ଅଭିନୟର ଅନ୍ୟ ନାମ ଉତ୍ତମ

ସଙ୍ଗୀତା ମାନସିଂହ

କେତେବେଳେ ରୋମାଣ୍ଟିକ ଅନ୍ଦାଜରେ ଅଭିନେତ୍ରୀଙ୍କ ମୁହଁରେ ହସ ଫୁଟାଉଥିଲେ ତ କେତେବେଳେ ସିନେ ପରଦାରେ ନିଜେ କାନ୍ଦି ଦର୍ଶକଙ୍କ ଆଖିରେ ଲୁହ ଭରୁଥିଲେ। ନିଜର ନିଆର ଅନ୍ଦାଜ ଏବଂ ଅଭିନୟ ଯାଦୁରେ ସିନେ ପ୍ରେମୀଙ୍କୁ ବାନ୍ଧି ରଖୁଥିଲେ ଉତ୍ତମ ମହାନ୍ତି। ଆଜି ସେ ଆମ ଗହଣରେ ନାହାନ୍ତି ସତ, ହେଲେ ତାଙ୍କୁ ଭଲ ପାଉଥିବା ପ୍ରତ୍ୟେକ ମଣିଷଙ୍କ ହୃଦୟରେ ସବୁ ଦିନ ପାଇଁ ଅମର ରହିବେ ଉତ୍ତମ ମହାନ୍ତି।

କେମିତି ଥିଲା ଓଲିଉଡ ସିନେମା ଜଗତର ପ୍ରଥମ ସୁପରଷ୍ଟାର ଉତ୍ତମ ମହାନ୍ତିଙ୍କ ପିଲାଦିନ, ଅଭିନୟ ଓ ବ୍ୟକ୍ତିଗତ ଜୀବନ, ଆସନ୍ତୁ ଜାଣିବା।

ଶେଷ ହେଲା ଉତ୍ତମଙ୍କ ଯୁଗ

ସତୁରୀ ଦଶକରୁ ଅଭିନୟ କ୍ୟାରିୟର ଆରମ୍ଭ କରିଥିବା ଉତ୍ତମ ମହାନ୍ତି ତିନି ଦଶନ୍ଧି ଧରି ଓଡ଼ିଆ ସିନେମା ଜଗତରେ ନିଜ ପତିଆରା ଜାହିର କରିଥିଲେ। ଅଶୀ ଦଶକରେ ସେ ଥିଲେ ଓଲିଉଡର ଅପ୍ରତିଦ୍ଵନ୍ଦ୍ଵୀ ନାୟକ।

୧୯୭୭ ମସିହାରେ ଓଡ଼ିଆ ଚଳଚ୍ଚିତ୍ର ‘ଅଭିମାନ’ ଜରିଆରେ ଓଲିଉଡ ଜଗତରେ ପାଦ ରଖିଥିଲେ ଉତ୍ତମ ମହାନ୍ତି। କିନ୍ତୁ ଅଶୀ ଦଶକରୁ ଚମକି ଥିଲା ଉତ୍ତମଙ୍କ ଭାଗ୍ୟ। ସୁପରଷ୍ଟାରର ମୋହର ବାଜିଥିଲା ଉତ୍ତମ ମହାନ୍ତିଙ୍କ ନାଁ ଆଗରେ। ଗୋଟିଏ ପରେ ଗୋଟିଏ ହିଟ୍ ସିନେମା ଦେଇଥିଲେ ସିନେ ପ୍ରେମୀଙ୍କୁ। ଉତ୍ତମ ମହାନ୍ତି ୧୩୫ରୁ ଅଧିକ ଓଡ଼ିଆ ଚଳଚ୍ଚିତ୍ର, ୩୦ଟି ବଙ୍ଗଳା ଚଳଚ୍ଚିତ୍ର ଏବଂ ଗୋଟିଏ ହିନ୍ଦୀ ଚଳଚ୍ଚିତ୍ର ‘ନୟା ଜହର’ ରେ ଅଭିନୟ କରିଛନ୍ତି।

ଓଡ଼ିଆ ସିନେମା ଜଗତକୁ ନୂଆ ଦିଗଦର୍ଶନ ଦେବାରେ ତାଙ୍କର ଭୂମିକା ଥିଲା ଅନନ୍ୟ। ତାଙ୍କର ଅଭିନୟ ଶୈଳୀ, ପ୍ରାକୃତିକ ସଂଳାପ ପରିବେଷଣ ଏବଂ ବ୍ୟକ୍ତିତ୍ଵ ଦର୍ଶକଙ୍କ ହୃଦୟରେ ସ୍ଵତନ୍ତ୍ର ସ୍ଥାନ ସୃଷ୍ଟି କରିଥିଲା।

କିପରି ଥିଲା ପିଲାଦିନ?

