ଓଡ଼ିଶାଲାଇଭ୍ ବ୍ୟୁରୋ
ସଙ୍କଟରେ ବଲିଉଡ ସୁପରଷ୍ଟାର ସଲମାନ ଖାନଙ୍କ ଜୀବନ। ସଲମାନଙ୍କ ପାଖକୁ ପୁଣି ଆସିଲା ପୁଣି ହତ୍ୟା ଧମକ୍। ଏବେ ଭୟରେ ଅଛନ୍ତି ଭାଇଜାନ୍।
ଏନସିପି ନେତା ବାବା ସିଦ୍ଦିକିଙ୍କୁ ଗୁଳି କରି ହତ୍ୟା କରାଯିବା ପରେ ସଲମାନ ଖାନଙ୍କ ଟେନସନ ବଢ଼ିଯାଇଥିଲା। ଏବେ ପୁଣି ସଲମାନ ଖାନଙ୍କୁ ଲରେନ୍ସ ବିଷ୍ଣୋଇ ଗ୍ୟାଙ୍ଗର ଧମକ ଆସିଛି। ମୁମ୍ବାଇ ପୋଲିସ ନିକଟକୁ ସଲମାନଙ୍କ ନାଁରେ ଆସିଛି ଧମକପୂର୍ଣ୍ଣ ମେସେଜ। ଏଥିରେ ଉଲ୍ଲେଖ କରାଯାଇଛି, ‘ସଲମାନଙ୍କ ଅବସ୍ଥା ବାବା ସିଦ୍ଦିକିଙ୍କଠାରୁ ବି ଖରାପ ହେବ।’
ସଲମାନ ଖାନ ଏବଂ ବିଷ୍ଣୋଇ ଗ୍ୟାଙ୍ଗ ମଧ୍ୟରେ ଚାଲିଥିବା ବିବାଦ ଶେଷ କରିବାକୁ ୫ କୋଟି ଟଙ୍କା ଦାବି କରାଯିବା ସହ ମେସେଜଟିକୁ ହାଲୁକା ଭାବେ ନନେବା ପାଇଁ ଉଲ୍ଲେଖ କରାଯାଇଛି। ଲରେନ୍ସ ବିଷ୍ଣୋଇ ଗ୍ୟାଙ୍ଗ ନାଁରେ ଆସିଥିବା ଏହି ମେସେଜ ପ୍ରକୃତିରେ କିଏ ପଠାଇଛି ତା’ର ସତ୍ୟାସତ୍ୟ ଜାଣିବା ପାଇଁ ମୁମ୍ବାଇ ପୋଲିସର ତନାଘନା ଆରମ୍ଭ ହୋଇଛି।
ବାରମ୍ବାର ହତ୍ୟା ଧମକକୁ ନେଇ ଚିନ୍ତାରେ ପଡ଼ିଯାଇଛନ୍ତି ସଲମାନ ଖାନ। କୃଷ୍ଣସାର ମୃଗ ଶିକାରକୁ ନେଇ ବିଷ୍ଣୋଇ ଗ୍ୟାଙ୍ଗ ଟାର୍ଗେଟରେ ରହି ଆସିଛନ୍ତି ସଲମାନ ଖାନ।
ବାବା ସିଦ୍ଦିକିଙ୍କ ହତ୍ୟା ପରେ ସଲମାନଙ୍କ ସୁରକ୍ଷା ବ୍ୟବସ୍ଥାକୁ ଆହୁରି କଡ଼ାକଡ଼ି କରାଯାଇଛି। ଏବେ ଓ୍ଵାଇ ପ୍ଲସ ସୁରକ୍ଷାରେ ରହିଛନ୍ତି ସଲମାନ।
ପୂର୍ବରୁ ମୁମ୍ବାଇ ପୋଲିସ ସଲମାନଙ୍କୁ ହତ୍ୟା ଧମକ୍ ଦେବା ମାମଲାରେ ଜଣଙ୍କୁ ଗିରଫ କରିଛି। ଗିରଫ ଅଭିଯୁକ୍ତଙ୍କ ନାଁ ସୁଖା ଓରଫ ସୁଖବୀର ବଲବୀର ସିଂହ ଏବଂ ସେ ବିଷ୍ଣୋଇ ଗ୍ୟାଙ୍ଗର ଜଣେ ସାର୍ପ ସୁଟର ବୋଲି ଜଣାପଡ଼ିଛି।
ସଲମାନଙ୍କୁ ବାରମ୍ବାର ହତ୍ୟା ଧମକ୍ ଦିଆଯାଉଥିବାରୁ ତାଙ୍କ ପରିବାର ଲୋକଙ୍କ ଚିନ୍ତା ବଢ଼ିଯାଇଛି।
Tags: #SalmanKhan #BollywoodActor #Threat #MumbaiPolice #DeathThreat
