ପୁଷ୍ପମିତ୍ର ମହାନ୍ତି
ଭାରତରେ କର୍ମଚାରୀମାନେ ଅଫିସରୁ କାର୍ଯ୍ୟ କରିବାକୁ ଭଲ ପାଆନ୍ତି। ବିଶ୍ୱସ୍ତରୀୟ ରିଅଲ୍ ଇଷ୍ଟେଟ୍ ସେବା ସଂସ୍ଥା ‘ଜେଏଲ୍ଏଲ୍’ର ଏକ ସର୍ଭେ ଅନୁସାରେ ପ୍ରାୟ ୯୦ ପ୍ରତିଶତ ଭାରତୀୟ କର୍ମଚାରୀ କାର୍ଯ୍ୟାଳୟ ଭିତ୍ତିକ କାର୍ଯ୍ୟକୁ ଅଧିକ ପସନ୍ଦ କରନ୍ତି। ଏହାସହ ଅଧିକାଂଶ ସଂସ୍ଥା କର୍ମଚାରୀଙ୍କୁ ସପ୍ତାହରେ ଅତି କମରେ ତିନି ଦିନ ଅଫିସରୁ କାମ କରିବାକୁ ବାଧ୍ୟ କରନ୍ତି।
ବିଶ୍ୱରେ ହାରାହାରି ୮୫ ପ୍ରତିଶତ କର୍ମଚାରୀ ଅଫିସରୁ କାମ କରିବାକୁ ପସନ୍ଦ କରୁଥିବାବେଳେ ଏ କ୍ଷେତ୍ରରେ ଭାରତ ଆଗୁଆ ରହିଛି। ଏହା ଭାରତକୁ କାର୍ଯ୍ୟାଳୟ ଭିତ୍ତିକ କାର୍ଯ୍ୟ ପାଇଁ ପସନ୍ଦ କରୁଥିବା ଶୀର୍ଷ ଦେଶମାନଙ୍କ ମଧ୍ୟରେ ସ୍ଥାନିତ କରିଛି। ଆଗକୁ ଏହି ଧାରା ଆହୁରି ବଢ଼ିବ ବୋଲି ଆକଳନ କରାଯାଉଛି।
ଏହି ସର୍ଭେ ଅନୁସାରେ ବ୍ୟବସାୟୀମାନେ ସେମାନଙ୍କ କାର୍ଯ୍ୟରେ ଆର୍ଟିଫିସିଆଲ ଇଣ୍ଟେଲିଜେନ୍ସ (ଏଆଇ)କୁ ଅଧିକରୁ ଅଧିକ ଗ୍ରହଣ କରୁଥିବାରୁ ଭାରତୀୟ କର୍ମକ୍ଷେତ୍ରରେ ଉଲ୍ଲେଖନୀୟ ପରିବର୍ତ୍ତନ ଘଟୁଥିବା କୁହାଯାଉଛି। ଭାରତରେ ୯୫ ପ୍ରତିଶତ ବ୍ୟବସାୟୀ ଆସନ୍ତା ୫ ବର୍ଷ ମଧ୍ୟରେ ଏଆଇରେ ପୁଞ୍ଜିନିବେଶକୁ ତ୍ୱରାନ୍ୱିତ କରିବାକୁ ଯୋଜନା କରୁଥିବା କୁହାଯାଉଛି।
ଏହି ସର୍ଭେ ଏକ ବିଶ୍ୱସ୍ତରୀୟ ଗବେଷଣା ପଦକ୍ଷେପର ଏକ ଅଂଶ ଯାହା ୨,୩୦୦ରୁ ଅଧିକ କର୍ପୋରେଟ୍ ରିଅଲ୍ ଇଷ୍ଟେଟ୍ (ସିଆରଇ) ଏବଂ ବିଜିନେସ ପ୍ରୋଫେସନାଲ୍ସଙ୍କୁ ନେଇ କରାଯାଇଥିଲା। କର୍ପୋରେଟ କ୍ଷେତ୍ରରେ ସ୍ଥାୟୀତା ଉପରେ ବଢ଼ୁଥିବା ଗୁରୁତ୍ୱ ଉପରେ ମଧ୍ୟ ସର୍ଭେରେ ଆଲୋକପାତ କରାଯାଇଛି।
