ଓଡ଼ିଶାଲାଇଭ୍ ବ୍ୟୁରୋ
ରାସନ କାର୍ଡରୁ ବାଦ ପଡ଼ିଥିବା ହିତାଧିକାରୀଙ୍କ ପାଇଁ ଖୁସି ଖବର। ରାସନ କାର୍ଡ ଆବେଦନ ପାଇଁ ମାର୍ଚ୍ଚ ୧ ତାରିଖରୁ ଖୋଲିଲା ପୋର୍ଟାଲ। ନୂଆ ରାସନ କାର୍ଡରୁ ବାଦ ପଡ଼ିଥିବା ହିତାଧିକାରୀ ଏବେଠୁ କରିପାରିବେ ଆବେଦନ।
ନୂଆ ରାସନ କାର୍ଡ ପାଇଁ ମାର୍ଚ୍ଚ ୧ ତାରିଖରୁ ଆବେଦନ ପ୍ରକ୍ରିୟା ଆରମ୍ଭ ହୋଇ ମାର୍ଚ୍ଚ ୩୧ ତାରିଖ ସୁଦ୍ଧା ସମସ୍ତ କାର୍ଯ୍ୟ ଶେଷ ହେବ। ଏ ନେଇ ସୂଚନା ଦେଇଛନ୍ତି ଖାଦ୍ୟ ଯୋଗାଣ ଏବଂ ଖାଉଟି କଲ୍ୟାଣ ବିଭାଗ ମନ୍ତ୍ରୀ କୃଷ୍ଣ ଚନ୍ଦ୍ର ପାତ୍ର।
ମନ୍ତ୍ରୀଙ୍କ ସୂଚନା ଅନୁସାରେ ନୂଆ ରାସନ କାର୍ଡରୁ ବାଦ୍ ପଡ଼ିଥିବା ହିତାଧିକାରୀଙ୍କ ପାଇଁ ଏହି ପୋର୍ଟାଲ ଖୋଲାଯାଉଛି। ଯେଉଁ ଯୋଗ୍ୟ ହିତାଧିକାରୀ ଖାଦ୍ୟ ସୁରକ୍ଷା ଯୋଜନାରେ ସାମିଲ ହୋଇନାହାନ୍ତି ସେମାନେ ଏଥିରେ ଆବେଦନ କରିପାରିବେ।
“ଇ-କେୱାଇସି ଯାଞ୍ଚ ମାଧ୍ୟମରେ ତାଲିକାରୁ ମୋଟ ଚାରି ଲକ୍ଷ ବ୍ୟକ୍ତିଙ୍କୁ ବାଦ ଦିଆଯାଇଛି। ସେହିପରି କିଛି ଚାକିରିଆମାନେ ସେମାନଙ୍କ ରାସନ କାର୍ଡ ମଧ୍ୟ ଫେରାଇ ଦେଇଛନ୍ତି। ଆୟକର ଦେଉଥିବା ବ୍ୟକ୍ତିମାନଙ୍କର ତାଲିକା ଆସି ସାରିଛି। ସେଗୁଡ଼ିକର ଭେରିଫିକେସନ କରାଯାଇ ଅଧିକ ଆୟ ଥିଲେ ରାସନ କାର୍ଡ କଟିବ”, କହିଛନ୍ତି ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର।
କେମିତି କରିବେ ଆବେଦନ?
- ନୂତନ ରାସନକାର୍ଡ ପାଇଁ ଆବେଦନ କରିବାକୁ ପ୍ରଥମେ www.foododisha.in ୱେବସାଇଟକୁ ଯାଆନ୍ତୁ
- ଏହା ପରେ ସେଠାରେ ଥିବା ଅନଲାଇନ ସର୍ଭିସ କାଟାଗୋରିକୁ ଯାଇ ସିଟିଜେନ ସର୍ଭିସ ସବକାଟାଗୋରିକୁ ସିଲେକ୍ଟ କରନ୍ତୁ
- ସେଠାରେ ନିୟୁ କାର୍ଡ ଆପ୍ଲାଏ ଅପସନରେ କ୍ଲିକ କରନ୍ତୁ
- ମାଗିଥିବା ତଥ୍ୟ ଅନୁସାରେ ଫର୍ମଟିକୁ ସଠିକ୍ ଭାବେ ପୂରଣ କରନ୍ତୁ ଓ ସେଭ ଅପସନ ଉପରେ କ୍ଲିକ କରନ୍ତୁ
- ସମ୍ପୂର୍ଣ୍ଣ ତଥ୍ୟକୁ ଆଉ ଥରେ ଯାଞ୍ଚ କରିବା ପରେ ନୂଆ ରାସନକାର୍ଡ ଆବେଦନର ପ୍ରକ୍ରିୟା ଶେଷ କରନ୍ତୁ
Tags: #RationCard #NewRationCardApplication #RationPortal #FoodOdisha #OdishaGovt #Odisha
