ଓଡ଼ିଶାଲାଇଭ୍ ବ୍ୟୁରୋ
ଛତିଶଗଡ଼ରେ ଜାରି ରହିଛି ମାଓବାଦୀ ନିପାତ ଅଭିଯାନ। ସୁରକ୍ଷା କର୍ମୀଙ୍କ ଗୁଳିରେ ଗଡ଼ୁଛି ଗୋଟିଏ ପରେ ଗୋଟିଏ ମାଓବାଦୀଙ୍କ ମୁଣ୍ଡ। ଦନ୍ତେଓ୍ଵାଡା ଓ ବିଜାପୁର ସୀମାରେ ସୁରକ୍ଷା କର୍ମୀଙ୍କ ଗୁଳିରେ ସୋମବାର ଦିନ ଜଣେ ମହିଳା ମାଓବାଦୀ ନିହତ ହୋଇଛନ୍ତି। ମାଓବାଦୀ ଓ ସୁରକ୍ଷା କର୍ମୀଙ୍କ ମଧ୍ୟରେ ଗୁଳି ବିନିମୟ ଜାରି ରହିଛି। ଗତକାଲି ତିନିଜଣ ମାଓବାଦୀ ପ୍ରାଣ ହରାଇଥିଲେ।
ବିପୁଳ ପରିମାର ମାରଣାସ୍ତ୍ର ଜବତ କରାଯାଇଥିବାବେଳେ ଏନକାଉଣ୍ଟର ଭୟରେ ଆତ୍ମସମର୍ପଣ କରୁଛନ୍ତି ଏକାଧିକ ମାଓବାଦୀ। ନିକଟରେ ୫୦ ଜଣ ମାଓବାଦୀ ବିଜାପୁର ଏସପିଙ୍କ ନିକଟରେ ଆତ୍ମସମର୍ପଣ କରିଥିଲେ।
ମାର୍ଚ୍ଚ ୨୯ ତାରିଖରେ ଏକା ସାଙ୍ଗରେ ସୁରକ୍ଷା କର୍ମୀଙ୍କ ଗୁଳିରେ ନିହତ ହୋଇଥିଲେ ୧୬ ଜଣ ମାଓବାଦୀ। ଏହି ଘଟଣା ଘଟିଥିଲା ସୁକମା ଜିଲ୍ଲାରେ।
ଏହା ପୂର୍ବରୁ ଦନ୍ତେଓ୍ଵାଡା ଜଙ୍ଗଲରେ ପୋଲିସ-ମାଓବାଦୀ ଗୁଳି ବିନିମୟରେ ୩ ଜଣ ମାଓବାଦୀ ନିହତ ହୋଥିଲେ। ସେହିପରି ମାର୍ଚ୍ଚ ୨୦ ତାରିଖରେ ୧୮ ଜଣ ମଓବାଦୀଙ୍କୁ ମାରିବାରେ ସଫଳ ହୋଇଥିଲେ ସୁରକ୍ଷା କର୍ମୀ।
ଚଳିତ ବର୍ଷ ବର୍ତ୍ତମାନ ସୁଦ୍ଧା ୧୦୦ରୁ ଅଧିକ ମାଓବାଦୀ ନିହତ ହୋଇଛନ୍ତି। ଛତିଶଗଡ଼ର ଗରିଆବନ୍ଧ ଜଙ୍ଗଲରେ ଗତ ଜାନୁଆରି ୩ ତାରିଖରେ ୩ ଜଣ ମାଓବାଦୀ ସୁରକ୍ଷା କର୍ମୀଙ୍କ ଗୁଳିରେ ପ୍ରାଣ ହରାଇଥିଲେ।
ସେହିପରି ଜାନୁଆରି ୧୭ ତାରିଖରେ ବିଜାପୁରରେ ପୋଲିସ ଗୁଳିରେ ନିହତ ହୋଇଥିଲେ ୧୨ ଜଣ ମାଓବାଦୀ। ଜାନୁଆରି ୨୧ ତାରିଖରେ ୧୪ ଜଣ ମାଓବାଦୀଙ୍କର ମୃତ୍ୟୁ ହୋଇଥିବାବେଳେ ଫେବ୍ରୁଆରି ୧ ତାରିଖରେ ସୁରକ୍ଷା କର୍ମୀଙ୍କ ଗୁଳିରେ ପ୍ରାଣ ହରାଇଥିଲେ ଆଉ ୮ ଜଣ ମାଓବାଦୀ।
ସେହିପରି ନାରାଜୟଣପୁର ଜଙ୍ଗଲରେ ଜଣେ ମାଓବାଦୀ ପୋଲିସ ଗୁଳିରେ ପ୍ରାଣ ହରାଇଥିବାବେଳେ ବିଜାପୁର ଜଙ୍ଗଲରେ ଫେବ୍ରୁଆରି ୧୦ ତାରିଖରେ ହୋଇଥିବା ପୋଲିସ ଓ ମାଓବାଦୀଙ୍କ ଗୁଳି ବିନିମୟରେ ୩୧ ଜଣ ମାଓବାଦୀ ନିହତ ହୋଇଥିଲେ। ଏହି ସମୟରେ ଦୁଇ ଜଣ ଯବାନ ସହିଦ ହୋଇଥିଲେ।
ଯେଉଁଠି ମାଓବାଦୀଙ୍କ ଆଡ୍ଡା ଥିବା ଖବର ଆସୁଛି ସେଠି ପଶି ଆଖି ବୁଜା ଗୁଳି ଚଳାଉଛନ୍ତି ସୁରକ୍ଷା କର୍ମୀ। ଗୋଟିଏ ଲକ୍ଷ୍ୟ, ମୂଳରୁ ସଫା ହେବେ ମାଓବାଦୀ।
Tags: #PoliceMaoistEncounter #Maoists #Sukma #Chhattisgarh