ସର୍ଭେରେ ସାମିଲ ହୋଇଥିବା ୭୦ ପ୍ରତିଶତରୁ ଅଧିକ ସଂସ୍ଥା ପରିବେଶ ଅନୁକୂଳ କାମ କରିବାକୁ ଦୀର୍ଘ ମିଆଦି ଯୋଜନାରେ ଖର୍ଚ୍ଚ କରିବାକୁ ଯୋଜନା କରିଥିବା କୁହାଯାଉଛି। ଏହାବ୍ୟତୀତ ପ୍ରାୟ ୫୦ ପ୍ରତିଶତ ସଂସ୍ଥା ୨୦୩୦ ସୁଦ୍ଧା ଉଚ୍ଚସ୍ତରୀୟ ସବୁଜ ପ୍ରମାଣପତ୍ର ଥିବା କୋଠାଗୁଡ଼ିକ ପାଇଁ ପ୍ରିମିୟମ ଦେବାକୁ ଇଚ୍ଛା ପ୍ରକାଶ କରିଛନ୍ତି।
ତେବେ ସକାରାତ୍ମକ ଧାରା ସତ୍ତ୍ୱେ ଆହ୍ୱାନ ଜାରି ରହିଛି। ଦ୍ରୁତ ଗତିରେ ବଦଳୁଥିବା ସାଂଗଠନିକ ଦୃଶ୍ୟପଟ୍ଟ ଯୋଗୁଁ ପ୍ରାୟ ଅନେକ ରିଅଲ୍ ଇଷ୍ଟେଟ୍ ପ୍ରୋଫେସନାଲ୍ସ ଦୀର୍ଘ ମିଆଦି ଯୋଜନାରେ ଅସୁବିଧା ବିଷୟରେ ସୂଚନା ଦେଇଛନ୍ତି।
ଏତଦ୍ବ୍ୟତୀତ ଏହି ସର୍ଭେରେ ପୋର୍ଟଫୋଲିଓ ଦକ୍ଷତା ଏବଂ ଭବିଷ୍ୟତରେ ପ୍ରସ୍ତୁତ କର୍ମକ୍ଷେତ୍ର ସମାଧାନ ହାସଲ କରିବା ପାଇଁ ଭାଗିଦାରୀକୁ ପ୍ରୋତ୍ସାହିତ କରିବା ଏବଂ କର୍ପୋରେଟ୍ ଲକ୍ଷ୍ୟଗୁଡ଼ିକୁ ସିଆରଇ ଉଦ୍ଦେଶ୍ୟ ସହିତ ଯୋଡ଼ିବା ଗୁରୁତ୍ୱପୂର୍ଣ୍ଣ ବୋଲି ଗୁରୁତ୍ୱାରୋପ କରାଯାଇଛି। ଏହା ପ୍ରଯୁକ୍ତି ବିଦ୍ୟା ଏବଂ ସ୍ଥାୟୀତା ଦ୍ୱାରା ପରିଚାଳିତ ଭାରତର କର୍ମକ୍ଷେତ୍ର ବିକାଶର ଏକ ଆଶାଜନକ ଚିତ୍ର ଚିତ୍ରଣ କରିବା ସହିତ ସୁଗମ ପରିବର୍ତ୍ତନ ପାଇଁ ଧ୍ୟାନ ଆବଶ୍ୟକ କରୁଥିବା କ୍ଷେତ୍ର ଉପରେ ମଧ୍ୟ ଆଲୋକପାତ କରିଛି।
Tags: #Employees #Office #WorkCulture #WorkfromHome #India
