ଓଡ଼ିଶାଲାଇଭ୍ ବ୍ୟୁରୋ
ପକ୍ଷୀ ଦେଖିବାକୁ ଚିଲିକା ଯାଉଛନ୍ତି କି? ଯଦି ହଁ ତାହାଲେ ମଙ୍ଗଳାଯୋଡ଼ି ଯିବାକୁ ଆଦୌ ଭୁଲନ୍ତୁ ନାହିଁ। ଭୁବନେଶ୍ୱରରୁ ଚିଲିକା ଯିବା ରାସ୍ତାରେ ହିଁ ମଙ୍ଗଳାଯୋଡ଼ି ପଡ଼ିବ। ଏଠାରେ ଆପଣ ଭଳିକି ଭଳି ବିଦେଶୀ ପକ୍ଷୀ ଦେଖିବା ସହ ଦେଶୀ ଡଙ୍ଗାରେ ବୁଲିବାର ମଜା ନେଇ ପାରିବେ। ପ୍ରାକୃତିକ ପରିବେଶର ସୌନ୍ଦର୍ଯ୍ୟକୁ ମଧ୍ୟ ଉପଭୋଗ କରିପାରିବେ। 
ଖୋର୍ଦ୍ଧା ଜିଲ୍ଲା ଟାଙ୍ଗୀ ବ୍ଲକରେ ରହିଛି ମଙ୍ଗଳାଯୋଡ଼ି ଆର୍ଦ୍ରଭୂମି। ପର୍ଯ୍ୟଟନ ଋତୁରେ ଲକ୍ଷାଧିକ ଦେଶୀ ଓ ବିଦେଶୀ ପକ୍ଷୀମାନେ ଏଠାକୁ ଆସୁଥିବାରୁ ପକ୍ଷୀ ସମ୍ଭାର ପାଇଁ ଏହି ସ୍ଥାନଟି ବେଶ୍ ପ୍ରସିଦ୍ଧ। ତେଣୁ ମଙ୍ଗଳାଯୋଡ଼ି ରାଜ୍ୟର ଏକ ପ୍ରମୁଖ ପର୍ଯ୍ୟଟନସ୍ଥଳୀର ମାନ୍ୟତା ପାଇଛି। ପର୍ଯ୍ୟଟକମାନେ ମଧ୍ୟ ଦିନକୁ ଦିନ ମଙ୍ଗଳାଯୋଡ଼ି ପ୍ରତି ଅଧିକ ଆକର୍ଷିତ ହେଉଛନ୍ତି।
ପକ୍ଷୀ ଶିକାରୀରୁ ପକ୍ଷୀ ପୂଜାରୀ
ଦିନଥିଲା ମଙ୍ଗଳାଯୋଡ଼ି ଗ୍ରାମର ଅଧିକାଂଶ ଲୋକେ ପକ୍ଷୀ ମାରି ପେଟ ପୋଷୁଥିଲେ। ହେଲେ ଏବେ ଏ ଛବି ବଦଳିଯାଇଛି। ଯେଉଁ ଲୋକମାନେ ଦିନେ ଚଢ଼େଇ ଶିକାର କରୁଥିଲେ ଏବେ ସେମାନେ ଚଢ଼େଇ ଜଗି ପରିବାର ପ୍ରତିପୋଷଣ କରୁଛନ୍ତି ଆଉ ଅନ୍ୟମାନଙ୍କ ପାଇଁ ପ୍ରେରଣା ପାଲଟିଛନ୍ତି।
ଏହା କେବଳ ସମ୍ଭବ ହୋଇଛି କିଛି ପରିବେଶବିତ୍, ବୁଦ୍ଧିଜୀବୀ ଏବଂ ଇଣ୍ଡିଆନ୍ ଗ୍ରାମୀଣ ସର୍ଭିସ ନାମକ ଏକ ସଂସ୍ଥା ପାଇଁ। ୨୦୦୯-୧୦ ପରେ ମଙ୍ଗଳାଯୋଡ଼ିର ଭୌଗୋଳିକ ନକ୍ସା ବଦଳି ଯାଇଥିବାରୁ ଏହା ଏବେ ପର୍ଯ୍ୟଟକଙ୍କ ଆକର୍ଷଣର କେନ୍ଦ୍ରବିନ୍ଦୁ ପାଲଟିଛି।
ମଙ୍ଗଳାଯୋଡ଼ି ଗ୍ରାମରେ ପ୍ରାୟ ୮୫୦ରୁ ଅଧିକ ପରିବାର ବସବାସ କରନ୍ତି। ଏମାନଙ୍କ ମଧ୍ୟରୁ ୬୦ ପ୍ରତିଶତ ହେଉଛନ୍ତି ମତ୍ସ୍ୟଜୀବୀ। ବାକି ୪୦ ପ୍ରତିଶତ ଲୋକ ଚାଷ ଉପରେ ନିର୍ଭର କରି ଚଳିଥାନ୍ତି। ମତ୍ସ୍ୟଜୀବୀମାନେ ପ୍ରତିଦିନ ଚିଲିକାରୁ ମାଛ, କଙ୍କଡ଼ା ଧରି ଜୀବିକା ନିର୍ବାହ କରିବା ସହ ବିଭିନ୍ନ ପ୍ରଜାତିର ଚଢ଼େଇ ମାରୁଥିଲେ।
