୨୦୨୪-୨୫ ଆର୍ଥିକ ବର୍ଷରେ ଭାରତର ଅଭିବୃଦ୍ଧି ହାର ରହିବ ୬.୬ ପ୍ରତିଶତ – ମିଳିତ ଜାତିସଂଘ

ଓଡ଼ିଶାଲାଇଭ୍ ବ୍ୟୁରୋ

ଭାରତ ଏବେ ବିଶ୍ଵର ଦ୍ରୁତ ଅଭିବୃଦ୍ଧିଶୀଳ ପ୍ରମୁଖ ଅର୍ଥନୀତି ଭାବେ ନିଜର ସ୍ଥିତି ବଜାୟ ରଖିଛି। ମିଳିତ ଜାତିସଂଘର ୱାର୍ଲ୍ଡ ଇକୋନୋମିକ ସିଚ୍ୟୁସନ୍ ଆଣ୍ଡ ପ୍ରୋସ୍ପେକ୍ଟସ୍ ୨୦୨୫ (ଡବ୍ଲ୍ୟୁଇଏସପି) ରିପୋର୍ଟରେ ଏହା ଉଲ୍ଲେଖ କରାଯାଇଛି। ଗୁରୁବାର ପ୍ରକାଶିତ ଏହି ରିପୋର୍ଟରେ ଚଳିତ ବର୍ଷ ଭାରତର ଅଭିବୃଦ୍ଧି ହାର ୬.୬ ପ୍ରତିଶତ ରହିବ ବୋଲି ଆକଳନ କରାଯାଇଛି।

ଏହି ରିପୋର୍ଟରେ ଭାରତର ଅର୍ଥନୈତିକ ସ୍ଥିରତାକୁ ରପ୍ତାନି ଅଭିବୃଦ୍ଧି ପାଇଁ ମୁଖ୍ୟ କାରକ ବୋଲି କୁହାଯାଇଛି। ସେବା ଏବଂ ନିର୍ଦ୍ଦିଷ୍ଟ ସାମଗ୍ରୀ ବର୍ଗ, ବିଶେଷକରି ଔଷଧ ଏବଂ ଇଲେକ୍ଟ୍ରୋନିକ୍ସ କ୍ଷେତ୍ରରେ ଦେଶର ରପ୍ତାନି ଆହୁରି ବଢ଼ିବ ବୋଲି କୁହାଯାଇଛି। ଜାତିସଂଘର ଗ୍ଲୋବାଲ ଇକୋନୋମିକ ମନିଟରିଂ କମିଟିର ଅଧ୍ୟକ୍ଷ ହମିଦ ରସିଦ ଏହି ରିପୋର୍ଟ ପ୍ରକାଶ ସମୟରେ ଅର୍ଥନୀତି ଓ ବାଣିଜ୍ୟର ଅଧିକାଂଶ କ୍ଷେତ୍ରରେ ଦେଶର ଦୃଢ଼ ପ୍ରଦର୍ଶନ ଉପରେ ଗୁରୁତ୍ୱାରୋପ କରିଛନ୍ତି।

ଆଗାମୀ ଆର୍ଥିକ ବର୍ଷଗୁଡ଼ିକରେ ଘରୋଇ ଉପଭୋକ୍ତା ଏବଂ ନିବେଶ ମଧ୍ୟ ଅର୍ଥନୀତିକୁ ଚଳାଇବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ। ଏହାସହ ଭିତ୍ତିଭୂମି ବିକାଶ ଓ ପୁଞ୍ଜି ନିବେଶ ଦେଶର ଅଭିବୃଦ୍ଧି ଉପରେ ସକାରାତ୍ମକ ପ୍ରଭାବ ପକାଇବ ବୋଲି ଡବ୍ଲୁଇଏସପି ରିପୋର୍ଟରେ କୁହାଯାଇଛି।

୨୦୨୪ରେ ଅନୁକୂଳ ମୌସୁମୀ ବର୍ଷା ଯୋଗୁଁ ସମସ୍ତ ପ୍ରମୁଖ ଫସଲ କ୍ଷେତ୍ରରେ ଯଥେଷ୍ଟ ଉତ୍ପାଦନ ବୃଦ୍ଧି ଘଟିଛି। ଏହା ଫଳରେ ୨୦୨୫ରେ ଅର୍ଥନୀତି ଆହୁରି ସୁଦୃଢ଼ ହେବାର ସମ୍ଭାବନା ରହିଛି।

ବିଶ୍ୱ ମାନ୍ଦାବସ୍ଥା ଭିତରେ ଚମକିଲା ଭାରତ

ବିଶ୍ୱର ବିଭିନ୍ନ ଦେଶର ଅର୍ଥନୈତିକ ପ୍ରଦର୍ଶନ ମନ୍ଥର ହେବା ସତ୍ତ୍ୱେ ଭାରତର ଅଭିବୃଦ୍ଧି ଘଟିଛି। ଚଳିତ ଆର୍ଥିକ ବର୍ଷରେ ବିଶ୍ଵର ହାରାହାରି ଅଭିବୃଦ୍ଧି ହାର ୨.୮ ପ୍ରତିଶତ ରହିବାକୁ ଥିବାବେଳେ ବିକଶିତ ଅର୍ଥନୀତି ମାତ୍ର ୧.୬ ପ୍ରତିଶତ ହାରରେ ଅଭିବୃଦ୍ଧି ହାସଲ କରିବେ ବୋଲି ଆକଳନ କରାଯାଇଛି। ଯାହା କି ଗତବର୍ଷ ତୁଳନାରେ କମ ରହିଛି।

