ଓଡ଼ିଶାଲାଇଭ୍ ବ୍ୟୁରୋ
ଗଞ୍ଜାମ ଜିଲ୍ଲା ଖଲ୍ଲିକୋଟ ଥାନା ଅନ୍ତର୍ଗତ ଡିମିରିଆ ଗାଁ ନିକଟରେ ଶନିବାର ସକାଳେ ଟ୍ରକ ଧକ୍କାରେ ତିନିଜଣଙ୍କର ମୃତ୍ୟୁ ହୋଇଛି। ମୃତକଙ୍କ ମଧ୍ୟରେ ଦୁଇ କାଉଡ଼ିଆ ଏବଂ ଜଣେ ସ୍ଥାନୀୟ ଅଞ୍ଚଳ ବାସିନ୍ଦା। ମୃତ କାଉଡ଼ିଆ ଦୁଇଜଣ ହେଲେ ଖୋର୍ଦ୍ଧା ଜିଲ୍ଲା ବାଣପୁର ଅଞ୍ଚଳ ପପୁ ନାୟକ ଓ ରଞ୍ଜିତ ନାୟକ।
ବାଣପୁର ଅଞ୍ଚଳର ପପୁ ନାୟକ ଏବଂ ରଞ୍ଜିତ ନାୟକ ପାଣିଭାର ଆଣିବା ପାଇଁ ଗଞ୍ଜାମ ଜିଲ୍ଲାକୁ ଯାଇଥିଲେ। ଶନିବାର ସକାଳେ ଚାଲିଚାଲି ଯାଉଥିବାବେଳେ ଆନ୍ଧ୍ରପ୍ରଦେଶରୁ ଭୁବନେଶ୍ଵର ଅଭିମୁଖେ ଦ୍ରୁତ ଗତିରେ ଆସୁଥିବା ଏକ ଟ୍ରକ ସେମାନଙ୍କୁ ଡିମିରିଆ ଗାଁ ନିକଟରେ ଧକ୍କା ଦେଇଥିଲା। ପରେ ସମୟରେ ସେହି ରାସ୍ତାରେ ଯାଉଥିବା ଦଲବାଟି ଗାଁର ବନମାଳି ପାତ୍ରଙ୍କ ଉପରେ ଟ୍ରକଟି ଚଢ଼ି ଯାଇଥିଲା। ଫଳରେ ଘଟଣାସ୍ଥଳରେ ତିନିଜଣଙ୍କର ମୃତ୍ୟୁ ହୋଇଥିଲା।
ପରେ ଟ୍ରକଟି ଭାରସାମ୍ୟ ହରାଇ ରାସ୍ତା କଡ଼କୁ ଓଲଟି ପଡ଼ିଥିଲା। ଏହି ଦୁର୍ଘଟଣାରେ ଟ୍ରକ ଡ୍ରାଇଭର ଏବଂ ହେଲପର ଗୁରୁତର ଭାବେ ଆହତ ହେଇଛନ୍ତି। ଖବର ପାଇ ଖଲ୍ଲିକୋଟ ଥାନା ପୋଲିସ ଘଟଣାସ୍ଥଳରେ ପହଞ୍ଚି ଶବ ଜବତ କରି ବ୍ୟବଚ୍ଛେଦ ପାଇଁ ପଠାଇଛି। ଏପଟେ ଦୁର୍ଘଟଣାଗ୍ରସ୍ତ ଟ୍ରକକୁ ଜବତ କରିବା ସହ ପୋଲିସ ଆହତ ଟ୍ରକ ଡ୍ରାଇଭର ଏବଂ ହେଲପରକୁ ଚିକିତ୍ସା ପାଇଁ ଡାକ୍ତରଖାନାରେ ଭିର୍ତ୍ତି କରିଛି। ପୋଲିସ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି।
Tags: #RoadAccident #Ganjam #Death #Odisha #Kaudia
