ଓଡ଼ିଶାଲାଇଭ୍ ବ୍ୟୁରୋ
ବହୁଚର୍ଚ୍ଚିତ କୁନ୍ଦୁଲି ଗଣଦୁଷ୍କର୍ମ ଓ ଆତ୍ମହତ୍ୟା ଘଟଣାରେ ଚୂଡାନ୍ତ ଏସ୍ଆଇଟି ରିପୋର୍ଟ ହାଇକୋର୍ଟରେ ଦାଖଲ ହୋଇଛି। ଏହି ରିପୋର୍ଟକୁ ଟ୍ରାଏଲ କୋର୍ଟରେ ମଧ୍ୟ ଦାଖଲ କରିବାକୁ ହାଇକୋର୍ଟ ନିର୍ଦ୍ଦେଶ ଦେଇଛନ୍ତି।
ଡିସେମ୍ଵର ୧୬ ତାରିଖରେ କୁନ୍ଦୁଲି ମାମଲାର ପ୍ରାଥମିକ ରିପୋର୍ଟ ହାଇକୋର୍ଟରେ ଦାଖଲ ହୋଇଥିଲା। ଏହାର ଚୂଡ଼ାନ୍ତ ରିପୋର୍ଟ ପାଇଁ ସପ୍ତାହେ ସମୟ ମାଗିଥିଲା ଏସ୍ଆଇଟି। ହାଇକୋର୍ଟ ଏସ୍ଆଇଟିକୁ ଏହି ରିପୋର୍ଟ ଦାଖଲ କରିବାକୁ ଡିସେମ୍ଵର ୨୩ ପର୍ଯ୍ୟନ୍ତ ସମୟ ଦେଇଥିଲେ।
ଗତ ଡିସେମ୍ଵର ୩ ତାରିଖରେ କୁନ୍ଦୁଲି ଦୁଷ୍କର୍ମ ଓ ଆତ୍ମହତ୍ୟା ଘଟଣାର ଏସ୍ଆଇଟି ତଦନ୍ତ ଆରମ୍ଭ ହୋଇଥିଲା। ଏସ୍ଆଇଟିର ଏକ ୩ ଜଣିଆ ଟିମ୍ ପୀଡ଼ିତାଙ୍କ ଗାଁକୁ ଯାଇ ତଦନ୍ତ କରିଥିଲେ। ଯେଉଁ ସ୍ଥାନରେ ଦୁଷ୍କର୍ମ ଅଭିଯୋଗ ହୋଇଥିଲା, ସେହି ସ୍ଥାନ ବୁଲି ଦେଖିଥିଲେ। ଏହାସହ ପୀଡ଼ିତାଙ୍କ ଚିକିତ୍ସା କରୁଥିବା ଡାକ୍ତରଙ୍କଠାରୁ ମଧ୍ୟ ତଥ୍ୟ ସଂଗ୍ରହ କରିଥିଲେ।
ହାଇକୋର୍ଟଙ୍କ ନିର୍ଦ୍ଦେଶରେ ଏହି ତଦନ୍ତ ଆରମ୍ଭ ହୋଇଥିଲା। ଡିଆଇଜି ସଫିକ୍ ଅହମ୍ମଦ କେ, ସତ୍ୟବ୍ରତ ଭୋଇ ଏବଂ ହିମାଂଶୁ ଲାଲ୍ଙ୍କୁ ନେଇ ଗଠିତ ତିନି ଜଣିଆ ଏସ୍ଆଇଟି ଏହି ମାମଲାର ତଦନ୍ତ କରିଥିଲେ।
କୋରାପୁଟ ଜିଲ୍ଲା କୁନ୍ଦୁଲିରେ ଘଟିଥିଲା ଏହି ଲୋମହର୍ଷଣ ଘଟଣା। ଗୋଟେ ଝିଅଟି ସ୍କୁଲରୁ ଘରକୁ ଫେରୁଥିବା ବେଳେ ଯବାନଙ୍କ ପୋଷାକ ପିନ୍ଧିଥିବା କେତେକ ଲୋକ ତାଙ୍କୁ ଟେକି ନେଇ ଜଙ୍ଗଲ ଭିତରେ ଗଣଦୁଷ୍କର୍ମ କରିଥିଲେ। ପରେ ପୀଡ଼ିତାଙ୍କୁ ଗୁରୁତର ଅବସ୍ଥାରେ କୁନ୍ଦୁଲି ଡାକ୍ତରଖାନାରେ ଭର୍ତ୍ତି କରାଯାଇଥିଲା। ନ୍ୟାୟ ମାଗି ଶେଷରେ ପୀଡ଼ିତା ୨୦୧୮ ଜାନୁଆରି ୨୨ରେ ଆତ୍ମହତ୍ୟା କରିଥିଲେ।
