ଓଡ଼ିଶାଲାଇଭ୍ ବ୍ୟୁରୋ
ରାଜ୍ୟର ଉଚ୍ଚଶିକ୍ଷା ବିଭାଗ ଅଧୀନସ୍ଥ ବିଭିନ୍ନ ବିଶ୍ୱବିଦ୍ୟାଳୟରେ ବିଦ୍ୟାର୍ଥୀଙ୍କୁ ଆସନ୍ତା ଶିକ୍ଷା ବର୍ଷରୁ ଏକକାଳୀନ ଦ୍ୱୈତ ଡିଗ୍ରୀ କରିବାର ସୁଯୋଗ ମିଳିବ। ଉଚ୍ଚଶିକ୍ଷା ବିଭାଗ ଏନେଇ ବିଭିନ୍ନ ବିଶ୍ୱବିଦ୍ୟାଳୟର କୁଳପତିଙ୍କ ସହିତ ପ୍ରାଥମିକ ଆଲୋଚନା କରିଛନ୍ତି। ଆସନ୍ତା ଜାନୁଆରୀ ମାସରେ ଏକାଡେମିକ୍ କାଉନସିଲ୍ ବୈଠକ ବସିବ। ଏଥିରେ ଉଚ୍ଚଶିକ୍ଷା ପରିଷଦ, ସମସ୍ତ ବିଶ୍ୱବିଦ୍ୟାଳୟର କୁଳପତି ଓ ବିଭାଗର ବରିଷ୍ଠ ଅଧିକାରୀମାନେ ଯୋଗ ଦେବାକୁ ଥିବାବେଳେ ନୂଆ ଶିକ୍ଷାନୀତିର କାର୍ଯ୍ୟକାରୀତା ପାଇଁ ଗୁରୁତ୍ୱ ଦିଆଯିବ।
ଛାତ୍ରଛାତ୍ରୀଙ୍କ ପାଇଁ ଦ୍ୱୈତ ଡିଗ୍ରୀ ଅଧ୍ୟୟନ ବାଧ୍ୟତାମୂଳକ ହେବନାହିଁ। ନାମଲେଖା ସମ୍ପର୍କିତ ୟୁଜିସି (ବିଶ୍ୱବିଦ୍ୟାଳୟ ଅନୁଦାନ ଆୟୋଗ)ର ମାର୍ଗଦର୍ଶିକା ଅନୁଯାୟୀ ସମସ୍ତ ପଦକ୍ଷେପ ଗ୍ରହଣ କରାଯିବ। ଦୁଇଟି ଯାକ ଡିଗ୍ରୀ ରେଗୁଲାର୍ ମୋଡ୍ରେ ମଧ୍ୟ ହୋଇପାରିବ।
ଦୁଇଟି ରେଗୁଲାର୍ ପାଠ୍ୟକ୍ରମ ପାଇଁ ଅଲଗା ଅଲଗା କ୍ଲାସ ସମୟ ରହିବ। ଅର୍ଥାତ ଗୋଟିଏ କୋର୍ସ ପାଇଁ ସକାଳ ସମୟରେ କ୍ଲାସ ହେଉଥିଲେ ଅନ୍ୟଟି ସଂଧ୍ୟା ସମୟରେ ହେବ। କିନ୍ତୁ ଛାତ୍ରଛାତ୍ରୀ ଫିଜିକାଲ୍ ମୋଡ୍ରେ ଏକକାଳୀନ ଦୁଇଟି ଡିଗ୍ରିରେ ନାମ ଲେଖାଇ ପାରିବେ ନାହିଁ। ପ୍ରଥମ କୋର୍ସର ଅତିକମରେ ଏକ ବର୍ଷ ପରେ ହିଁ ଛାତ୍ରଛାତ୍ରୀ ଦ୍ୱିତୀୟ ରେଗୁଲାର କୋର୍ସର ନାମ ଲେଖାଇ ପାରିବେ। ତେବେ ଛାତ୍ରଛାତ୍ରୀ ଗୋଟିଏ ବିଶ୍ୱବିଦ୍ୟାଳୟରେ କିମ୍ବା ଦୁଇଟି ଅଲଗା ବିଶ୍ୱବିଦ୍ୟାଳୟରେ ନାମ ଲେଖାଇ ପାରିବେ।
ସବିଶେଷ ମାର୍ଗଦର୍ଶିକା ଆକାଡେମିକ୍ କାଉନସିଲ୍ ବୈଠକ ପରେ ଉଚ୍ଚଶିକ୍ଷା ବିଭାଗ ପକ୍ଷରୁ ଖୁବଶିଘ୍ର ବିଜ୍ଞପ୍ତି ପ୍ରକାଶ ପାଇବ।
Tags: #University #DualDegree #UGC #HigherEducation #Odisha #Student
