ଓଡ଼ିଶାଲାଇଭ୍ ବ୍ୟୁରୋ
ରାଜ୍ୟରେ ଶୀତ ପ୍ରକୋପ ବଢ଼ିଛି। ପ୍ରବଳ ଜାଡ଼ ମାଡ଼ରେ ଥରୁଛି ସାରା ଓଡ଼ିଶା। ଆସନ୍ତା ୨ ଦିନ ପର୍ଯ୍ୟନ୍ତ ରାଜ୍ୟରେ ଏହିଭଳି ଶୀତର ପ୍ରକୋପ ଜାରି ରହିବ ବୋଲି ପାଣିପାଗ ବିଭାଗ ଆକଳନ କରିଛି। ଏଥିସହ କିଛି ସ୍ଥାନରେ ଘନକୁହୁଡ଼ି ହେବାର ଆଶଙ୍କା ଥିବାରୁ ୫ ଜିଲ୍ଲାକୁ ୟେଲୋ ଓ୍ଵାର୍ଣ୍ଣିଂ ଜାରି କରି ବିଭାଗ ପକ୍ଷରୁ ସତର୍କ କରାଯାଇଛି।
ୟେଲୋ ଓ୍ଵାର୍ଣ୍ଣିଂ ଜାରି ହୋଇଥିବା ଜିଲ୍ଲାଗୁଡ଼ିକ ହେଲା – ବଲାଙ୍ଗିର, କନ୍ଦମାଳ, କଳାହାଣ୍ଡି, ନବରଙ୍ଗପୁର ଏବଂ କୋରାପୁଟ। ଆଗାମୀ ୨୪ ଘଣ୍ଟା ମଧ୍ୟରେ ଏହିସବୁ ଜିଲ୍ଲାରେ ଘନକୁହୁଡ଼ି ପଡ଼ିବ। କୁହୁଡ଼ି ପାଇଁ ୫୦ରୁ ୨୦୦ ମିଟର ପର୍ଯ୍ୟନ୍ତ ଭଲଭାବେ କିଛି ଦେଖାଯିବ ନାହିଁ।
#Warning for Day-1
Day-2 To Day-5: No Warning pic.twitter.com/jwR0NgHZ7x— Meteorological Centre, Bhubaneswar (@mcbbsr) January 19, 2022
ପାଣିପାଗ ବିଭାଗ ପକ୍ଷରୁ ମିଳିଥିବା ତଥ୍ୟ ଅନୁସାରେ ଗତ ୨୪ ଘଣ୍ଟା ମଧ୍ୟରେ ଦାରିଙ୍ଗବାଡ଼ି ସର୍ବନିମ୍ନ ୮.୫ ଡିଗ୍ରୀ ସେଲିସିୟସ୍ ତାପମାତ୍ରା ସହ ରାଜ୍ୟର ସବୁଠାରୁ ଥଣ୍ଡା ସ୍ଥାନ ରହିଛି। ସେହିପରି କେନ୍ଦୁଝରର କିରେଇ ୯ ଡିଗ୍ରୀ ସେଲସିୟସ୍ ତାପମାତ୍ରା ସହ ଦ୍ଵିତୀୟ ସର୍ବାଧିକ ଥଣ୍ଡା ସ୍ଥାନ ରହିଛି।
ଟୁଇନ୍ ସିଟି କଟକ-ଭୁବନେଶ୍ଵରରେ ମଧ୍ୟ ପ୍ରବଳ ଶୀତ ଅନୁଭୂତ ହେଉଛି। ଗତ ୨୪ ଘଣ୍ଟାରେ ଏହି ଦୁଇ ସହରରେ ୧୩ ଡିଗ୍ରୀ ସେଲସିୟସ୍ ତାପମାତ୍ରା ରହିଛି।
ରାଜ୍ୟର ସବୁଆଡ଼େ ଏବେ ପ୍ରବଳ ଶୀତ ଅନୁଭୂତ ହେଉଥିବା ବେଳେ ଆଗାମୀ ୨ ଦିନ ପର୍ଯ୍ୟନ୍ତ ବିଶେଷ ତାପମାତ୍ରା କମିବାର ସମ୍ଭାବନା ନାହିଁ। କିନ୍ତୁ ୨ ଦିନ ପରେ ପଶ୍ଚିମା ଝଡ଼ ପ୍ରଭାବରେ ରାଜ୍ୟରେ ତାପମାତ୍ରା ପାଖାପାଖି ୩ରୁ ୪ ଡିଗ୍ରୀ ପର୍ଯ୍ୟନ୍ତ ବଢ଼ିବ ଓ ଶୀତ କମିଯିବ ବୋଲି ପାଣିପାଗ ବିଭାଗ ପକ୍ଷରୁ କୁହାଯାଇଛି।
