ଓଡ଼ିଶାଲାଇଭ୍ ବ୍ୟୁରୋ
ଫ୍ୟୁଚର ଗ୍ରୁପ୍ର ଖୁଚୁରା(ରିଟେଲ) ଓ ପାଇକାରୀ (ହୋଲ୍ସେଲ୍) ବ୍ୟବସାୟ ସମେତ ଲଜିଷ୍ଟିକ୍ସ ଓ ୱେୟାରହାଉସିଂ ବ୍ୟବସାୟକୁ ଅଧିଗ୍ରହଣ କରିବ ରିଲାଏନ୍ସ ଇଣ୍ଡଷ୍ଟ୍ରିଜ ଲିମିଟେଡର ସହଯୋଗୀ ସଂସ୍ଥା ରିଲାଏନ୍ସ ରିଟେଲ ଭେଞ୍ଚର୍ସ ଲିମିଟେଡ (ଆର୍ଆର୍ଭିଏଲ୍)। ୨୪,୭୧୩ କୋଟି ଟଙ୍କାରେ ଫ୍ୟୁଚର ଗ୍ରୁପ୍ର ଉପରୋକ୍ତ ବ୍ୟବସାୟଗୁଡ଼ିକୁ ଆର୍ଆର୍ଭିଏଲ୍ ଅଧିଗ୍ରହଣ କରୁଥିବା ସଂପର୍କରେ ଶନିବାର ଘୋଷଣା କରିଛି। ସମ୍ମିଳିତ ବୁଝାମଣାରେ ଉଲ୍ଲିଖିତ ବ୍ୟବସ୍ଥା ଅନୁଯାୟୀ ଏହି ଅଧିଗ୍ରହଣ ସମ୍ପନ୍ନ ହେବ।
ଏହି ଅଧିଗ୍ରହଣ ଯୋଜନାର ଅଂଶ ଭାବରେ ଫ୍ୟୁଚର ଗ୍ରୁପ୍ ବ୍ୟବସାୟ ପରିଚାଳନା କରୁଥିବା କେତେକ କମ୍ପାନିକୁ ଫ୍ୟୁଚର ଏଣ୍ଟରପ୍ରାଇଜେସ୍ ଲିମିଟେଡ (ଏଫଇଏଲ)ରେ ମିଶ୍ରଣ କରୁଛି। ସେହି ସମାନ ଯୋଜନାର ଅଂଶସ୍ୱରୂପ ଖୁଚୁରା ଓ ପାଇକାରୀ ବ୍ୟବସାୟ ସଂସ୍ଥାକୁ ରିଲାଏନ୍ସ ରିଟେଲ୍ (ଆର୍ଆର୍ଭିଏଲ୍)ର ପୂର୍ଣ୍ଣ ମାଲିକାନାଧୀନ ସହଯୋଗୀ କମ୍ପାନି ରିଲାଏନ୍ସ ରିଟେଲ ଆଣ୍ଡ ଫ୍ୟାଶନ ଲାଇଫଷ୍ଟାଇଲ ଲିମିଟେଡ (ଆର୍ଆର୍ଏଫ୍ଏଲ୍ଏଲ୍)କୁ ହସ୍ତାନ୍ତର କରାଯାଉଛି। ସେହିଭଳି ଲଜିଷ୍ଟିକ୍ସ ଏବଂ ୱେୟାରହାଉସିଂ ବ୍ୟବସାୟକୁ ରିଲାଏନ୍ସ ରିଟେଲ୍ (ଆର୍ଆର୍ଭିଏଲ୍)କୁ ହସ୍ତାନ୍ତର କରାଯାଉଛି।
ଏଥିସହିତ ରିଲାଏନ୍ସ ରିଟେଲ ଆଣ୍ଡ ଫ୍ୟାଶନ ଲାଇଫଷ୍ଟାଇଲ ଲିମିଟେଡ (ଆର୍ଆର୍ଏଫ୍ଏଲ୍ଏଲ୍) ମିଶ୍ରଣ ପରବର୍ତ୍ତୀ ଫ୍ୟୁଚର ଏଣ୍ଟରପ୍ରାଇଜେସ୍ ଲିମିଟେଡ (ଏଫଇଏଲ)ର ପ୍ରିଫରେନ୍ସିଆଲ ଇସ୍ୟୁରେ ୬.୦୯ ପ୍ରତିଶତ ଇକ୍ୱିଟି ଅଂଶ ଅଧିଗ୍ରହଣ ନିମନ୍ତେ ୧୨୦୦ କୋଟି ଟଙ୍କା ପୁଞ୍ଜିନିବେଶ କରିବାକୁ ପ୍ରସ୍ତାବ ରଖିଛି।
ସେହିଭଳି ଇକ୍ୱିଟି ୱାରାଣ୍ଟର ଏକ ପ୍ରିଫରେନ୍ସିଆଲ ଇସ୍ୟୁରେ ଏହା ୪୦୦ କୋଟି ଟଙ୍କା ନିବେଶ କରିବ, ଯାହାର ରୂପାନ୍ତରଣ ଏବଂ ଇସ୍ୟୁ ମୂଲ୍ୟର ଅବଶିଷ୍ଟ ୭୫ ପ୍ରତିଶତ ପୈଠ ପରେ ରିଲାଏନ୍ସ ରିଟେଲ ଆଣ୍ଡ ଫ୍ୟାଶନ ଲାଇଫଷ୍ଟାଇଲ ଲିମିଟେଡ (ଆର୍ଆର୍ଏଫ୍ଏଲ୍ଏଲ୍) ପକ୍ଷରୁ ଫ୍ୟୁଚର ଏଣ୍ଟରପ୍ରାଇଜେସ୍ ଲିମିଟେଡ (ଏଫ୍ଇଏଲ୍)ର ପୁନଃ ୭.୦୫ ପ୍ରତିଶତ ଅଂଶ ଅଧିଗ୍ରହଣ ସମ୍ପନ୍ନ ହେବ।