ଉତ୍ତମ ମହାନ୍ତି ୧୯୫୮ ମସିହା ଡିସେମ୍ବର ୨୩ ତାରିଖରେ ମୟୂରଭଞ୍ଜ ଜିଲ୍ଲା ବାରିପଦାଠାରେ ଜନ୍ମଗ୍ରହଣ କରିଥିଲେ। ଏମ୍‌କେସି ଉଚ୍ଚବିଦ୍ୟାଳୟରୁ ସ୍କୁଲ ପାଠ ସମାପ୍ତ କରି ସେ ମହାରାଜା ପୂର୍ଣ୍ଣଚନ୍ଦ୍ର ମହାବିଦ୍ୟାଳୟରେ ବିଜ୍ଞାନରେ ସ୍ନାତକ କରିଥିଲେ।

ପରେ ସେ ଚାଟାର୍ଡ ​​ଆକାଉଣ୍ଟ ପଢ଼ିବା ପାଇଁ ଲୁଧିଆନା ଏବଂ ପରେ କୋଲକାତା ଚାଲିଯାଇଥିଲେ। କିନ୍ତୁ ଅଭିନୟ ନିଶା ତାଙ୍କୁ ଓଡ଼ିଶାକୁ ଟାଣି ଆଣିଥିଲା। କୋଲକାତାରେ ପାଠପଢ଼ା ସମୟରେ, ସେ ଥିଏଟର ସହ ଯୋଡ଼ି ହୋଇଥିଲେ। ପରେ ସେ ଓଡ଼ିଶା ଫେରିଥିଲେ।

କେମିତି ସିନେମାର ନାୟକ ହେଲେ ଉତ୍ତମ ମହାନ୍ତି?

ଉତ୍ତମ ମହାନ୍ତିଙ୍କ ଚଳଚ୍ଚିତ୍ର ଯାତ୍ରା ୧୯୭୭ ମସିହାରୁ ଆରମ୍ଭ ହୋଇଥିଲା। ସାଧୁ ମେହରଙ୍କ ନିର୍ଦ୍ଦେଶିତ ଚଳଚ୍ଚିତ୍ର ‘ଅଭିମାନ’ ରୁ ଆରମ୍ଭ ହୋଇଥିଲା ଉତ୍ତମଙ୍କ ସିନେମା କ୍ୟାରିୟର। ସିନେମାଟିରେ ମୁଖ୍ୟ ଚରିତ୍ରରେ ଅଭିନୟ କରିବାର ସୁଯୋଗ ପାଇଥିଲେ ସେ। ସିନେମାଟି ସୁପରହିଟ୍ ହେବା ପରେ ରାତାରାତି ସୁପରଷ୍ଟାର ପାଲଟିଥିଲେ ଉତ୍ତମ ମହାନ୍ତି।

ଏହା ପରେ ସେ ଆଉ ପଛକୁ ଫେରି ଚାହିଁ ନାହାନ୍ତି। ଗୋଟିଏ ପରେ ଗୋଟିଏ ହିଟ୍ ସିନେମା ଦେଇଚାଲିଲେ ଓଲିଉଡ ଇଣ୍ଡଷ୍ଟ୍ରିକୁ। ତାଙ୍କ ଅଭିନିତ ହିଟ୍ ଚଳଚ୍ଚିତ୍ରଗୁଡ଼ିକ ମଧ୍ୟରେ ରହିଛି ‘ପତି-ପତ୍ନୀ’, ‘ନିଝୁମ ରାତିର ସାଥୀ’, ‘ରାମାୟଣ’, ‘ରାମ ବଳରାମ’, ‘ଅକ୍ଷୟ ତୃତୀୟା’, ‘ଅଭିଳାଷ’, ‘ଜୟ ଫୁଲ’, ‘ଦଣ୍ଡା ବାଳୁଙ୍ଗା’, ‘ପଞ୍ଚୁ ପାଣ୍ଡବ’ ଏବଂ ‘ଟୋପେ ସିନ୍ଦୂର ଦି ଟୋପା ଲୁହ’ ଆଦି।

