ଓଡ଼ିଶାଲାଇଭ୍ ବ୍ୟୁରୋ
ବାଲେଶ୍ୱର: ମୃତ୍ୟୁମୁଖରୁ ସେ ଆମକୁ ଛଡ଼ାଇ ଆଣିଥାନ୍ତି । ରୋଗଶଯ୍ୟାରୁ ଉଠି ବସିବାର ଆଶା ଦେଇଥାନ୍ତି। ଆଉ ଆମେ ସବୁବେଳେ ତାଙ୍କ ପାଖକୁ ଆଶା ନେଇ ଯାଇଥାଉ। ଆମର ସେହି ଆଶା ହେଉଛି ସୁସ୍ଥ ହୋଇ ବଂଚିବା । ସେହି ଆଶା ଯିଏ ଆମ ଭିତରେ ଜନ୍ମାଇଥାନ୍ତି ସେ ହେଉଛନ୍ତି ଡାକ୍ତର। ‘ସମ୍ବାଦ’ ଉତ୍ତର ଓଡ଼ିଶା ସଂସ୍କରଣର ଚତୁର୍ଥ ବାର୍ଷିକ ‘ଜାଗୃତି’ କାର୍ଯ୍ୟକ୍ରମରେ ଡାକ୍ତରଙ୍କୁ ସମ୍ବର୍ଦ୍ଧନା କରିବା ଅବସରରେ ଅତିଥିମାନେ ଏହା କହିଛନ୍ତି।
ବାଲେଶ୍ୱର ସହରସ୍ଥିତ ଭେନିଆ ପାରାଡାଇଜ୍ ସମ୍ମିଳନୀ କକ୍ଷରେ ଆୟୋଜିତ ‘ଡାକ୍ତର ସାକ୍ଷାତ ଈଶ୍ୱର’ ଶୀର୍ଷକ ଉତ୍ସବକୁ ଉଦ୍ଘାଟନ କରିଥିଲେ ରାଜ୍ୟସଭା ସାଂସଦ ପଦ୍ମଶ୍ରୀ ଡକ୍ଟର ଦିଲୀପ ତିର୍କି। ସେବା କ୍ଷେତ୍ରରେ ଡାକ୍ତରଙ୍କ ଭୂମିକାକୁ ସେ ଉଚ୍ଚପ୍ରଶଂସା କରିବା ସହ ସେମାନଙ୍କ ପାଖକୁ ଗଲେ ନିଜ ମଧ୍ୟରେ ବଞ୍ଚି ରହିବାର ଆତ୍ମବିଶ୍ୱାସ ଜନ୍ମେ ବୋଲି କହିଥିଲେ।
ମୁଖ୍ୟ ଅତିଥି ବାଲେଶ୍ୱର ସାଂସଦ ଇଂ ରବିନ୍ଦ୍ର କୁମାର ଜେନା ସ୍ୱାସ୍ଥ୍ୟସେବା ଓ ସମସ୍ୟାର ବିଶ୍ଳେଷଣ କରିବା ସହ ସମସ୍ତଙ୍କୁ ଦାୟିତ୍ୱସମ୍ପନ୍ନ ହେବାକୁ ପରାମର୍ଶ ଦେଇଥିଲେ।
ମୁଖ୍ୟବକ୍ତା ଫକୀରମୋହନ ବିଶ୍ୱବିଦ୍ୟାଳୟର କୁଳପତି ପ୍ରଫେସର ମଧୁମିତା ଦାସ କହିଲେ, ଡାକ୍ତର ହେଉଛନ୍ତି ପ୍ରକୃତରେ ଦ୍ୱିତୀୟ ଈଶ୍ୱର। ସେମାନେ ଆମକୁ ମରଣ ମୁହଁରୁ ଛଡ଼ାଇ ଆଣିଥାନ୍ତି। ସମ୍ମାନିତ ଅତିଥି