ସେଞ୍ଚୁରିଅନ ବିଶ୍ୱବିଦ୍ୟାଳୟର ସ୍କୁଲ୍ ଅଫ୍ ଫିସେରିର ବି.ଏଫ.ଏସସି ପାଠ୍ୟକ୍ରମକୁ ଆଇସିଏଆର ମାନ୍ୟତା

ଓଡ଼ିଶାଲାଇଭ୍ ବ୍ୟୁରୋ

ସେଞ୍ଚୁରିଅନ ବିଶ୍ୱବିଦ୍ୟାଳୟର ସ୍କୁଲ୍ ଅଫ୍ ଫିସେରିର ମତ୍ସ୍ୟ ବିଜ୍ଞାନ ପାଠ୍ୟକ୍ରମକୁ (ବି.ଏଫ.ଏସସି) ଭାରତୀୟ କୃଷି ଅନୁସନ୍ଧାନ ପରିଷଦରୁ (ଆଇସିଏଆର) ମାନ୍ୟତା ମିଳିଛି। ମତ୍ସ୍ୟ ବିଜ୍ଞାନରେ ଶିକ୍ଷା ଏବଂ ଅନୁସନ୍ଧାନ କ୍ଷେତ୍ରରେ ଉତ୍କର୍ଷତା ପାଇଁ ଆଇସିଏଆର ପକ୍ଷରୁ ଏହାକୁ ଅନୁମୋଦନ କରାଯାଇଛି।

“ଆମ ବିଶ୍ୱବିଦ୍ୟାଳୟର ବି.ଏଫ.ଏସସି ପାଠ୍ୟକ୍ରମକୁ ଆଇସିଏଆର ମାନ୍ୟତା ପାଇଁ ଆମେ ଅତ୍ୟନ୍ତ ଆନନ୍ଦିତ। ଏହା ମତ୍ସ୍ୟ ବିଜ୍ଞାନ କ୍ଷେତ୍ରରେ ବିଶ୍ଵବିଦ୍ୟାଳୟକୁ ଏକ ଅଗ୍ରଣୀ ଅନୁଷ୍ଠାନ ଭାବରେ ସ୍ୱୀକୃତି ପ୍ରଦାନ କରୁଛି। ଆମେ ଆଗକୁ ମଧ୍ୟ ଛାତ୍ରଛାତ୍ରୀଙ୍କୁ ମତ୍ସ୍ୟ ଚାଷର ଉତ୍ତମ ତାଲିମ ଦେବା ସହ ସ୍ଥାନୀୟ ଅଞ୍ଚଳରେ ଏହାର ପ୍ରସାର କରିବୁ”, କହିଛନ୍ତି ସେଞ୍ଚୁରିଅନ ବିଶ୍ୱବିଦ୍ୟାଳୟର ଉପାଧ୍ୟକ୍ଷ ପ୍ରଫେସର ଡି ଏନ ରାଓ।

ସେଞ୍ଚୁରିଅନ ବିଶ୍ୱବିଦ୍ୟାଳୟର ପାରାଲାଖେମୁଣ୍ଡି କ୍ୟାମ୍ପସରେ ସ୍କୁଲ୍ ଅଫ୍ ଫିସେରି ରହିଛି। ଏଠାରେ ଦିଆଯାଉଥିବା ବି.ଏଫ.ଏସସି ଡିଗ୍ରୀ ପାଠ୍ୟକ୍ରମରେ ମତ୍ସ୍ୟ ଚାଷ ଓ ପରିଚାଳନା କ୍ଷେତ୍ରରେ ଆବଶ୍ୟକୀୟ ଜ୍ଞାନ ଏବଂ କୌଶଳ ପ୍ରଦାନ କରାଯାଇଥାଏ।

ଏହି ପାଠ୍ୟକ୍ରମରେ ମତ୍ସ୍ୟ ଓ ଜଳଚର ଉତ୍ସ ପରିଚାଳନା, ମତ୍ସ୍ୟ ପ୍ରକ୍ରିୟାକରଣ, ଜଳ ପରିବେଶ ପରିଚାଳନା, ମତ୍ସ୍ୟ ଇଞ୍ଜିନିୟରିଂ, ଜଳଚର ପ୍ରାଣୀ ସ୍ୱାସ୍ଥ୍ୟ ପରିଚାଳନା, ମତ୍ସ୍ୟ ସମ୍ପ୍ରସାରଣ, ଅର୍ଥନୀତି ଏବଂ ପରିସଂଖ୍ୟାନ ଭଳି ବିଭିନ୍ନ ବିଷୟ ଅନ୍ତର୍ଭୁକ୍ତ।

ସ୍କୁଲ୍ ଅଫ୍ ଫିସେରିରେ ଥିବା ଆକ୍ୱାକଲଚର ରିସର୍ଚ୍ଚ ଫାର୍ମରେ ଛାତ୍ରଛାତ୍ରୀମାନେ ଆଭ୍ୟାସ ଭିତ୍ତିକ ଅଭିଜ୍ଞତା ପାଇଥାନ୍ତି। ଏଠାରେ ୨୨ଟି ମାଛ ପୋଖରୀର ବ୍ୟବସ୍ଥା କରାଯାଇଛି, ଯେଉଁଥିରେ ସମନ୍ୱିତ ଚାଷ ପ୍ରଣାଳୀ, ମୋତି ଚାଷ, କେଜ୍ ଚାଷ ଏବଂ ଅଳଙ୍କାର ମାଛ ଚାଷ ପାଇଁ ସୁବିଧା ରହିଛି।

Tags: #CenturionUniversity #SchoolofFisheries #BFScCourse #FishFarming #Odisha