୧୯୯୫-୯୬ ମସିହା ପୂର୍ବରୁ ୧ ଲକ୍ଷରୁ ଊର୍ଦ୍ଧ୍ୱ ଚଢ଼େଇ ମଙ୍ଗଳାଯୋଡ଼ିକୁ ଆସୁଥିଲେ। ମାତ୍ର ଶିକାରୀଙ୍କ ପ୍ରାଦୁର୍ଭାବ ଯୋଗୁଁ ଚଢ଼େଇଙ୍କ ସଂଖ୍ୟା ହ୍ରାସ ପାଇ ଚାଲିଲା। ଏଥିରେ ପରିବେଶବିତ୍, ବୁଦ୍ଧିଜୀବୀ ଏବଂ ଚିଲିକା ଉନ୍ନୟନ କର୍ତ୍ତୃପକ୍ଷ (ସିଡିଏ) ଚିନ୍ତା ପ୍ରକଟ କରି ପକ୍ଷୀ ଶିକାର ବନ୍ଦ କରିବାକୁ ଉଦ୍ୟମ ଆରମ୍ଭ କରିଥିଲେ। ସିଡିଏର ସିଇଓ ଡକ୍ଟର ଅଜିତ୍ କୁମାର ପଟ୍ଟନାୟକ ଏବଂ ପରିବେଶବିତ୍ ନନ୍ଦ କିଶୋର ଭୂଜବଳଙ୍କ ଉଦ୍ୟମରେ ଚଢ଼େଇ ଶିକାର ବନ୍ଦ ହୋଇଥିଲା। ଫଳରେ ୨୦୦୫-୦୬ରେ ମଙ୍ଗଳାଯୋଡ଼ିରେ ଚଢ଼େଇ ସଂଖ୍ୟା ବୃଦ୍ଧି ପାଇଲା।
୨୦୦୯-୧୦ରେ ଇଣ୍ଡିଆନ୍ ଗ୍ରାମୀଣ ସର୍ଭିସ ଏଠାରେ ପହଞ୍ଚିଥିଲେ ଏବଂ ଆରବିଏସ୍ ଫାଉଣ୍ଡେସନ ଇଣ୍ଡିଆର ସହଯୋଗରେ ଗ୍ରାମବାସୀଙ୍କୁ ରୋଜଗାରର ପନ୍ଥା ଦେଖାଇଥିଲେ। ଫଳରେ ଏଠାରେ ଏକ ଇକୋ ଟୁରିଜିମ୍ କ୍ୟାମ୍ପସ୍ ତିଆରି କରାଗଲା। ପର୍ଯ୍ୟଟକଙ୍କ ପାଇଁ ରହିବା, ଖାଇବା ସହ ବୋଟିଂ ସୁବିଧା କରାଗଲା। ଏହାଦ୍ୱାରା ସ୍ଥାନୀୟ ଲୋକେ ସିଧାସଳଖ ରୋଜଗାର ପାଇଲେ। ଯେଉଁମାନେ ପକ୍ଷୀ ଶିକାର କରୁଥିଲେ ସେମାନେ ଗାଇଡ୍, ବୋଟ ମ୍ୟାନ୍, ହସ୍ପିଟାଲିଟି, ରୋଷେଇ ଆଦି କାର୍ଯ୍ୟରେ ନିୟୋଜିତ ହେଲେ। ସେହିପରି ଆଉ କେତେକ ଲୋକେ ମଙ୍ଗଳାଯୋଡ଼ି ଆର୍ଦ୍ରଭୂମି ନିକଟରେ ଦୋକାନ କରି ଗୁଜୁରାଣ ମେଣ୍ଟାଇଲେ।
ଦିନକୁ ଦିନ ଏଠାରୁ ପର୍ଯ୍ୟଟକଙ୍କ ସଂଖ୍ୟା ବଢ଼ିବାରୁ ଲୋକେ ଦି ପଇସା ଭଲଭାବେ ରୋଜଗାର କଲେ। ଫଳରେ ଏବେ ଏହି ଗାଁର ଅର୍ଥିକ ଅବସ୍ଥା ସୁଧୁରୁଛି। ପକ୍ଷୀ ଶିକାର ଅପବାଦରୁ ମୁକୁଳି ଏବେ ମଙ୍ଗଳାଯୋଡ଼ି ପକ୍ଷୀ ସୁରକ୍ଷା ଗ୍ରାମର ଆଖ୍ୟା ପାଇଛି।
ମଙ୍ଗଳାଯୋଡ଼ିକୁ ପକ୍ଷୀ କାହିଁକି ଆସନ୍ତି ?
