ଓଡ଼ିଶାଲାଇଭ୍ ବ୍ୟୁରୋ
ଓଡ଼ିଶାର ପାରା ବ୍ୟାଡମିଣ୍ଟନ୍ ଖେଳାଳି ପ୍ରମୋଦ ଭଗତଙ୍କୁ କ୍ରୀଡ଼ାରୁ ୧୮ ମାସ ପାଇଁ ନିଲମ୍ବନ କରାଯାଇଛି। ଆଣ୍ଟି-ଡୋପିଂ ନିୟମ ଉଲ୍ଲଂଘନ କରିଥିବାରୁ ତାଙ୍କୁ ବ୍ୟାଡମିଣ୍ଟନ୍ ୱାର୍ଲ୍ଡ ଫେଡେରେସନ୍ (ବିଡବ୍ଲୁଏଫ୍) ବ୍ୟାନ୍ କରିଛି। ସେ ଚଳିତ ବର୍ଷ ପ୍ୟାରିସ ପାରା ଅଲିମ୍ପିକ୍ସରେ ଅଂଶଗ୍ରହଣ କରିପାରିବେ ନାହିଁ।
ପ୍ରମୋଦ ଭଗତ ଗତ ୧୨ ମାସ ମଧ୍ୟରେ ୩ ଥର ଡୋପିଂ ପରୀକ୍ଷାରେ ବିଫଳ ହୋଇଛନ୍ତି। ଚଳିତ ବର୍ଷ ମାର୍ଚ୍ଚ ୧ ତାରିଖରେ କୋର୍ଟ ଅଫ୍ ଆର୍ବିଟ୍ରେସନ୍ ଅଫ୍ ସ୍ପୋର୍ଟ (ସିଏଏସ୍) ତାଙ୍କୁ ଆଣ୍ଟି-ଡୋପିଂ ନିୟମ ଉଲ୍ଲଂଘନ ମାମଲାରେ ଦୋଷୀ ସାବ୍ୟସ୍ତ କରିଥିଲେ।
ପ୍ରମୋଦ ଭଗତ ଏହି ରାୟ ଉପରେ ପୁନର୍ବିଚାର କରିବା ପାଇଁ ସିଏଏସ୍ ଅପିଲ୍ ଡିଭିଜନରେ ଆବେଦନ କରିଥିଲେ। ତେବେ ଜୁଲାଇ ୨୯ ତାରିଖରେ ତାଙ୍କ ଆବେଦନକୁ ଖାରଜ କରାଯାଇଥିଲା।
ଅଗଷ୍ଟ ୧୧ ତାରିଖରେ ପ୍ୟାରିସରେ ଅଲିମ୍ପିକ୍ସ ଶେଷ ହୋଇଛି। ଏବେ ସେଠାରେ ପାରା ଅଲିମ୍ପିକ୍ସ ଅଗଷ୍ଟ ୨୮ରୁ ସେପ୍ଟେମ୍ବର ୮ ତାରିଖ ପର୍ଯ୍ୟନ୍ତ ୧୧ ଦିନ ଧରି ଚାଲିବ। ତେବେ ପ୍ରମୋଦ ଭଗତଙ୍କ ବିରୋଧରେ ଆସିଥିବା ଏହି ରାୟ ଭାରତୀୟ କ୍ରୀଡ଼ା ପ୍ରେମୀଙ୍କୁ ଝଟକା ଦେଇଛି।
ପ୍ରମୋଦ ଭଗତ ଜଣେ ଏସଏଲ୍ ୩ ବର୍ଗର ପାରା ବ୍ୟାଡମିଣ୍ଟନ୍ ଖେଳାଳି। ସେ ୨୦୨୧ରେ ଟୋକିଓ ପାରା ଅଲିମ୍ପିକ୍ସରେ ବ୍ୟାଡମିଣ୍ଟନ୍ ପ୍ରତିଯୋଗିତାର ପୁରୁଷ ଏକକ ବର୍ଗରେ ସ୍ଵର୍ଣ୍ଣ ପଦକ ହାସଲ କରିଥିଲେ।
Tags: #PramodBhagat #ParaBadmintonPlayer #ParaOlympics #Sports #Odisha #India
