ଓଡ଼ିଶାଲାଇଭ୍ ବ୍ୟୁରୋ
ବୁଧବାରଠାରୁ ଭ୍ରମଣକାରୀ ଦକ୍ଷିଣ ଆଫ୍ରିକା ସହ ଟେଷ୍ଟ ସିରିଜ୍ ଖେଳିବାକୁ ଯାଉଛି ଭାରତୀୟ ଟିମ୍। ତେବେ ଏହା ପୂର୍ବରୁ ଆୟୋଜିତ ପ୍ରେସମିଟରେ ଓପନର ରୋହିତ ଶର୍ମା ଓ ୱିକେଟ କିପର ରିଦ୍ଧିମାନଙ୍କୁ ନେଇ ମନ୍ତବ୍ୟ ଦେଇଛନ୍ତି ଅଧିନାୟକ ବିରାଟ କୋହଲି।
ବିରାଟ କୋହଲି କହିଛନ୍ତି, “ରୋହିତ ଟେଷ୍ଟ ଦଳରେ ଓପନର ଭାବେ ରହିବା ନିହାତି ପକ୍ଷେ ଦଳ ପାଇଁ ଖୁସିର କଥା। ସେ ସୀମିତ ଓଭର କ୍ରିକେଟରେ ଯେଭଳି ପ୍ରଦର୍ଶନ କରିଛନ୍ତି ଦଳ ତାଙ୍କ ପାଖରୁ ସେହିଭଳି ପ୍ରଦର୍ଶନ ଟେଷ୍ଟରେ ମଧ୍ୟ ଆଶା କରୁଛି। ସେ ଜଣେ ଅଭିଜ୍ଞ କ୍ରିକେଟର ତେଣୁ ସେ ପରିସ୍ଥିତି ଅନୁସାରେ ଖେଳିପାରିବେ। ସେ ତାଙ୍କର ନିଜ ଷ୍ଟାଇଲରେ ଖେଳନ୍ତୁ।”
ସେହିଭଳି ୱିକେଟ କିପର ରିଦ୍ଧିମାନ ଶାହ ଦଳରେ ସ୍ଥାନ ପାଇବାକୁ ନେଇ ମୁହଁ ଖୋଲିଛନ୍ତି ବିରାଟ। ସେ କହିଛନ୍ତି, “ଆମେ ରିଷଭଙ୍କୁ ଅନେକ ସୁଯୋଗ ଦେଇଛୁ। ହେଲେ ରିଦ୍ଧିମାନ ଜଣେ ଭଲ ୱିକେଟ କିପର ବ୍ୟାଟ୍ସମ୍ୟାନ। ତେଣୁ ତାଙ୍କୁ ପୁଣିଥରେ ଦଳରେ ସାମିଲ କରିବା ପୁରାପୁରି ଠିକ୍ ନିଷ୍ପତ୍ତି। ସେ ଦଳପାଇଁ ଖରାପ ପରିସ୍ଥିତିରେ ମଧ୍ୟ ଅନେକ ରନ୍ ସଂଗ୍ରହ କରିଛନ୍ତି।”
ଆସନ୍ତାକାଲିଠୁ ଆରମ୍ଭ ହେଉଥିବା ପ୍ରଥମ ଟେଷ୍ଟ ମ୍ୟାଚ୍ ପାଇଁ ବିସିସିଆଇ ଆଜିଠୁ ଦଳ ଘୋଷଣା କରିଛି। ଦଳରେ ଓପନର ଭାବେ ରୋହିତ ଶର୍ମା ଓ ୱିକେଟକିପର ଭାବେ ରିଦ୍ଧିମାନ ଶାହଙ୍କୁ ଚୂଡ଼ାନ୍ତ ଏକାଦଶରେ ସାମିଲ କରାଯାଇଛି।
