ଓଡ଼ିଶାଲାଇଭ୍ ବ୍ୟୁରୋ
ଭଦ୍ରକରେ ନନ୍ଦନକାନନ ଏକ୍ସପ୍ରେସ ଟ୍ରେନ ଉପରକୁ ଗୁଳିମାଡ଼ ହୋଇଛି। ମଙ୍ଗଳବାର ଭଦ୍ରକ ଓ ବାଉଦପୁର ଷ୍ଟେସନ ମଝିରେ ଟ୍ରେନ୍ ଉପରକୁ ଗୁଳିମାଡ଼ ହୋଇଥିବା ସୂଚନା ମିଳିଛି। ୨ ରାଉଣ୍ଡ ଗୁଳିମାଡ଼ରେ ଟ୍ରେନର ଗାର୍ଡ ବଗିର କାଚ ଭାଙ୍ଗିଯାଇଥିବାବେଳେ କେହି ଏଥିରେ ଆହତ ହୋଇନାହାନ୍ତି। ଏନେଇ ରେଳବାଇ ଓ ଜିଆରପି ପକ୍ଷରୁ ତଦନ୍ତ କରାଯାଉଛି।
ମଙ୍ଗଳବାର ଦିଲ୍ଲୀର ଆନନ୍ଦବିହାରରୁ ପୁରୀ ଅଭିମୁଖେ ଆସୁଥିବା ନନ୍ଦନକାନନ ଏକ୍ସପ୍ରେସ ଭଦ୍ରକ ଷ୍ଟେସନରୁ ବାହାରିଥିଲା। ଏହାପରେ ହଠାତ୍ ଟ୍ରେନର ଗାର୍ଡ ବଗି ଉପରକୁ କିଛି ମାଡ଼ ହେବାର ଶବ୍ଦ ଶୁଭିଥିଲା। ଏହାପରେ ଟ୍ରେନର ଗାର୍ଡ କେହି ଜଣେ ଦୁର୍ବୃତ୍ତ ଟ୍ରେନ ଉପରକୁ ଗୁଳି ଚଳାଉଥିବା ଦେଖିବାକୁ ପାଇଥିଲେ।
ଗୁଳିମାଡ଼ ହେବା ପରେ ଟ୍ରେନଟି ଅନେକ ସମୟ ଧରି ବାଉଦପୁର ଷ୍ଟେସନରେ ଅଟକି ରହିଥିଲା। ଯାଞ୍ଚ ପରେ ଏହା ପୁରୀ ଅଭିମୁଖେ ଯାତ୍ରା କରିଥିଲା।
ତେବେ କିଏ ଏବଂ କାହିଁକି ଟ୍ରେନ୍ ଉପରକୁ ଗୁଳିମାଡ଼ କରିଛନ୍ତି, ସେନେଇ କିଛି ସ୍ପଷ୍ଟ ସୂଚନା ମିଳିନାହିଁ। ଏନେଇ ଜିଆରପି, ଆରପିଏଫ ଏବଂ ରେଳବାଇର ଟିମ୍ ତଦନ୍ତ କରୁଛନ୍ତି।
Tags: #NandanKananExpress #Firing #Bhadrak #Railways #Odisha
