ଓଡ଼ିଶାଲାଇଭ୍ ବ୍ୟୁରୋ
କାନ୍ଦ ବୋବାଳିରେ ଫାଟି ପଡ଼ୁଛି ଓଡ଼ିଆ ସହିଦ ଯବାନ ସରୋଜ କୁମାର ଦାସଙ୍କ ଜନ୍ମମାଟି କେନ୍ଦୁଢ଼ିପ।
ସିକ୍କିମରେ ଆସିଥିବା ପ୍ରଳୟଙ୍କରୀ ବନ୍ୟାରେ ସହିଦ ହୋଇଥିବା ଓଡ଼ିଆ ଯବାନ ସରୋଜ କୁମାର ଦାସଙ୍କ ପାର୍ଥିବ ଶରୀର ଶନିବାର ଦିନ ଜନ୍ମମାଟିରେ ପହଞ୍ଚିବ। ଏ ନେଇ ଜିଲ୍ଲା ପ୍ରଶାସନ ପକ୍ଷରୁ ସୂଚନା ଦିଆଯାଇଛି। ସରୋଜଙ୍କ ପାର୍ଥିବ ଶରୀର ସିକ୍କିମରୁ ଭୁବନେଶ୍ୱରରେ ପହଞ୍ଚିବା ପରେ ସେଠାରୁ ତାଙ୍କ ଜନ୍ମମାଟି ଢେଙ୍କାନାଳ ଜିଲ୍ଲା କାମାକ୍ଷାନଗରର କେନ୍ଦୁଢ଼ିପକୁ ଅଣାଯିବ।
ଗାଁରେ ସହିଦଙ୍କ ପାର୍ଥିବ ଶରୀରକୁ ନେଇ ଏକ ଶୋଭାଯାତ୍ରା କରାଯିବ। ରାଷ୍ଟ୍ରୀୟ ମର୍ଯ୍ୟାଦାର ସହ ସହିଦଙ୍କର ଶେଷକୃତ୍ୟ ସମ୍ପନ୍ନ ହେବ।
ସରୋଜଙ୍କ ପାଇଁ ଲୁହରେ ଭିଜିଛି କାନ୍ଦୁଢ଼ିପ। ଯାହା ଆଖିକୁ ଦେଖିବ ବୋହୁଛି ଧାର ଧାର ଲୁହ। ବାପା ମା’ଙ୍କର ହୃଦୟ ଫଟା କାନ୍ଦକୁ ଦେଖି କେହି କୋହ ସମ୍ଭାଳି ପାରୁନାହାନ୍ତି। ନୂଆ କରି ସଂସାର ଗଢ଼ଗବାର ସ୍ଵପ୍ନ ଦେଖିଥିବା ପତ୍ନୀଙ୍କ ଆଖିରୁ ଲୁହ ସୁଖୁନି। ସହିଦଙ୍କ ଘରେ ଚାରି ଦିନ ହେଲା ବନ୍ଧୁବାନ୍ଧବ, ସାଙ୍ଗ ସାଥୀ ଏବଂ ଗ୍ରାମବାସୀ ସମସ୍ତେ ଗୁମୁରି କାନ୍ଦୁଛନ୍ତି।
ସିକ୍କିମରେ ଆସିଥିବା ଆକସ୍ମିକ ବନ୍ୟାରେ ମଙ୍ଗଳବାର ବିଳମ୍ବିତ ରାତିରେ ଭାରତୀୟ ସେନାର ୨୩ ଜଣ ଯବାନ ଭାସିଯାଇ ନିଖୋଜ ହୋଇଯାଇଥିଲେ। ସେମାନଙ୍କ ମଧ୍ୟରେ ଥିଲେ ଢେଙ୍କାନାଳ ଜିଲ୍ଲା କାମାକ୍ଷାନଗର କେନ୍ଦୁଢ଼ିପର ଓଡ଼ିଆ ଯବାନ ସରୋଜ କୁମାର ଦାସ। ଗୁରୁବାର ଦିନ ସରୋଜ କୁମାର ଦାସ ସହିଦ ହୋଇଥିବା ଖବର ଆସିଥିଲା।
ସରୋଜ କୁମାର ଦାସ ୨୦୧୨ ମସିହାରେ ଭାରତୀୟ ସେନାରେ ନିଯୁକ୍ତ ହୋଇଥିଲେ। ପରିବାରରେ ସବୁଠୁ ସାନ ପୁଅ ହେଉଛନ୍ତି ସରୋଜ। ୨୦୨୩ ମସିହା ଫେବ୍ରୁଆରି ମାସରେ ତାଙ୍କର ବିବାହ ହୋଇଥିଲା।
Tags: #Sikkim #Floods #sahid #martyred #HeavyRainfall #TeestaRiver #IndianArmyJawans #India
