ଓଡ଼ିଶାଲାଇଭ୍ ବ୍ୟୁରୋ
ଚଷମା ପିନ୍ଧି, ଟୋପି ପିନ୍ଧି ଅଫିସ୍ରେ କର୍ମଚାରୀ କାମ କରୁଥିବାରୁ ଆପଣ ଦେଖିଥିବେ। ହେଲେ ଆପଣ କୌଣସି ଅଫିସରେ କର୍ମଚାରୀଙ୍କୁ ହେଲମେଟ ପିନ୍ଧି କାମ କରୁଥିବାର ଦେଖିଛନ୍ତି କି? କଥାଟା ଆପଣଙ୍କୁ ଆଶ୍ଚର୍ଯ୍ୟ ଲାଗୁଥିଲେ ବି ସତ। ଉତ୍ତରପ୍ରଦେଶ ବାନ୍ଦାସ୍ଥିତ ଏକ ବିଦ୍ୟୁତ୍ ଅଫିସରେ କିଛି ଏମିତି ଦୃଶ୍ୟ ଦେଖିବାକୁ ମିଳିଛି। ଏହି ଅଫିସରେ କାମ କରୁଥିବା ସମସ୍ତ କର୍ମଚାରୀ ହେଲମେଟ ପିନ୍ଧି ଅଫିସରେ କାମ କରିଥାନ୍ତି।
ଅଫିସ ଘର ପୁରୁଣା ହୋଇଥିବାରୁ ଏଠାରେ ସବୁବେଳେ ଛାତରୁ କିଛି କିଛି ଅଂଶ ଭାଙ୍ଗି ତଳେ ପଡ଼ିଥାଏ। ଗତ ୨ ବର୍ଷ ହେଲା ଅଫିସର ଏହିଭଳି ସ୍ଥିତି ରହିଛି। ସେଥିପାଇଁ ଏଠାରେ କର୍ମଚାରୀ ହେଲମେଟ ପିନ୍ଧି ବସୁଛନ୍ତି। ଯାହାଦ୍ୱାରା ସେମାନେ ଦୁର୍ଘଟଣାରୁ ନିଜକୁ ରକ୍ଷା କରିପାରିବେ।
ଅଫିସରେ କାମ କରୁଥିବା ଜଣେ କର୍ମଚାରୀଙ୍କ କହିବା ଅନୁସାରେ ଦୀର୍ଘ ଦିନରୁ ଅଫିସ ଏମିତି ଚାଲିଛି। ହେଲେ ଏହାକୁ ମରାମତି କରିବାକୁ କେହି ପଦକ୍ଷେପ ନେଉ ନାହାନ୍ତି।
