ଲୋକସଭା ନିର୍ବାଚନରେ ବିଜେଡିର ରଣନୀତି, ଘୋଷଣା କରିଥିବା ୧୫ ଆସନରୁ ୧୧ଟିରେ ଲଢ଼ିବେ ନୂଆ ପ୍ରାର୍ଥୀ

March 28, 2024

ଓଡ଼ିଶାଲାଇଭ୍ ବ୍ୟୁରୋ

ଓଡ଼ିଶାରେ ୨୦୨୪ ଲୋକସଭା ଓ ବିଧାନସଭା ନିର୍ବାଚନ ପାଇଁ ପ୍ରାର୍ଥୀ ଘୋଷଣା କରିଛି ବିଜେଡି। ରାଜ୍ୟର ୨୧ଟି ଲୋକସଭା ଆସନରୁ ବୁଧବାର ଦୁଇଟି ପର୍ଯ୍ୟାୟରେ ୧୫ଟି ଆସନ ପାଇଁ ଦଳ ପ୍ରାର୍ଥୀ ଘୋଷଣା କରିଛି। ତେବେ ଏହି ୧୫ଟି ଆସନରୁ ୧୧ଟିରେ ଦଳ ନୂଆ ପ୍ରାର୍ଥୀଙ୍କୁ ଟିକେଟ୍ ଦେଇଛି।

ବିଜେଡି ପକ୍ଷରୁ କୋରାପୁଟ, କନ୍ଧମାଳ, ଜଗତସିଂହପୁର ଓ ଯାଜପୁରରେ ପୁରୁଣା ପାର୍ଥୀଙ୍କୁ ଟିକେଟ୍ ଦିଆଯାଇଥିବା ବେଳେ ଅନ୍ୟ ୧୧ଟି ଆସନରେ ଏଥର ନୂଆ ମୁହଁ ଦେଖିବାକୁ ମିଳିବ।

ତେବେ ସମ୍ବଲପୁର ଲୋକସଭା ଆସନରେ ବିଜେପି ପକ୍ଷରୁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏବଂ ବିଜେଡି ପକ୍ଷରୁ ଦଳର ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ ମଇଦାନରେ ଓହ୍ଲାଇବେ। ଏଥର ନିର୍ବାଚନରେ ଏଠାରେ କଡ଼ା ଟକ୍କର ହେବ ବୋଲି ଆଶା କରାଯାଉଛି।

ସେହିପରି ବିଜେଡି ପୁରୀ ଲୋକସଭା ଆସନରୁ ପିନାକୀ ମିଶ୍ରଙ୍କ ବଦଳରେ ଅରୂପ ପଟ୍ଟନାୟକଙ୍କୁ ଟିକେଟ ଦେଇଛି। ଏହାସହ କଟକରୁ ଦଳ ସଂତୃପ୍ତ ମିଶ୍ରଙ୍କୁ ପ୍ରାର୍ଥୀ କରିଛି।

ଲୋକସଭା ନିର୍ବାଚନ ପାଇଁ ବିଜେଡିର ନୂଆ ପ୍ରାର୍ଥୀ

ଲୋକସଭା ଆସନ	୨୦୨୪ ନିର୍ବାଚନରେ ପ୍ରାର୍ଥୀ	୨୦୧୯ ନିର୍ବାଚନରେ ପ୍ରାର୍ଥୀ
ସମ୍ବଲପୁର	ପ୍ରଣବ ପ୍ରକାଶ ଦାସ	ନଳିନୀକାନ୍ତ ପ୍ରଧାନ
ସୁନ୍ଦରଗଡ଼	ଦିଲ୍ଲୀପ ତିର୍କୀ	ସୁନିତା ବିଶ୍ଵାଳ
ମୟୂରଭଞ୍ଜ	ସୁଦାମ ମାର୍ଣ୍ଡି	ଦେବାଶିଷ ମାର୍ଣ୍ଡି
କଳାହାଣ୍ଡି	ଲମ୍ବୋଧର ନିଆଳ	ପୁଷ୍ପେନ୍ଦ୍ର ସିଂହଦେଓ
କେନ୍ଦ୍ରାପଡ଼ା	ଅଂଶୁମାନ ମହାନ୍ତି	ଅନୁଭବ ମହାନ୍ତି
ନବରଙ୍ଗପୁର	ପ୍ରଦୀପ ମାଝି	ରମେଶ ଚନ୍ଦ୍ର ମାଝି
ଭୁବନେଶ୍ୱର	ମନ୍ମଥ ରାଉତରାୟ	ଅରୂପ ପଟ୍ଟନାୟକ
ଆସ୍କା	ରଞ୍ଜିତା ସାହୁ	ପ୍ରମିଳା ବିଶୋଇ
କଟକ	ସଂତୃପ୍ତ ମିଶ୍ର	ଭର୍ତ୍ତୃହରି ମହତାବ
ପୁରୀ	ଅରୂପ ପଟ୍ଟନାୟକ	ପିନକୀ ମିଶ୍ର
ଢେଙ୍କାନାଳ	ଅବିନାଶ ସାମଲ	ମହେଶ ସାହୁ