ଓଡ଼ିଶାଲାଇଭ୍ ବ୍ୟୁରୋ
କ୍ରିକେଟରେ ଭାରତୀୟ ପୁରୁଷ ଦଳ ହାସଲ କରିଛି ଐତିହାସିକ ଉପଲବ୍ଧି। କ୍ରିକେଟର ୩ଟି ଯାକ ଫର୍ମାଟ ଟି-ଟ୍ୱେଣ୍ଟି, ଦିନିକିଆ ଓ ଟେଷ୍ଟରେ ପ୍ରଥମଥର ପାଇଁ ବିଶ୍ଵରେ ଏକ ସମୟରେ ଶୀର୍ଷ ସ୍ଥାନ ହାସଲ କରିଛି ଟିମ୍ ଇଣ୍ଡିଆ। ଭାରତୀୟ କ୍ରିକେଟ୍ ଇତିହାସରେ ଏହା ପ୍ରଥମ। ବୁଧବାର ଆଇସିସି ପକ୍ଷରୁ ପ୍ରକାଶ ପାଇଥିବା ରାଙ୍କିଙ୍ଗ ତାଲିକାରୁ ଏହି ସୂଚନା ମିଳିଛି।
ରବିବାର ନାଗପୁର ଟେଷ୍ଟରେ ଅଷ୍ଟ୍ରେଲିଆକୁ ହରାଇ ଟିମ୍ ଇଣ୍ଡିଆ ଟେଷ୍ଟ ରାଙ୍କିଙ୍ଗରେ ୧୧୫ ପଏଣ୍ଟ ପାଇ ଶୀର୍ଷ ସ୍ଥାନରେ ପହଞ୍ଚିଛି। ଏହା ପୂର୍ବରୁ ଦଳ ଦିନିକିଆ ଓ ଟି-ଟ୍ୱେଣ୍ଟିରେ ବିଶ୍ଵରେ ପ୍ରଥମ ସ୍ଥାନରେ ରହିଥିଲା।
ଟେଷ୍ଟ ରାଙ୍କିଙ୍ଗରେ ଶୀର୍ଷରେ ପହଞ୍ଚିବା ପରେ ଦଳ ଏକାସାଙ୍ଗେ କ୍ରିକେଟର ତିନୋଟି ଫର୍ମାଟରେ ୧ ନମ୍ବର ସ୍ଥାନ ହାସଲ କରିଛି।
ଭାରତ ପଛକୁ ଟେଷ୍ଟ ଓ ଦିନିକିଆରେ ଅଷ୍ଟ୍ରେଲିଆ ଦ୍ଵିତୀୟ ସ୍ଥାନରେ ରହିଛି। ସେହିପରି ଟି-ଟ୍ୱେଣ୍ଟିରେ ଇଂଲଣ୍ଡ ଭାରତ ପରେ ଦ୍ଵିତୀୟ ସ୍ଥାନ ଅଧିକାର କରିଛି।
Tags: #ICCRanking #Cricket #TeamIndia #Test #ODI #T-20 #BCCI
