ଓଡ଼ିଶାଲାଇଭ୍ ବ୍ୟୁରୋ
ଚଳିତବର୍ଷ କରୋନା କଟକଣା ମଧ୍ୟରେ ବାହାରିନରେ ଓଡ଼ିଆ ସମାଜ ପକ୍ଷରୁ ରଥଯାତ୍ରା ପାଳିତ ହୋଇଛି। ପ୍ରତିବର୍ଷ ମାନାମାସ୍ଥିତ ଶ୍ରୀକୃଷ୍ଣ ମନ୍ଦିର ପରିସରରେ ୫୦୦୦ରୁ ଅଧିକ ଭକ୍ତ ପବିତ୍ର ରଥ ଦଉଡ଼ି ଟାଣି ଏହି ଯାତ୍ରା ପାଳନ କରିଥାନ୍ତି। ଏ ବର୍ଷ କରୋନା ମହାମାରୀ ପାଇଁ ସରକାରଙ୍କ ଦ୍ୱାରା ଦିଆଯାଇଥିବା ନିର୍ଦ୍ଦେଶାବଳୀ ଯୋଗୁଁ ବାହାରିନ ଓଡିଆ ସମାଜର ପ୍ରତିଷ୍ଠାତା ତଥା ସଭାପତି ଡକ୍ଟର ଅରୁଣ କୁମାର ପ୍ରହରାଜଙ୍କ ବାସଭବନରେ ସମସ୍ତ ପାରମ୍ପରିକ ରୀତିନୀତିରେ ରଥଯାତ୍ରା ପାଳିତ ହୋଇଥିଲା।
ଏହି ପବିତ୍ର ଉତ୍ସବରେ ଡକ୍ଟର ପ୍ରହରାଜଙ୍କ ପରିବାର ସଦସ୍ୟଙ୍କ ସମେତ ସୀମିତ ଭକ୍ତ ସାମିଲ ହୋଇଥିଲେ। ଏହି ଉତ୍ସବରେ ସାମିଲ ହୋଇଥିବା ସମସ୍ତଙ୍କ ଭକ୍ତଙ୍କର କରୋନା ସ୍କ୍ରିନିଂ ମଧ୍ୟ କରାଯାଇଥିଲା।
“ଗତ ୨୩ ବର୍ଷ ଧରି ବାହାରିନ ଇସ୍କନ ମନ୍ଦିର ସହ ମିଶି ଓଡ଼ିଆ ସମାଜ ରଥଯାତ୍ରା ପାଳନ କରିଆସୁଛି। ଏହି ବର୍ଷ କିନ୍ତୁ ମାରାତ୍ମକ କରୋନା ମହାମାରୀ ମୋଗଲ ଆକ୍ରମଣ ସମୟରେ ଆମେ ଯାହା ସାମ୍ନା କରିଥିଲୁ ସେହିପରି ପରିସ୍ଥିତି ସୃଷ୍ଟି କରିଥିଲା। ସେଥିପାଇଁ ଆମକୁ ଏ ବର୍ଷ ସମସ୍ତ ରୀତିନୀତିକୁ ଅତି ସତର୍କତାର ସହିତ ଏବଂ ସୀମିତ ଭକ୍ତଙ୍କ ଉପସ୍ଥିତିରେ କରିବାକୁ ପଡିଲା। ତଥାପି ଏ ବର୍ଷ ରଥଯାତ୍ରା ପାଳନ ପାଇଁ ସୁଯୋଗ ଦେଇଥିବାରୁ ମୁଁ ବାହାରିନ ଇସ୍କନ ମନ୍ଦିର ଓ ସରକାରଙ୍କୁ ଧନ୍ୟବାଦ ଜଣାଉଛି’’ କହିଛନ୍ତି ଡକ୍ଟର ଅରୁଣ କୁମାର ପ୍ରହରାଜ।
ସେହିପରି ସାଢେ ୪ କୋଟି ଓଡ଼ିଆଙ୍କ ଭାବାନାକୁ ସମ୍ମାନ ଜଣାଇ କୋଭିଡ କଟକଣା ଭିତରେ ପୁରୀରେ ରଥଯାତ୍ରା ପାଳନ ପାଇଁ ଅନୁମତି ଦେଇଥିବାରୁ ଡକ୍ଟର ପ୍ରହରାଜ ମୋଦୀ ସରକାରଙ୍କୁ ଧନ୍ୟବାଦ ଜଣାଇଛନ୍ତି। ପରମ୍ପରାକୁ ବଜାୟ ରଖିବା ପାଇଁ ଓଡ଼ିଶା ସରକାର ଓ ଗଜପତି ମହାରାଜା ଦିବ୍ୟସିଂହ ଦେବଙ୍କ ପ୍ରୟାସ ଯୋଗୁଁ ସେ ତାଙ୍କ ନିକଟରେ ମଧ୍ୟ କୃତଜ୍ଞତା ଜଣାଇଛନ୍ତି।
ଇସ୍କନ ବାହାରିନ ନିଜ ନେଟୱାର୍କ ମାଧ୍ୟମରେ ଏହି ଇଭେଣ୍ଟର ବିଶ୍ୱବ୍ୟାପୀ ଅନଲାଇନ୍ ଟେଲିକାଷ୍ଟର ବ୍ୟବସ୍ଥା କରିଥିଲା ଏବଂ ଏହା ସମସ୍ତ ଭକ୍ତଙ୍କ ପାଇଁ ଏକ ଆନନ୍ଦଦାୟକ ମୁହୂର୍ତ୍ତ ଥିଲା।
ଭଜନ, କୀର୍ତ୍ତନ, ଛପନ ଭୋଗ, ମହାପ୍ରସାଦରେ ଏହି ପବିତ୍ର କାର୍ଯ୍ୟକ୍ରମ ଦିନସାରା ଜାରି ରହିଥିଲା। ପୂଜା ପରେ ପ୍ରଭୁ ଜଗନ୍ନାଥ ଭାଇ ଭଉଣୀଙ୍କୁ ଧରି ଇସ୍କନ ମନ୍ଦିରକୁ ଫେରିଥିଲେ। ଡକ୍ଟର ପ୍ରହରାଜ ଓ ତାଙ୍କ କାର୍ଯ୍ୟନିର୍ବାହୀ କମିଟି ସଦସ୍ୟ ସୁବାସ ସାହୁ, ରମେଶ ପାଣିଗ୍ରାହି, ହିମାଂଶୁ ତାଲଡି ବିଶ୍ୱକୁ କରୋନା ମୁକ୍ତ କରିବାକୁ ପ୍ରଭୁଙ୍କ ନିକଟରେ ପ୍ରାର୍ଥନା କରିଥିଲେ।
