ଓଡ଼ିଶାଲାଇଭ୍ ବ୍ୟୁରୋ
(ମୟୂରଭଞ୍ଜରୁ ରାଧାଶ୍ୟାମ ପ୍ରଧାନ): ନିଜ ପଡ଼ୋଶୀ ବୃଦ୍ଧାଙ୍କୁ କୁରାଢ଼ିରେ ହାଣି ଅତି ନିର୍ମମ ଭାବେ ହତ୍ୟା କରିଛନ୍ତି ଯୁବକ। ଏଭଳି ଅଭିଯୋଗ ଆସିଛି ମୟୂରଭଞ୍ଜ ଜିଲ୍ଲା ବଡ଼ସାହି ଥାନା ଅନ୍ତର୍ଗତ ନିଶ୍ଚିତପୁର ଗ୍ରାମରୁ। ବୃଦ୍ଧାଙ୍କୁ ହତ୍ୟା କରିବା ଅଭିଯୋଗରେ ବାବୁଲି ମହାକୁଡ଼ଙ୍କୁ ଗିରଫ କରିଛି ବଡ଼ସାହି ଥାନା ପୋଲିସ।
ନିଶ୍ଚିତପୁର ଗ୍ରାମର ୭୨ ବର୍ଷିୟ ଗୌରୀ ବେହେରାଙ୍କ ସହ ସେହି ଗାଁର ବାବୁଲି ମହାକୁଡ଼ଙ୍କର ପ୍ରାୟ ଝଗଡ଼ା ଲାଗି ରହୁଥିଲା। ବାବୁଲିଙ୍କ ଘରେ ଗୌରୀ ଅଶାନ୍ତି ସୃଷ୍ଟି କରୁଥିବା ବାବୁଲି ପୂର୍ବରୁ ଅଭିଯୋଗ କରି ଆସୁଥିଲେ।
ଗୁରୁବାର ଦିନ କୌଣସି କଥାକୁ ନେଇ ଉଭୟ ବାବୁଲି ଏବଂ ଗୌରୀଙ୍କ ମଧ୍ୟରେ କଥା କଟାକଟି ହୋଇଥିଲା। ଏଥିରେ ଉତ୍ୟକ୍ତ ହୋଇ ବାବୁଲି ଏକ କୁରାଢ଼ିରେ ଗୌରୀଙ୍କୁ ଆକ୍ରମଣ କରିଥିଲେ। ଫଳରେ ଗୌରୀଙ୍କ ଶରୀରରୁ ମୁଣ୍ଡଟି ଅଲଗା ହୋଇଯାଇଥିଲା।
ହତ୍ୟାକାଣ୍ଡ ଘଟାଇ ଅଭିଯୁକ୍ତ ବାବୁଲି ଫେରାର ହେବାକୁ ଉଦ୍ୟମ କରୁଥିବାବେଳେ ଗ୍ରାମବାସୀ ତାଙ୍କୁ କାବୁ କରି ପୋଲିସକୁ ଖବର ଦେଇଥିଲେ। ବଡ଼ଗାଁ ଥାନା ପୋଲିସ ଘଟଣାସ୍ଥଳରେ ପହିଞ୍ଚି ଅଭିଯୁକ୍ତ ବାବୁଲିଙ୍କୁ ଗିରଫ କରି ହତ୍ୟାରେ ବ୍ୟବହୃତ କୁରାଢ଼ିକୁ ଜବତ କରିଥିଲା। ଅନ୍ୟ ପଟେ ଗୌରୀଙ୍କ ଶବ ଜବତ କରି ବ୍ୟବଚ୍ଛେଦ ପାଇଁ ପଠାଇବା ସହ ପୋଲିସ ଏକ ହତ୍ୟା ମାମଲା ରୁଜୁ କରି ଘଟଣା ତଦନ୍ତ ଆରମ୍ଭ କରିଛି।
Tags: #Mayurbhanj #MurderCase #PoliceInvestigation #Mayurbhanj #Odisha
