ଓଡ଼ିଶାଲାଇଭ୍ ବ୍ୟୁରୋ
ୟୁଏଇରେ ଅନୁଷ୍ଠିତ ହେବାକୁ ଯାଉଛି ବିଶ୍ୱର ସର୍ବବୃହତ୍ ପ୍ରବାସୀ ଓଡ଼ିଆ କ୍ରିକେଟ୍ ଟୁର୍ଣ୍ଣାମେଣ୍ଟ ‘ଓଡ଼ିଶା କପ୍-୨୦୨୪’। ଚଳିତ ବର୍ଷ ଏହି ଟୁର୍ଣ୍ଣାମେଣ୍ଟର ଏକାଦଶ ତମ ସଂସ୍କରଣ ଆୟୋଜିତ ହେବ। ଏନେଇ ଓଡ଼ିଶା କପ୍ ଆୟୋଜକ କମିଟିର ବୈଠକରେ ସ୍ଥିର କରାଯାଇଛି।
ଚଳିତ ବର୍ଷର ଓଡ଼ିଶା କପ୍ ସେପ୍ଟେମ୍ବର ୨୯ ତାରିଖରୁ ଆରମ୍ଭ ହେବ। ଏଥର ଟୁର୍ଣ୍ଣାମେଣ୍ଟରେ ସର୍ବାଧିକ ୧୮ଟି ଦଳ ଅଂଶଗ୍ରହଣ କରିବେ। ସେମାନଙ୍କୁ ୩ଟି ଗ୍ରୁପରେ ବିଭକ୍ତ କରାଯିବ।
ଟୁର୍ଣ୍ଣାମେଣ୍ଟରେ ଦେଶ ବିଦେଶର ଓଡ଼ିଆ ଖେଳାଳି ସାମିଲ ହେବେ। ୟୁଏଇର ଶାରଜାହ, ଉମାଲକ୍ୱେନ ଓ ଫୁଜେରାର ୩ଟି ପ୍ରମୁଖ କ୍ରିକେଟ ଗ୍ରାଉଣ୍ଡରେ ଟୁର୍ଣ୍ଣାମେଣ୍ଟର ମ୍ୟାଚଗୁଡ଼ିକ ଖେଳାଯିବ।
ଏହି ବୈଠକରେ ଓଡ଼ିଶା କପ୍ ସହିତ ଏକ ଦଶନ୍ଧିରୁ ଅଧିକ ସମୟ ଧରି ପ୍ରତ୍ୟକ୍ଷ ଜଡ଼ିତ ହୋଇଥିବା ଖେଳାଳିମାନଙ୍କୁ ସମ୍ମାନିତ କରାଯାଇଥିଲା। ବୈଠକରେ ଓଡ଼ିଶା କପ୍ ଆୟୋଜକ କମିଟିର ରଜତ ରଥ, ସୁଶାନ୍ତ ଜେନା, ନିର୍ଲିପ୍ତ ମହାନ୍ତି ଓ ପ୍ରଦ୍ୟୁମ୍ନ ସାହୁଙ୍କ ସମେତ ଅନ୍ୟ ବରିଷ୍ଠ ସଦସ୍ୟମାନେ ଯୋଗ ଦେଇଥିଲେ।
Tags: #OdishaCup2024 #CricketTournament #OdiaPlayers #Sports #UAE
