ଓଡ଼ିଶାଲାଇଭ୍ ବ୍ୟୁରୋ
ଆଇସିସି କ୍ରିକେଟ ବିଶ୍ଵକପରେ ସୋମବାର ଖେଳାଯାଉଛି ଆଫଗାନିସ୍ତାନ ଓ ଶ୍ରୀଲଙ୍କା ମଧ୍ୟରେ ମ୍ୟାଚ। ଏଥିରେ ଶ୍ରୀଲଙ୍କା ପ୍ରଥମେ ବ୍ୟାଟିଂ କରି ଆଫଗାନିସ୍ତାନ ଆଗରେ ୨୪୨ ରନର ବିଜୟ ଲକ୍ଷ୍ୟ ରଖିଛି। ମହାରାଷ୍ଟ୍ରର ପୁଣେରେ ଏହି ମ୍ୟାଚଟି ଖେଳାଯାଉଛି।
ମ୍ୟାଚ ଆରମ୍ଭରେ ଆଫଗାନିସ୍ତାନ ଟସ୍ ଜିତି ବୋଲିଂ ନିଷ୍ପତ୍ତି ନେଇଥିଲା। ଶ୍ରୀଲଙ୍କା ପକ୍ଷରୁ ପ୍ରମୁଥ ନିଶଙ୍କା ଓ ଦିମୁଥ କରୁଣାରତ୍ନେଙ୍କ ଯୋଡ଼ି ବ୍ୟାଟିଂ କରିବାକୁ ଓହ୍ଲାଇଥିଲେ। ଆଫଗାନୀ ବୋଲରମାନେ ଆରମ୍ଭରୁ ସେମାନଙ୍କ ଉପରେ ଚାପ ପକାଇବା ଆରମ୍ଭ କରିଥିଲେ। ଦଳୀୟ ସ୍କୋର ୨୨ ହୋଇଥିବାବେଳେ କରୁଣାରତ୍ନେଙ୍କ ୱିକେଟ ପଡ଼ିଥିଲା।
ଏହାପରେ ଶ୍ରୀଲଙ୍କାର ବ୍ୟାଟ୍ସମ୍ୟାନମାନେ ଛୋଟ ଛୋଟ ପାର୍ଟନରସିପ କରି ଦଳୀୟ ସ୍କୋରକୁ ଆଗକୁ ବଢ଼ାଇଥିଲେ। ଆଫଗାନିସ୍ତାନର ବୋଲରମାନେ ନିୟମିତ ଅନ୍ତରାଳରେ ୱିକେଟ ନେଉଥିଲେ। ଶେଷରେ ୪୯.୩ ଓଭରରେ ଶ୍ରୀଲଙ୍କା ୨୪୧ ରନରେ ଅଲଆଉଟ ହୋଇଥିଲା। ଆଫଗାନିସ୍ତାନର ଫଜଲ୍ଲା ଫାରୁକି ସର୍ବାଧିକ ୪ଟି ୱିକେଟ ନେଇଥିଲେ।
ଏବେ ଆଫଗାନିସ୍ତାନର ବ୍ୟାଟ୍ସମ୍ୟାନମାନେ ଦ୍ଵିତୀୟ ଇନିଂସରେ ବ୍ୟାଟିଂ ଆରମ୍ଭ କରିଛନ୍ତି। ୧୦ ଓଭର ଖେଳ ସୁଦ୍ଧା ଦଳ ଗୋଟିଏ ୱିକେଟ ହରାଇ ୫୦ ରନ ସଂଗ୍ରହ କରିଛି।
ଏହି ବିଶ୍ଵକପରେ ଆଫଗାନିସ୍ତାନ ଓ ଶ୍ରୀଲଙ୍କା ୫ଟି ମ୍ୟାଚ ଖେଳି ସେଥିରୁ ୨ଟି ମ୍ୟାଚ ଜିତିଛନ୍ତି। ତେବେ ଉଭୟ ଦଳ ଆଜିର ମୁକବିଲା ଜିତି ବିଶ୍ଵକପରେ ନିଜର ପ୍ରଦର୍ଶନକୁ ଉନ୍ନତ କରିବା ଲକ୍ଷ୍ୟରେ ପଡ଼ିଆକୁ ଓହ୍ଲାଇଛନ୍ତି।
Tags: #ICCCricketWorldCup #AfghanistanvsSriLanka #Cricket #Sports