ରିଲାଏନ୍ସ ରିଟେଲ ଭେଞ୍ଚର୍ସ ଲିମିଟେଡର ନିର୍ଦ୍ଦେଶିକା ଇଶା ଅମ୍ବାନି କହିଛନ୍ତି, “ଏହି କାରବାର ଦ୍ୱାରା ଆମେ ଆନନ୍ଦିତ ଯେ ଫ୍ୟୁଚର ଗ୍ରୁପ୍ର ପ୍ରସିଦ୍ଧ ଫର୍ମାଟ ଏବଂ ବ୍ରାଣ୍ଡଗୁଡ଼ିକୁ ଆମେ ଏକ ଆବାସ ଯୋଗାଇବା ସହ ଏହାର ବ୍ୟବସାୟ ଇକୋସିଷ୍ଟମ୍କୁ ସଂରକ୍ଷିତ କରୁଛୁ, ଯାହା ଭାରତରେ ଆଧୁନିକ ଖୁଚୁରା ବ୍ୟବସାୟର ଅଭ୍ୟୁତ୍ଥାନରେ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିଛି। କ୍ଷୁଦ୍ର ବ୍ୟବସାୟ ସଂସ୍ଥା ଏବଂ କିରାନା ଦୋକାନଗୁଡ଼ିକ ସହିତ ବୃହତ ଉପଭୋକ୍ତା ବ୍ରାଣ୍ଡଗୁଡ଼ିକର ସକ୍ରିୟ ସହଭାଗିତା ଜରିଆରେ ଖୁଚୁରା ବ୍ୟବସାୟ ଶିଳ୍ପରେ ଅଭିବୃଦ୍ଧି ଧାରା ବଜାୟ ରଖିବାକୁ ଆମେ ଆଶା ରଖିଛୁ। ସମଗ୍ର ଦେଶରେ ଆମର ଉପଭୋକ୍ତାମାନଙ୍କୁ ଉପଯୁକ୍ତ ମୂଲ୍ୟ ପ୍ରଦାନ କରବାକୁ ଆମେ ପ୍ରତିଶ୍ରୁତିବଦ୍ଧ।”
ଫ୍ୟୁଚର ଗ୍ରୁପ୍ର ଖୁଚୁରା, ପାଇକାରୀ ଏବଂ ଯୋଗାଣ ଶୃଙ୍ଖଳ ବ୍ୟବସାୟ ଅଧିଗ୍ରହଣ ରିଲାଏନ୍ସର ଖୁଚୁରା ବ୍ୟବସାୟ ପାଇଁ କୌଶଳାତ୍ମକ ଦୃଷ୍ଟିରୁ ମଜଭୁତ ତଥା ଉପଯୋଗୀ ପଦକ୍ଷେପ ଭାବେ ଗ୍ରହଣ କରାଯାଉଛି। ଏହା ରିଲାଏନ୍ସ ରିଟେଲର କୋଟି କୋଟି କ୍ଷୁଦ୍ର ବ୍ୟବସାୟୀଙ୍କୁ ସେମାନଙ୍କର ପ୍ରତିଦ୍ୱନ୍ଦ୍ୱିତା ସାମର୍ଥ୍ୟରେ ବୃଦ୍ଧି ଘଟାଇବାରେ ସହାୟକ ହେବ। ଏଥିସହିତ ବର୍ତ୍ତମାନର ଆହ୍ୱାନମୂଳକ ସମୟରେ ସେମାନଙ୍କର ଆୟ ବୃଦ୍ଧିକୁ ତ୍ୱରାନ୍ୱିତ କରିବା ଦିଗରେ ବେଶ୍ ସହାୟକ ହେବ ବୋଲି ବିଚାର କରାଯାଉଛି।
ଫ୍ୟୁଚର ଗ୍ରୁପ୍ର ପୋଷାକ, ସାଧାରଣ ବିପଣନ ସାମଗ୍ରୀ ଏବଂ ନିଜସ୍ୱ ଏଫ୍ଏମ୍ସିଜି ବ୍ରାଣ୍ଡ୍ ଭଳି ବିବିଧ ଉତ୍ପାଦର ସମ୍ଭାର ଗ୍ରାହକମାନଙ୍କୁ ଏକ ବ୍ୟାପକ ସୁଯୋଗ ଆଣିଦେବ।ଏହି ଅଧିଗ୍ରହଣ ସେବି, ସିସିଆଇ, ଏନସିଏଲଟି, ଅଂଶୀଦାର (ସେୟାରହୋଲ୍ଡର୍), ଋଣପ୍ରଦାନକାରୀ ଏବଂ ଅନ୍ୟାନ୍ୟ ଆବଶ୍ୟକୀୟ ଅନୁମୋଦନ ଉପରେ ନିର୍ଭରଶୀଳ।
 ଓ ପାଇକାରୀ (ହୋଲ୍ସେଲ୍) ବ୍ୟବସାୟ ସମେତ ଲଜିଷ୍ଟିକ୍ସ ଓ ୱେୟାରହାଉସିଂ ବ୍ୟବସାୟକୁ ଅଧିଗ୍ରହଣ କରିବ ରିଲାଏନ୍ସ ଇଣ୍ଡଷ୍ଟ୍ରିଜ ଲିମିଟେଡର){kind=link}