ଓଡ଼ିଶାଲାଇଭ୍ ବ୍ୟୁରୋ
ହଷ୍ଟେଲ କ୍ୟାମ୍ପସ ଭିତରେ ଜଣେ ନେପାଳୀ ଛାତ୍ରୀଙ୍କର ସନ୍ଦେହଜନକ ମୃତ୍ୟୁକୁ ନେଇ କିଟ୍ ବିଶ୍ଵବିଦ୍ୟାଳୟ ପରିସରରେ ଲାଗି ରହିଛି ଉତ୍ତେଜନା। ମୃତ ଛାତ୍ରୀ ହେଉଛନ୍ତି ବିଟେକ୍ ତୃତୀୟ ବର୍ଷର ପ୍ରକୃତି ଲମସାଲ।
ଛାତ୍ରୀଙ୍କ ମୃତ୍ୟୁକୁ ନେଇ ଅନ୍ୟ ନେପାଳର ଛାତ୍ରଛାତ୍ରୀମାନେ ବିଶ୍ଵବିଦ୍ୟାଳୟ ପରିସରରେ ଭଙ୍ଗାରୁଜା କରିବା ସହ ବିକ୍ଷୋଭ ପ୍ରଦର୍ଶନ କରିଥିଲେ। ଉତ୍ତ୍ୟକ୍ତ ଛାତ୍ରଛାତ୍ରୀମାନେର କ୍ୟାମ୍ପସ ସମ୍ମୁଖରେ ରାସ୍ତା ଅବରୋଧ କରି ବିରୋଧ ପ୍ରଦର୍ଶନ କରିଥିଲେ। ପରେ ପୋଲିସ ଘଟଣାସ୍ଥଳରେ ପହଞ୍ଚି ପରିସ୍ଥିତିକୁ ନିୟନ୍ତ୍ରଣ କରିଥିଲା। ଛାତ୍ରୀଙ୍କ ସନ୍ଦେହଜନକ ମୃତ୍ୟୁକୁ ନେଇ ପୋଲିସ ଜଣକୁ ଗିରଫ କରିଛି। ଗିରଫ ଅଭିଯୁକ୍ତ ହେଉଛନ୍ତି ମେକାନିକାଲ ଇଞ୍ଜିନିୟରିଂ ଛାତ୍ର ଅଭିକ ଶ୍ରୀବାସ୍ତବ।
ତେବେ ଏତିକିରେ ଏହି ଘଟଣା ଶେଷ ହୋଇନଥିଲା। କିଟ୍ ହସେଷ୍ଟଲରେ ରହୁଥିବା ସମସ୍ତ ନେପାଳର ଛାତ୍ରଛାତ୍ରୀଙ୍କୁ ତୁରନ୍ତ ହଷ୍ଟେଲ ଖାଲି କରିବାକୁ ନିର୍ଦ୍ଦେଶ ଦିଆଯାଇଥିଲା। ପରେ ସେମାନଙ୍କୁ ଜୋର କରି କଟକ ରେଳ ଷ୍ଟେସନରେ ଛାଡ଼ିବା ସହ ନିଜ ଘରକୁ ଫେରିଯିବା ଲାଗି ବିଶ୍ଵବିଦ୍ୟାଳୟ ପକ୍ଷରୁ ପରାମର୍ଶ ଦିଆଯାଇଥିଲା।
ତେବେ ସହପାଠୀଙ୍କ ମୃତ୍ୟୁକୁ ନେଇ ପ୍ରତିବାଦ କରିବାରୁ ସେମାନଙ୍କୁ ବିଶ୍ଵ ବିଦ୍ୟାଳୟରୁ ବାହାର କରିଦିଆଯାଉଥିବା ନେପାଳ ଛାତ୍ରଛାତ୍ରୀ ଅଭିଯୋଗ କରିଛନ୍ତି। ଛତ୍ରୀ ଜଣଙ୍କୁ ଆତ୍ମହତ୍ୟା କରିବାକୁ ବାଧ୍ୟ କରାଯାଇଥିବା ଭଳି ଅଙ୍ଗୀନ ଅଭିଯୋଗ ଆଣିଛନ୍ତି ସେମାନେ।
ସେମାନେ କହିଛନ୍ତି, ମୃତ ପ୍ରକୃତିଙ୍କ ସହ ସେହି ବିଶ୍ଵବିଦ୍ୟାଳୟର ଛାତ୍ର ଅଭିକଙ୍କର ଗତ ୩ ବର୍ଷ ହେଲା ପ୍ରେମ ସମ୍ପର୍କ ଥିଲା। କିଛି ଦିନ ହେଲା ଉଭୟଙ୍କ ସମ୍ପର୍କ ଭଲ ନଥିଲା। ଅଭିକ ଲଗାତର ପ୍ରକୃତିଙ୍କୁ ମାନସିକ ଏବଂ ଶାରୀରିକ ଭାବେ ନିର୍ଯାତନ ଦେଇଆସୁଥିଲେ। ଏହାକୁ ନେଇ ସମ୍ପୃକ୍ତ ଛାତ୍ରୀ ଜଣକ ଇଣ୍ଟରନ୍ୟାସନାଲ ରିଲେସନ ଅଫିସରଙ୍କୁ ଜଣାଇଥିଲେ।
ଦୁଇ ତିନି ଥର ଏହାକୁ ନେଇ ପ୍ରକୃତି ଅଭିଯୋଗ କରିଥିଲେ ମଧ୍ୟ ବିଶ୍ଵ ବିଦ୍ୟାଳୟ ପକ୍ଷରୁ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନଥିଲା। ସେବେଠାରୁ ସେ ମାନସିକ ଦୁଶ୍ଚିନ୍ତାରେ ରହୁଥିଲେ। ଶେଷରେ ସେ ଆତ୍ମହତ୍ୟା କରିବାକୁ ବାଧ୍ୟ ହୋଇଥିଲେ। ବିଶ୍ଵବିଦ୍ୟାଳୟ ପକ୍ଷରୁ ଏହି ମାମଲାକୁ ଚାପି ଦେବାକୁ ଉଦ୍ୟମ କରାଯାଉଥିବା ନେପାଳ ଛାତ୍ରଛାତ୍ରୀ ଅଭିଯୋଗ କରିଛନ୍ତି।
Tags: #NepalStudentProtest #StudentDeath #KIITUniversity #Odisha #Suicide
