ଓଡ଼ିଶାଲାଇଭ୍ ବ୍ୟୁରୋ
ଗିରଫ ହେଲେ ସାଉଥ ସୁପରଷ୍ଟାର ଅଲ୍ଲୁ ଅର୍ଜୁନ। ଦଳାଚକଟା ମାମଲାରେ ଅଲ୍ଲୁ ଅର୍ଜୁନଙ୍କୁ ଗିରଫ କଲା ହାଇଦ୍ରାବାଦ ପୋଲିସ।
ଡିସେମ୍ବର ୪ ତାରିଖରେ ହାଇଦ୍ରାବାଦର ଏକ ହଲରେ ପୁଷ୍ପା-୨ର ସ୍ଵତନ୍ତ୍ର ସ୍କ୍ରିନିଂ ବେଳେ ଦଳାଚକଟା ପରିସ୍ଥିତି ଉଜୁଜିଥିଲା। ଏଥିରେ ଜଣେ ମହିଳାଙ୍କର ମୃତ୍ୟୁ ହୋଇଥିଲା ଓ ଅନେକ ଆହତ ହୋଇଥିଲେ।
ପୁଷ୍ପା-୨ର ପ୍ରିମିୟର ଦେଖିବା ପାଇଁ ଫ୍ୟାନ୍ସଙ୍କ ଭିଡ଼ ଜମିଥିଲା। ଫିଲ୍ମର ମୁଖ୍ୟ ଅଭିନେତା ଅଲ୍ଲୁ ଅର୍ଜୁନ ମଧ୍ୟ ପ୍ରିମିୟରରେ ପହଞ୍ଚିଥିଲେ। ଏକଥା ଜାଣିବା ପରେ ଭିଡ଼ ଆହୁରି ବଢ଼ି ଯାଇଥିଲା।
ଅଲ୍ଲୁ ଅର୍ଜୁନ ଯେତେବେଳେ ଫ୍ୟାନ୍ସଙ୍କ ସହ ମିଶିବାକୁ ଆସିଲେ ସେତେବେଳେ ଭିଡ଼ ନିୟନ୍ତ୍ରଣ ବାହାରକୁ ଚାଲିଯାଇଥିଲା। ପରେ ଦଳାଚକଟା ପରିସ୍ଥିତି ସୃଷ୍ଟି ହୋଇଥିଲା। ଭିଡ଼ ଭିତରେ ଫସି ଯାଇଥିଲେ ରେବତୀ ନାମକ ମହିଳା ଓ ତାଙ୍କ ନିଜ ପୁଅ। ଡ୍ୟୁଟିରେ ଥିବା ପୋଲିସ କର୍ମଚାରୀ ସେମାନଙ୍କୁ ଉଦ୍ଧାର କରିଥିଲେ। ଦଳାଚକଟାରେ ଉଭୟଙ୍କ ଅବସ୍ଥା ଗୁରୁତର ହୋଇପଡ଼ିଥିବାରୁ ସେମାନଙ୍କୁ ସ୍ଥାନୀୟ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ତେବେ ଡାକ୍ତର ରେବତୀଙ୍କୁ ମୃତ ଘୋଷଣା କରିଥିଲେ।
ଏହି ଘଟଣାକୁ ନେଇ ଅଲ୍ଲୁ ଅର୍ଜୁନ ଗଭୀର ଦୁଃଖ ପ୍ରକାଶ କରିବା ସହ ମୃତକଙ୍କ ପରିବାରକୁ ୨୫ ଲକ୍ଷ ଟଙ୍କା ସହାୟତା ରାଶି ପ୍ରଦାନ କରିବାକୁ ପ୍ରତିଶ୍ରୁତି ଦେଇଥିଲେ।
Tags: #Pushpa-2 #AlluArjun #Premiere #Stampede #Hyderabad #Death