ରୋମାଣ୍ଟିକ ହିରୋ ଥିଲେ ଉତ୍ତମ

ଉତ୍ତମ ମହାନ୍ତି ଜଣେ ରୋମାଣ୍ଟିକ ନାୟକ ଭାବେ ଓଡ଼ିଆ ସିନେ ଜଗତରେ ବେଶ ପରିଚିତ। କିନ୍ତୁ ପରେ ସେ କେବଳ ରୋମାଣ୍ଟିକ୍ ଟ୍ୟାଗରେ ସୀମିତ ହୋଇ ରହିବାକୁ ଚାହିଁଲେ ନାହିଁ। ବିଭିନ୍ନ ଚରିତ୍ରରେ ନିଜ ଅଭିନୟର ଯାଦୁ ଦେଖାଇଥିଲେ। ଆକର୍ଷଣୀୟ ଚେହେରା ସାଙ୍ଗକୁ ଦମଦାର ବ୍ୟକ୍ତିତ୍ଵ, ଅଭିନୟ ଦକ୍ଷତା, ନୃତ୍ୟ ଓ ଆକ୍ସନ୍ ସବୁଥିରେ ପରଫେକ୍ଟ ଥିଲେ ସେ।

ଆଜି ବି ସିନେମା ପରଦାରେ ଉତ୍ତମ ମହାନ୍ତି ଓ ଅପରାଜିତା, ମହାଶ୍ୱେତା ରାୟ, ତନ୍ଦ୍ରା ରାୟ, ସୁଜାତା ଆନନ୍ଦ, ଦୀପା ସାହୁ ଏବଂ ରଚନା ବାନାର୍ଜୀଙ୍କ ଯୋଡ଼ିକୁ ପସନ୍ଦ କରନ୍ତି ତାଙ୍କ ପ୍ରଶଂସକ।

ତାଙ୍କର ଲୋକପ୍ରିୟତା ଏତେ ଅଧିକ ଥିଲା, ଯେ ୧୯୮୦ ଏବଂ ୧୯୯୦ ଦଶକରେ ଅଧିକାଂଶ ଚଳଚ୍ଚିତ୍ରରେ ଉତ୍ତମ ମହାନ୍ତି ମୁଖ୍ୟ ଚରିତ୍ରରେ ନଜର ଆସୁଥିଲେ।

୧୯୯୫ ମସିହା ପରେ ଓଡ଼ିଆ ଚଳଚ୍ଚିତ୍ର ‘ଯଶୋଦା’, ‘ସୁଭଦ୍ରା’, ‘କଳାମଣିକ’ ଆଦିରେ ଉତ୍ତମ ମହାନ୍ତି ପ୍ରମୁଖ ଭୂମିକାରେ ଅଭିନୟ କରି ଦର୍ଶକଙ୍କୁ ମନୋରଞ୍ଜନର ଖୋରାକ ଯୋଗାଇଥିଲେ। ପରେ ସେ ଟେଲିଭିଜନ ଜଗତକୁ ପ୍ରବେଶ କରିଥିଲେ। ‘ଯେ ପକ୍ଷୀ ଉଡ଼େ ଯେତେ ଦୂର’, ‘ସାରା ଆକାଶ’, ‘ପଣତକାନି’ ଏବଂ ‘ଉତ୍ତରଦାୟୀ’ ଭଳି ଓଡ଼ିଆ ଧାରାବାହିକରେ ନିଜର ଅଭିନୟରେ ଦର୍ଶକଙ୍କୁ ବାନ୍ଧି ରଖିଥିଲେ।

ସେ ହିନ୍ଦୀ ଧାରାବାହିକ ‘ପଲାଶ’ ଏବଂ ବଙ୍ଗଳା ଧାରାବାହିକ ‘ବିଦେଶିନୀ ବହୁ’ ସମେତ ଅନେକ ହିନ୍ଦୀ ଓ ବଙ୍ଗଳା ଧାରାବାହିକରେ ଅଭିନୟ କରିଛନ୍ତି।