ଭଳିକି ଭଳି ଦେଶୀ, ବିଦେଶୀ ପକ୍ଷୀ ଦେଖିବା ପାଇଁ ଶୀତଦିନେ ପର୍ଯ୍ୟଟକମାନେ ଚିଲିକାକୁ ଛୁଟି ଆସନ୍ତି। ଚିଲିକା ଭଳି ମଙ୍ଗଳାଯୋଡ଼ିକୁ ମଧ୍ୟ ବିଭିନ୍ନ ପ୍ରଜାତିର ପକ୍ଷୀ ଆସନ୍ତି। ତେବେ ପର୍ଯ୍ୟଟକଙ୍କ ମନରେ ପ୍ରଶ୍ନ ଉଙ୍କି ମାରୁଥିବ ଯେ, ପକ୍ଷୀମାନେ ମଙ୍ଗଳାଯୋଡ଼ି କାହିଁକି ଆସନ୍ତି ? ଏହାର ପ୍ରମୁଖ କାରଣ ହେଉଛି ମଙ୍ଗଳାଯୋଡ଼ି ଆର୍ଦ୍ରଭୂମି ଅଞ୍ଚଳ। ଏଠାରେ ପକ୍ଷୀମାନଙ୍କ ପାଇଁ ପ୍ରଚୁର ଖାଦ୍ୟ ମିଳେ। ସେଥିପାଇଁ ଅଧିକାଂଶ ପକ୍ଷୀ ଚିଲିକା ଛାଡ଼ି ଏଠାରେ ରହନ୍ତି।
ଚିଲିକାରେ ୨୫୦ ପ୍ରଜାତିର ପକ୍ଷୀଙ୍କୁ ଦେଖିବାକୁ ମିଳୁଥିବା ବେଳେ ମଙ୍ଗଳାଯୋଡ଼ିରେ ୨୦୦ରୁ ଅଧିକ ପ୍ରଜାତିର ପକ୍ଷୀ ଦେଖିବାକୁ ମିଳିଥାଏ। ସାଇବେରିଆ, ମଙ୍ଗୋଲିଆ, ଲଦାଖ, ପାକିସ୍ତାନ ଏବଂ ଆଫଗାନିସ୍ତାନ ଆଦି ଅଞ୍ଚଳର ପକ୍ଷୀମାନେ ମଙ୍ଗଳାଯୋଡ଼ି ଆର୍ଦ୍ରଭୂମିରେ ଦେଖିବାକୁ ମିଳିଥାନ୍ତି।
ବିଶେଷକରି ସେପ୍ଟେମ୍ବରରୁ ମାର୍ଚ୍ଚ ମାସ ମଙ୍ଗଳାଯୋଡ଼ିରେ ପର୍ଯ୍ୟଟକଙ୍କ ଭିଡ଼ ଲାଗିଥାଏ। ଏବେ ମଙ୍ଗଳାଯୋଡ଼ିର ବିକାଶ ହେଉଥିବାରୁ ପ୍ରତିବର୍ଷ ପର୍ଯ୍ୟଟକଙ୍କ ସଂଖ୍ୟା ବଢ଼ୁଥିବା ଜଣାପଡ଼ିଛି।
କେମିତି ଯିବେ ମଙ୍ଗଳାଯୋଡ଼ି ?
ମଙ୍ଗଳାଯୋଡ଼ିକୁ ଯିବା ପାଇଁ ଉଭୟ ସଡ଼କ ଏବଂ ରେଳପଥର ସୁବିଧା ରହିଛି। ରାଜଧାନୀ ଭୁବନେଶ୍ୱରରୁ ଟାଙ୍ଗୀ ଏବଂ ଟାଙ୍ଗୀରୁ ଭୂଷଣ୍ଡପୁର ରାସ୍ତାରେ ୫ କିଲୋମିଟର ଆଗକୁ ଗଲେ ମଙ୍ଗଳାଯୋଡ଼ି ପଡ଼ିବ। ସେହିପରି ମଙ୍ଗଳାଯୋଡ଼ିର ନିକଟସ୍ଥ ଷ୍ଟେସନ ହେଉଛି କାଳୁପଡ଼ା। ଏହା ମଙ୍ଗଳାଯୋଡ଼ିରୁ ମାତ୍ର ୮ କିଲୋମିଟର ଦୂର। ତେଣୁ ଆପଣ ଟ୍ରେନରେ ମଧ୍ୟ ମଙ୍ଗଳାଯୋଡ଼ି ଯାଇାପାରିବେ।
