ଆଜିର ବଡ଼ ଖବର (ଜୁନ୍ ୧, ୨୦୧୮)

June 1, 2018

ଓଡ଼ିଶାଲାଇଭ୍‌ ବ୍ୟୁରୋ

ଓଡ଼ିଶା ସହ ଦେଶ ବିଦେଶର ପ୍ରମୁଖ ଖବର ପଢ଼ିବାକୁ କ୍ଲିକ୍ କରନ୍ତୁ ଓଡ଼ିଶାଲାଇଭ୍‌ର ‘ଆଜିର ବଡ଼ ଖବର’।

ସ୍ପେନ ଯିବ ଭାରତୀୟ ମହିଳା ହକି ଟିମ୍, ୫ ଓଡ଼ିଆ ଖେଳାଳି ସାମିଲ୍

ଜୁନ୍ ୧୨ରେ ସ୍ପେନ ଗସ୍ତରେ ଯାଉଛି ଭାରତୀୟ ମହିଳା ହକି ଟିମ୍। ହକି ଇଣ୍ଡିଆ ପକ୍ଷରୁ ୨୦ ଜଣିଆ ଟିମ୍ ଘୋଷଣା କରାଯାଇଛି। ଏଥିରେ ଓଡ଼ିଶାର ୫ ଖେଳାଳି ସାମିଲ ହୋଇଛନ୍ତି।

ବିଜେପିକୁ ଘାରିଲା ମହାନଦୀ ଚିନ୍ତା

ମହାନଦୀ ପାଲଟିଲା ମହାପ୍ରସଙ୍ଗ। ୨୦୧୯ ନିର୍ବାଚନ ପୂର୍ବରୁ ବିଜେଡି ମହାନଦୀକୁ ଅସ୍ତ୍ର କରିଥିବା ବେଳେ ବିଜେପିକୁ ଏବେ ମହାନଦୀ ଚିନ୍ତା ଘାରିଛି। ବିଳମ୍ବରେ ହେଲେ ବି ବିଜେପି ମହାନଦୀ ପ୍ରସଙ୍ଗରେ ମୁହଁ ଖୋଲି ଛତିଶଗଡ଼ ଭୁଲ୍ କରିଛି ବୋଲି କହିଛି। ମହାନଦୀ ପାଣିକୁ ଅସ୍ତ୍ର କରି ବିଜେଡି ଦୁଇ ପାଦ ଆଗରେ ରହିଛି। ମହାନଦୀର ସୁରକ୍ଷା ପାଇଁ ବିଜେଡି ଆନ୍ଦୋଳନକୁ ଓହ୍ଲାଇ ଲୋକଙ୍କ ସମର୍ଥନ ହାସଲ କରିଛି। ମହାନଦୀର ଦୁର୍ଦ୍ଦଶା ପାଇଁ ଛତିଶଗଡ଼ ଏବଂ କେନ୍ଦ୍ର ବିଜେପି ସରକାରକୁ ଦାୟୀ କରିଛି ବିଜେଡି।

୨୦୧୯ରେ ଏକାଠି ଲଢ଼ିବେ ଜେଡିଏସ୍‌-କଂଗ୍ରେସ

କର୍ଣ୍ଣାଟକରେ ପଡ଼ିଲା ମେଣ୍ଟ ମୂଳଦୁଆ। ୨୦୧୯ରେ କଂଗ୍ରେସ-ଜେଡିଏସ୍ ଏକାଠି ଲଢ଼ିବେ ନିର୍ବାଚନ। ଏନେଇ ଘୋଷଣା କରିଛନ୍ତି କର୍ଣ୍ଣାଟକ କଂଗ୍ରେସର ବରିଷ୍ଠ ନେତା କେ ସି ବଣେୁଗୋପାଳ। କର୍ଣ୍ଣାଟକରେ ମନ୍ତ୍ରିମଣ୍ଡଳ ଗଠନ ନେଇ ଆଜି ବୈଠକ ବସିଥିଲା। ଏହି ବୈଠକ ପୂର୍ବରୁ ଉଭୟ ଦଳ ଭିତରେ ପ୍ରାକ୍ ନିର୍ବାଚନୀ ମେଣ୍ଟ ହୋଇଥିବା ବେଣୁଗୋପାଳ କହିଛନ୍ତି।

୪୮ ମାସରେ ଓଡ଼ିଶା ପାଇଁ କ’ଣ କରିଛି କେନ୍ଦ୍ର? ଧର୍ମେନ୍ଦ୍ର ଦେଲେ ରିପୋର୍ଟ

ମେ’ ୨୬ରେ ନରେନ୍ଦ୍ର ମୋଦିଙ୍କ ନେତୃତ୍ୱାଧୀନ କେନ୍ଦ୍ର ସରକାରକୁ ପୂରିଛି ଚାରି ବର୍ଷ। ଏହି ଅବସରରେ ମୋଦି କଟକ ଆସି ଚାରି ବର୍ଷର ସଫଳତା ବଖାଣି ଦିଲ୍ଲୀ ଫେରି ଯାଇଛନ୍ତି। ତେବେ ଚାରି ବର୍ଷ ଭିତରେ କେନ୍ଦ୍ର ସରକାର କ’ଣ କରିଛନ୍ତି ତାର ହିସାବ ଦେଇଛନ୍ତି ଧର୍ମେନ୍ଦ୍ର ପ୍ରଧାନ।

ପ୍ରସନ୍ନ ଆଚାର୍ଯ୍ୟ ହେବେ ରାଜ୍ୟସଭା ଉପାଧ୍ୟକ୍ଷ ପ୍ରାର୍ଥୀ: କଂଗ୍ରେସ ଦେଇପାରେ ପ୍ରସ୍ତାବ!

କିଏ ହେବେ ରାଜ୍ୟସଭା ଉପାଧ୍ୟକ୍ଷ? ଏହି ପ୍ରସଙ୍ଗକୁ ନେଇ ଆଜି ଦିନ ତମାମ୍ ରାଜ୍ୟ ରାଜନୀତି ସରଗରମ୍ ରହିଛି। ରାଜ୍ୟସଭାର ଏହି ଗୁରୁତ୍ବପୂର୍ଣ୍ଣ ପଦବୀଟି ବିଜେଡି କିମ୍ବା ତୃଣମୂଳ କଂଗ୍ରେସ ହାତକୁ ଯାଇପାରେ ବୋଲି ଚର୍ଚ୍ଚା ହେଉଛି। ଜାତୀୟ ଗଣମାଧ୍ୟମର ରିପୋର୍ଟ ଅନୁଯାୟୀ ବିଜେଡିର ପ୍ରସନ୍ନ ଆଚାର୍ଯ୍ୟ ଏବଂ ତୃଣମୂଳ କଂଗ୍ରେସର ସୁଖେନ୍ଦୁ ଶେଖର ରାୟଙ୍କ ନାଁ ଚର୍ଚ୍ଚା ହେଉଛି। ତେବେ ଏହି ଦୁଇ ଦଳ ଭିତରୁ ବିଜେଡି ହାତକୁ ଏହି ଆସନ ଯିବାର ଅଧିକ ସମ୍ଭାବନା ରହିଥିବା ଆଲୋଚନା ହେଉଛି।