ଓଡ଼ିଶାଲାଇଭ୍ ବ୍ୟୁରୋ
(ବାଲେଶ୍ଵର କୃଷ୍ଣ କୁମାର ମହାନ୍ତି): ବାଲେଶ୍ଵରର ନାଟ୍ୟାନୁଷ୍ଠାନ ‘ନାୟିକା’ ପକ୍ଷରୁ ସପ୍ତମ ରାଜ୍ୟସ୍ତରୀୟ ନାଟକ ମହୋତ୍ସବ ସ୍ଥାନୀୟ ଗାନ୍ଧୀ ସ୍ମୃତି ଭବନରେ ଅନୁଷ୍ଠିତ ହୋଇଯାଇଛି। ନାଟକ ମହୋତ୍ସବ ମଞ୍ଚରେ ବାଲେଶ୍ଵରର ଯୁବ ସାମ୍ବାଦିକା ପ୍ରତ୍ୟାଶା ପ୍ରିୟମ୍ବଦା ମହାନ୍ତିଙ୍କୁ ‘ନାୟିକା ମିଡିଆ ସମ୍ମାନ ୨୦୨୪’ ରେ ସମ୍ମାନିତ କରାଯାଇଛି।
ଏହି ଅବସରରେ ଡାକ୍ତର ପ୍ରଫୁଲ୍ଲ ଚନ୍ଦ୍ର ଆଚାର୍ଯ୍ୟ ଓ ହିମାଂଶୁ ଦାସଙ୍କ ସ୍ମୃତିରେ ଓଡ଼ିଶା ନାଟ୍ୟ ସଂଘ ଦକ୍ଷିଣାଞ୍ଚଳ ଜୋନ୍ ଉପ ସଭାପତି ମନୋଜ କୁମାର ଦଣ୍ଡପାଟଙ୍କୁ ‘ନାଟ୍ୟରୁଚି ସମ୍ମାନ’ରେ ସମ୍ମାନିତ କରାଯାଇଥିଲା।
ମହୋତ୍ସବରେ ବାଲେଶ୍ଵର ଶିଳ୍ପ ଓ ବାଣିଜ୍ୟ ସଂଘ ସଭାପତି ସଞ୍ଜୟ କୁମାର ଦାସ, ଡାକ୍ତର ଅମରଜ୍ୟୋତି ଆଚାର୍ଯ୍ୟ, ଓଡ଼ିଶା ନାଟ୍ୟ ସଂଘ ସମ୍ପାଦକ ଶୁଭକାନ୍ତ ପାଢ଼ୀ ଅତିଥି ଭାବେ ଯୋଗ ଦେଇ ନାଟକକୁ ବଞ୍ଚାଇ ରଖିବା ଲାଗି ବାଲେଶ୍ଵରର ନାଟ୍ୟାନୁଷ୍ଠାନ ‘ନାୟିକା’ର ଉଦ୍ୟମକୁ ଭୂୟସୀ ପ୍ରଶଂସା କରିଥିଲେ। ଅନ୍ୟମାନଙ୍କ ମଧ୍ୟରେ ‘ନାୟିକା’ର ନିର୍ଦ୍ଦେଶିକା ସୁସ୍ମିତା ରଣା, ସାଂସ୍କୃତିକ ସମ୍ପାଦକ ବିଜୟ ଅଧିକାରୀ ଏବଂ ପାର୍ଥ ସାରଥୀ ଧଳ ପ୍ରମୁଖ ଉପସ୍ଥିତ ଥିଲେ।
‘ନାୟିକା’ ପକ୍ଷରୁ ପ୍ରତିଷ୍ଠାତା ସୁଶୀଲ ପଟ୍ଟନାୟକ ମଞ୍ଚ ପରିଚାଳନା କରିଥିଲେ। ଶେଷରେ ଉପନିର୍ଦ୍ଦେଶକ ଅରବିନ୍ଦ ସାହୁ ଧନ୍ୟବାଦ ଅର୍ପଣ କରିଥିଲେ। ଉତ୍ସବର ଦ୍ଵିତୀୟ ସନ୍ଧ୍ୟାର ନାଟକର ନିର୍ଦ୍ଦେଶକ ଅର୍ଣ୍ଣବ କରଙ୍କୁ ମଧ୍ୟ ଅନୁଷ୍ଠାନ ପକ୍ଷରୁ ସମ୍ମାନିତ କରାଯାଇଥିଲା।
Tags: #Balasore #NatyanustanaNayika #Play #NayikaMediaSammana #JournalistPratyashaPriyambadaMohanty