ବିଶ୍ଵର ଦ୍ଵିତୀୟ ଦ୍ରୁତ ଅଭିବୃଦ୍ଧିଶୀଳ ଅର୍ଥନୀତି ଚୀନର ଅଭିବୃଦ୍ଧି ହାର ୪.୮ ପ୍ରତିଶତକୁ ଖସିଆସିଛି। ୨୦୨୫ରେ ଏହା ଆହୁରି ହ୍ରାସ ପାଇ ୪.୫ ପହଞ୍ଚିବ ବୋଲି ଆକଳନ କରାଯାଇଛି।

ଏସବୁ ଆହ୍ୱାନ ସତ୍ତ୍ୱେ ଭାରତ ନିଜର ଅର୍ଥନୈତିକ ଗତି ବଜାୟ ରଖିବାରେ ସଫଳ ହୋଇଛି। ବିଶ୍ୱ ଅଭିବୃଦ୍ଧି ନେତୃତ୍ୱର ମାନ୍ୟତା ସୁଦୃଢ଼ କରିଛି। 

ଭିତ୍ତିଭୂମି ଏବଂ ନିବେଶ

ଭାରତର ଅଭିବୃଦ୍ଧିକୁ ବଜାୟ ରଖିବା ପାଇଁ ଭିତ୍ତିଭୂମି ପୁଞ୍ଜିନିବେଶର ଗୁରୁତ୍ୱ ଉପରେ ଏହି ରିପୋର୍ଟରେ ଆଲୋକପାତ କରାଯାଇଛି। ବୃହତ୍ ପ୍ରକଳ୍ପଗୁଡ଼ିକ ଏକ ପ୍ରଭାବ ସୃଷ୍ଟି କରିବ, ଯାହା ନିଯୁକ୍ତି, ବ୍ୟବହାର ଏବଂ ସାମଗ୍ରିକ ଅର୍ଥନୈତିକ କାର୍ଯ୍ୟକଳାପକୁ ବଢ଼ାଇବ ବୋଲି ଆଶା କରାଯାଉଛି।

ଏହା ମଧ୍ୟ ରଣନୈତିକ ପୁଞ୍ଜି ବ୍ୟୟ ସହିତ ଦୃଢ଼ ଘରୋଇ ବ୍ୟବହାର ଏବଂ ପୁଞ୍ଜିନିବେଶ ଅଭିବୃଦ୍ଧିକୁ ସମର୍ଥନ ଜାରି ରଖିବ ବୋଲି ରିପୋର୍ଟରେ କୁହାଯାଇଛି।

ଭବିଷ୍ୟତର ଚ୍ୟାଲେଞ୍ଜ

୨୦୨୪ ପାଇଁ ଭାରତର ଅଭିବୃଦ୍ଧି ଆକଳନ ସାମାନ୍ୟ ହ୍ରାସ ପାଇଥିବାବେଳେ ବିଶ୍ୱ ଅର୍ଥନୈତିକ ମାନ୍ଦାବସ୍ଥା ପରିପ୍ରେକ୍ଷୀରେ ଏହାକୁ ଦେଖିବା ଉଚିତ ବୋଲି ରିପୋର୍ଟରେ ଗୁରୁତ୍ୱାରୋପ କରାଯାଇଛି। ଅନ୍ତର୍ଜାତୀୟ ସ୍ତରରେ ମୁଦ୍ରାସ୍ଫୀତି, ଯୁଦ୍ଧ ତଥା ରାଜନୈତିକ ଉତ୍ତେଜନା ଏବଂ ଯୋଗାଣ ଶୃଙ୍ଖଳା ବାଧାପ୍ରାପ୍ତ ହେବା ଭଳି କାରଣ ଆଗାମୀ ବର୍ଷଗୁଡ଼ିକରେ ଚ୍ୟାଲେଞ୍ଜ ସୃଷ୍ଟି କରିପାରେ।

ତେବେ ଉତ୍ପାଦନ, ସେବା ଏବଂ କୃଷି କ୍ଷେତ୍ରରେ ଏକ ମଜଭୁତ ଭିତ୍ତିଭୂମି ସହିତ ଭାରତର ଅର୍ଥନୈତିକ ଦୃଷ୍ଟିକୋଣ ଉଜ୍ଜ୍ୱଳ ରହିଛି। ଏହି ରିପୋର୍ଟରେ ଦେଶର ଅଭିବୃଦ୍ଧି ଧାରା ବଜାୟ ରଖିବା ସହିତ ବୈଶ୍ୱିକ ଅନିଶ୍ଚିତତାକୁ ମୁକାବିଲା କରିବାର କ୍ଷମତା ଉପରେ ଆଲୋକପାତ କରାଯାଇଛି।

ଦ୍ରୁତ ଅଭିବୃଦ୍ଧିଶୀଳ ବୃହତ୍ ଅର୍ଥନୀତି ଭାବେ ଭାରତର ପ୍ରଦର୍ଶନ ପ୍ରମୁଖ ଅଭିବୃଦ୍ଧି କ୍ଷେତ୍ରରେ ଏହାର ସ୍ଥିରତା ଏବଂ ରଣନୈତିକ ଗୁରୁତ୍ଵର ପ୍ରମାଣ ବହନ କରୁଛି। ଅନୁକୂଳ ପରିସ୍ଥିତି ଏବଂ ନିରନ୍ତର ପୁଞ୍ଜିନିବେଶ ଯୋଗୁଁ ଆଗାମୀ ଦିନରେ ଦେଶ ନିଜର ଅର୍ଥନୈତିକ ସ୍ଥିତିକୁ ଆହୁରି ସୁଦୃଢ଼ କରିବ ବୋଲି ମିଳିତ ଜାତିସଂଘ ଆଶା ରଖିଛି।

Tags: #EconomicGrowth #GDP #UN #WESP #EconomicActivity #India