ଓଡ଼ିଶାଲାଇଭ୍ ବ୍ୟୁରୋ
କହ୍ନେୟା କୁମାରଙ୍କ ବିରୋଧରେ ଚାଲିବ ଦେଶଦ୍ରୋହ ମାମଲା। ଦେଶଦ୍ରୋହ ମାମଲା ଚାଲୁ ପାଇଁ ସ୍ପେଶାଲ ସେଲ୍କୁ ଦିଲ୍ଲୀ ସରକାର ମଞ୍ଜୁରି ଦେଇଛନ୍ତି। ଜେଏନ୍ୟୁରେ ଦେଶ ବିରୋଧୀ ନାରାବାଜି ନେଇ ଏହି ମାମଲା ଚାଲିବ। କହ୍ନେୟାଙ୍କ ସହ ଆଉ କିଛି ଛାତ୍ରଙ୍କ ନାଁରେ ମଧ୍ୟ ଦେଶଦ୍ରୋହ ମାମଲା ଚାଲିବ।
ଏହି କ୍ଷେତ୍ରରେ ସ୍ୱତନ୍ତ୍ର ସେଲକୁ ଅନୁମୋଦନ ମିଳିବା ପରେ ବର୍ତ୍ତମାନ କହ୍ନେୟା କୁମାରଙ୍କୁ ଦେଶଦ୍ରୋହ ମାମଲାରେ କୋର୍ଟ ଚାଲାଣ କରାଯିବ। ଏହି ମାମଲାରେ ଉମର ଖାଲିଦ, ଅନିରବାନ୍, ଆକିବ ହୁସେନ୍, ମୁଜିବ, ଉମର ଗୁଲ, ବଶରତ ଅଲି ଏବଂ ଖାଲିଦ ବସିରଙ୍କ ବିରୋଧରେ ମଧ୍ୟ ମାମଲା ଚାଲୁ କରିବାକୁ ଦିଲ୍ଲୀ ସରକାର ଅନୁମୋଦନ କରିଛନ୍ତି।
ନିକଟରେ ଦିଲ୍ଲୀର ପଟିୟାଲା ହାଉସ କୋର୍ଟରେ ଏହି ମାମଲାର ଶୁଣାଣି ବେଳେ ଦିଲ୍ଲୀ ପୋଲିସ କହିଥିଲା ଯେ ଦେଶଦ୍ରୋହ ମାମଲା ଦାୟର କରିବାକୁ ଦିଲ୍ଲୀ ସରକାରଙ୍କଠାରୁ ଏପର୍ଯ୍ୟନ୍ତ ଅନୁମତି ମିଳିନାହିଁ। ଏହା ପରେ କୋର୍ଟ ଦିଲ୍ଲୀ ସରକାରଙ୍କୁ ଏକ ଚିଠି ଲେଖିବାକୁ ଏବଂ ଏହା ଉପରେ ଏହାର ଆଭିମୁଖ୍ୟ ସ୍ପଷ୍ଟ କରିବାକୁ ଦିଲ୍ଲୀ ପୋଲିସ ସ୍ପେଶାଲ ସେଲକୁ ନିର୍ଦ୍ଦେଶ ଦେଇଥିଲେ।
ଏହା ପରେ ଦିଲ୍ଲୀ ପୋଲିସର ସ୍ପେଶାଲ୍ ସେଲ୍ କେଜରିଓ୍ଵାଲ ସରକାରଙ୍କୁ ଏକ ଚିଠି ଲେଖିଥିଲେ। କହ୍ନେୟା କୁମାର ଏବଂ ଅନ୍ୟମାନଙ୍କ ବିରୋଧରେ ଦେଶଦ୍ରୋହ ମାମଲା ଦାୟର କରିବାକୁ ଏହି ଚିଠିରେ ଅନୁମତି ମାଗିଥିଲା ଦିଲ୍ଲୀ ପୋଲିସ। ଏହା ପରେ ଏବେ କେଜରିଓ୍ଵାଲ ସରକାର ସ୍ୱତନ୍ତ୍ର ସେଲକୁ ଅନୁମତି ଦେଇଛନ୍ତି।
୯ ଫେବୃଆରୀ ୨୦୧୬ରେ ଜବାହରଲାଲ ନେହେରୁ ବିଶ୍ୱବିଦ୍ୟାଳୟ ପରିସରରେ ଏକ ଦେଶଦ୍ରୋହ ସ୍ଲୋଗାନର ଭିଡିଓ ଭାଇରାଲ ହୋଇଥିଲା। ଏହା ପରେ ମାମଲାର ଅନୁସନ୍ଧାନ କରାଯାଇଥିଲା ଏବଂ ତତ୍କାଳୀନ ଜେଏନୟୁ ଛାତ୍ର ସଂଘର ସଭାପତି କହ୍ନେୟା କୁମାର ଏବଂ ଅନ୍ୟମାନଙ୍କ ବିରୋଧରେ ଦେଶଦ୍ରୋହ ମାମଲା ରୁଜୁ ହୋଇଥିଲା।
କହ୍ନେୟା କୁମାର ବର୍ତ୍ତମାନ ସିପିଆଇ ନେତା ଅଛନ୍ତି। ନିକଟରେ କହ୍ନେୟା କୁମାର ମଧ୍ୟ ସିପିଆଇ ଟିକେଟ୍ରେ ବେଗୁସରାଇରୁ ଲୋକସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିଥିଲେ, କିନ୍ତୁ ତାଙ୍କୁ ସେଠାରୁ ପରାଜୟର ସାମ୍ନା କରିବାକୁ ପଡିଥିଲା।