ବ୍ୟକ୍ତିଗତ ଜୀବନ ଏବଂ ବିବାହ

୧୯୮୭ ମସିହା ମେ’ ମାସ ୧୭ ତାରିକରେ ଉତ୍ତମ ମହାନ୍ତି ଓଡ଼ିଆ ଚଳଚ୍ଚିତ୍ର ଜଗତର ଲୋକପ୍ରିୟ ଅଭିନେତ୍ରୀ ଅପରାଜିତାଙ୍କୁ ବିବାହ କରିଥିଲେ। ୧୯୮୯ ମସିହା ଜୁଲାଇ ୩୦ ତାରିଖରେ ଉଭୟଙ୍କ କୋଳକୁ ଆସିଥିଲେ ପୁଅ ବାବୁଶାନ୍ ମହାନ୍ତି। ବାପା’ ମାଙ୍କ ପରି ବାବୁଶାନ୍ ମଧ୍ୟ ଓଲିଉଡ଼ ଇଣ୍ଡଷ୍ଟ୍ରିରେ ଜଣେ ସଫଳ ଅଭିନେତା। ଉତ୍ତମ ମହାନ୍ତି ଓ ତାଙ୍କ ପରିବାର ସବୁବେଳେ ସରଳ ଜୀବନଯାପନ କରିବାକୁ ପସନ୍ଦ କରନ୍ତି।

ପୁରସ୍କାର ଏବଂ ସମ୍ମାନ

କଳା କ୍ଷେତ୍ରକୁ ବେଶଷ ଅବଦାନ ପାଇଁ ଉତ୍ତମ ମହାନ୍ତିଙ୍କୁ ବିଭିନ୍ନ ପୁରସ୍କାର ଓ ସମ୍ମାନ ମିଳିଛି। ତାଙ୍କୁ ଓଡ଼ିଶା ଲିଭିଙ୍ଗ ଲିଜେଣ୍ଡ ପୁରସ୍କାର, ୧୯୯୯ ମସିହାରେ ଜୟଦେବ ପୁରସ୍କାର, ଶ୍ରେଷ୍ଠ ଅଭିନେତା ଭାବେ ୩ଟି ଓ ସହ ଅଭିନେତା ଭାବରେ ଗୋଟିଏ ରାଜ୍ୟ ଚଳଚ୍ଚିତ୍ର ପୁରସ୍କାର ମିଳିଛି। ସେ ୧୯୯୧ ମସିହାରେ ମୁକ୍ତିଲାଭ କରିଥିବା ଓଡ଼ିଆ ଚଳଚ୍ଚିତ୍ର ‘ତୋ ବିନୁ ଅନ୍ୟଗତି ନାହିଁ’ ପାଇଁ ସହ-ଅଭିନେତା ଭାବରେ ରାଜ୍ୟ ଚଳଚ୍ଚିତ୍ର ପୁରସ୍କାର ପାଇଛନ୍ତି। 

୧୯୮୨ ମସିହାରେ ମୁକ୍ତିଲାଭ କରିଥିବା ସିନେମା ‘ଫୁଲ ଚନ୍ଦନ’, ୧୯୮୩ ମସିହାରେ ‘ଝିଅଟି ସୀତା ପରି’ ଓ ୧୯୮୪ରେ ମୁକ୍ତିଲାଭ କରିଥିବା ସିନେମା ‘ଦଣ୍ଡା ବାଳୁଙ୍ଗା’ ପାଇଁ ଶ୍ରେଷ୍ଠ ଅଭିନେତା ଭାବେ ୩ଟି ରାଜ୍ୟ ଚଳଚ୍ଚିତ୍ର ପୁରସ୍କାର ପ୍ରାପ୍ତ କରିଛନ୍ତି ଉତ୍ତମ ମହାନ୍ତି। ୨୦୦୬ ମସିହା ଇନ୍ଦିରା ଗାନ୍ଧୀ ପ୍ରିୟଦର୍ଶିନୀ ପୁରସ୍କାର ଓ ୨୦୦୮ ମସିହାରେ ଶ୍ରେଷ୍ଠ ଅଭିନେତା ପାଇଁ ଫିଟଫାଟ ବାଇସ୍କୋପ ପୁରସ୍କାର ମଧ୍ୟ ପାଇଛନ୍ତି ଉତ୍ତମ ମହାନ୍ତି।

Tags: #UttamMohanty #OdiaActor #OdiaCinema #OllywoodIndustry #LifeJourney #Odisha #Bhubaneswar