ଭାବେ ଆପୋଲୋ ହସ୍ପିଟାଲର ବରିଷ୍ଠ ହୃଦରୋଗ ବିଶେଷଜ୍ଞ ଡାକ୍ତର ବ୍ରଜରାଜ ଦାସ ମଞ୍ଚାସୀନ ଥିଲେ। ଏହି କାର୍ଯ୍ୟୟକ୍ରମରେ ପୌରୋହିତ୍ୟ କରିଥିଲେ ‘ସମ୍ବାଦ’ସମ୍ପାଦକ ସୌମ୍ୟରଞ୍ଜନନ ପଟ୍ଟନାୟକ।
ଅତିଥି ପରିଚୟ ଓ ସ୍ୱାଗତ ଭାଷଣ ଦେଇଥିଲେ ‘ସମ୍ବାଦ’ ମହାପ୍ରବନ୍ଧକ ଅରବିନ୍ଦ ଦାସ। ‘ସମ୍ବାଦ’ ବାଲେଶ୍ୱର ଜିଲ୍ଲା ପ୍ରତିନିଧି ଅବିନାଶ ମହାପାତ୍ର ପ୍ରାରମ୍ଭିକ ସୂଚନା ଦେଇଥିଲେ। ଶେଷରେ ଧନ୍ୟବାଦ ଦେଇଥିଲେ ‘ଆମ ଓଡ଼ିଶା’ର ସଂଯୋଜକ ସଂଜୟ କୁମାର ପାତ୍ର।
ଏ ଅବସରରେ ଉତ୍ତର ଓଡ଼ିଶା ତଥା ଅବିଭକ୍ତ ବାଲେଶ୍ୱର ଜିଲ୍ଲାର ୮ ଜଣ ଡାକ୍ତରଙ୍କୁ ସମ୍ବର୍ଦ୍ଧିତ କରାଯାଇଥିଲା। ସମ୍ବର୍ଦ୍ଧିତ ଡାକ୍ତରମାନଙ୍କ ମଧ୍ୟରେ ଥିଲେ ଜଣାଶୁଣା ପ୍ଲାଷ୍ଟିକ ସର୍ଜନ ତଥା ଅଶ୍ୱିନୀ ହସ୍ପିଟାଲର ପ୍ରତିଷ୍ଠାତା ଡାକ୍ତର ସୁବ୍ରତ ଜେନା, ହାଇଟେକ୍ ହସପିଟାଲର ନ୍ୟୁରୋ ସର୍ଜରୀ ବିଭାଗ ମୁଖ୍ୟ ପ୍ରଫେସର ଡାକ୍ତର ଦାମୋଦର ପଣ୍ଡା, ସମ୍ ହସପିଟାଲର ଆଇଭିଏଫ୍ ବିଭାଗ ମୁଖ୍ୟ ପ୍ରଫେସର ଡାକ୍ତର ବବିତା ପଣ୍ଡା (ସ୍ତ୍ରୀ ଓ ପ୍ରସୂତି ବିଭାଗ), ଆମ୍ରି ହସପିଟାଲର ନିର୍ଦ୍ଦେଶକ ଡାକ୍ତର ପରେଶ ଚନ୍ଦ୍ର ଦେ, ହାଇଟେକ୍ କଲେଜ ଓ ହସପିଟାଲର ଇଏନ୍ଟି ବିଶେଷଜ୍ଞ ପ୍ରଫେସର ଡାକ୍ତର ରାଜଲକ୍ଷ୍ମୀ ପାଣିଗ୍ରାହୀ, ଆପୋଲୋ ହସପିଟାଲର ବରିଷ୍ଠ ହୃଦରୋଗ ବିଶେଷଜ୍ଞ ଡାକ୍ତର ବ୍ରଜରାଜ ଦାସ ଓ ଆପୋଲୋ ହସପିଟାଲର ୟୁରୋଲୋଜି ବିଶେଷଜ୍ଞ ଡାକ୍ତର ସମୀରଣ ଦାସଅଧିକାରୀ।
