ଓଡ଼ିଶାଲାଇଭ୍ ବ୍ୟୁରୋ
ଝାରସୁଗୁଡ଼ା ଜିଲ୍ଲା ବେଲପାହାଡ଼ରେ ଏକ ଟ୍ରକ ସହିତ ପୋଲିସ୍ ଭ୍ୟାନ ଦୁର୍ଘଟଣାଗ୍ରସ୍ତ ହୋଇଛି। ଫଳରେ ଭ୍ୟାନରେ ଥିବା ଯବାନଙ୍କ ମଧ୍ୟରୁ ୨ଜଣଙ୍କର ମୃତ୍ୟୁ ଘଟିଛି। ଏହି ଦୁଇ ଯବାନ ହେଲେ ପ୍ରଶାନ୍ତ ବେହେରା, ଶଙ୍କର ପ୍ରସାଦ ପନ୍ଥ।
ଦୁର୍ଘଟଣାରେ ୨୯ଜଣ ଯବାନ ଆହତ ହୋଇଥିଲାବେଳେ ୨୨ ଜଣ ଗୁରୁତର ଅଛନ୍ତି। ଗୁରୁତରଙ୍କୁ ବୁର୍ଲା ମେଡିକାଲରେ ଭର୍ତ୍ତି କରାଯାଇଛି।
ଭ୍ୟାନରେ ଥିବା ଯବାନ ଝାରସୁଗୁଡ଼ା ଓଏସ୍ଏପି ସେକେଣ୍ଡ ବାଟାଲିଅନର ଥିଲେ। ତେବେ ବନହରପାଲିରେ ଆଜି ମୁଖ୍ୟମନ୍ତ୍ରୀଙ୍କ କାର୍ଯ୍ୟକ୍ରମ ରହିଥିଲା। ମୁଖ୍ୟମନ୍ତ୍ରୀଙ୍କ କାର୍ଯ୍ୟକ୍ରମକୁ ସମସ୍ତ ଯବାନ ଯାଉଥିଲେ।
ଅନ୍ୟପକ୍ଷରେ ଯବାନଙ୍କ ଦୁର୍ଘଟଣା ଖବର ଶୁଣି ଦୁଃଖ ପ୍ରକାଶ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ଦୁର୍ଘଟଣାରେ ପ୍ରାଣ ହରାଇଥିବା ଯବାନଙ୍କ ପରିବାରକୁ ୫ ଲକ୍ଷ ଟଙ୍କା ଦେବାକୁ ମୁଖ୍ୟମନ୍ତ୍ରୀ ଘୋଷଣା କରିଛନ୍ତି। ପରିବାର ଜଣକୁ ଚାକିରି ଦେବାକୁ ମଧ୍ୟ ଘୋଷଣା ହୋଇଛି।