂ ଅଶ୍ଳୀଳ ଭାଷା ପ୍ରୟୋଗ କରାଯାଇଥିବା ଶୁଣିବାକୁ ମିଳିଛି।
ତେବେ ଏହି ଭଏସ୍ ପ୍ରକୃତରେ ଅଭିଯୁକ୍ତ ଆଦଭିକ୍ଙ୍କର କି ନାହିଁ ଭଏସ୍ ସ୍ପେକ୍ଟ୍ରୋଗ୍ରାଫି ପରୀକ୍ଷା ପରେ ସ୍ପଷ୍ଟ ହୋଇପାରିବ ବୋଲି ପୋଲିସ କହିଛି। ଏହି ପରୀକ୍ଷା ପାଇଁ କୋର୍ଟଙ୍କଠାରୁ ଅନୁମତି ଆଣିଛି କମିଶନରେଟ୍ ପୋଲିସ। ରାଜ୍ୟ ଫୋରେନ୍ସିକ୍ ଲାବରେ ଏହି ପରୀକ୍ଷା କରାଯିବ।
ଭୁବନେଶ୍ୱରସ୍ଥିତ କିଟ୍ ବିଶ୍ୱବିଦ୍ୟାଳୟର ହଷ୍ଟେଲ ରୁମ୍ରେ ରବିବାର ବିଳମ୍ବିତ ରାତିରେ ବିଟେକ୍ ତୃତୀୟ ବର୍ଷର ନେପାଳୀ ଛାତ୍ରୀ ଆତ୍ମହତ୍ୟା କରିଥିଲେ। ଘଟଣାକୁ ନେଇ ଅନ୍ୟ ନେପାଳ ଛାତ୍ରମାନେ ବିରୋଧ ପ୍ରଦର୍ଶନ କରିବାରୁ ସେମାନଙ୍କୁ ବିଶ୍ୱବିଦ୍ୟାଳୟ ପରିସରରୁ ବାହାର କରିଦିଆଯାଇଥିଲା। ଏହାକୁ ନେଇ ସାରା ବିଶ୍ୱରୁ ପ୍ରତିକ୍ରିୟା ଦେଖିବାକୁ ମିଳିଥିଲା।
ଘଟଣାର ନିରପେକ୍ଷ ତଦନ୍ତ ପାଇଁ ରାଜ୍ୟ ସରକାରଙ୍କ ପକ୍ଷରୁ ଫ୍ୟାକ୍ଟ ଫାଇଣ୍ଡିଂ କମିଟି ଗଠନ କରାଯାଇ ତଦନ୍ତ ଚାଲିଛି। ଏଥି ସହ ମୃତ ଛାତ୍ରୀ ପ୍ରକ୍ରିତି ଲମସାଲଙ୍କୁ ନ୍ୟାୟ ପ୍ରଦାନ ସହ ପୂର୍ବ ଭଳି କ୍ୟାମ୍ପସରେ ଶାନ୍ତି ଫେରାଇ ଆଣିବା ନେଇ ପ୍ରତିଶ୍ରୁତି ଦେଇଛନ୍ତି ରାଜ୍ୟ ସରକାର।
ଏହି ଘଟଣାରେ କିଟ୍ ବିଶ୍ୱବିଦ୍ୟାଳୟର ୮ ଜଣ ଅଧିକାରୀଙ୍କୁ ହାଇଲେବୁଲ କମିଟି ଆଗରେ ହାଜର ହେବା ପାଇଁ ନୋଟିସ୍ ଜାରି କରାଯାଇଛି। ସମସ୍ତ ଡକ୍ୟୁମେଣ୍ଟ ସହ ହାଜର ହେବା ଲାଗି ଉଚ୍ଚ ଶିକ୍ଷା ବିଭାଗ ପକ୍ଷରୁ ନିର୍ଦ୍ଦେଶ ଜାରି କରାଯାଇଛି।
Tags: #NepalstudentDeathCase #Protest #Bhubaneswar #Controversy #Remand #Odisha
