ଓଡ଼ିଶାଲାଇଭ୍ ପଲିଟିକାଲ ବ୍ୟୁରୋ
ଆଜି କନ୍ଧମାଳ ଲୋକସଭା ଓ ଏହା ଅଧୀନରେ ଥିବା ବିଧାନସଭା ଆସନ ପାଇଁ ଭୋଟଦାନ ଚାଲିଛି। କନ୍ଧମାଳ ଲୋକସଭା ଆସନ ପାଇଁ ଲଢେ଼ଇ ମୁଖ୍ୟତଃ ବିଜେଡିର ଅଚ୍ୟୁତ ସାମନ୍ତ ଓ ବିଜେପିର ଖାରବେଳ ସ୍ୱାଇଁଙ୍କ ମଧ୍ୟରେ ସୀମିତ ରହିଛି। କିନ୍ତୁ ଏ ଦୁଇ ଜଣ ଯାକ ବାହାରର ଲୋକ। ଅଚ୍ୟୁତ ସାମନ୍ତ ନା କନ୍ଧମାଳର ବାସିନ୍ଦା ନା ଜଣେ ଆଦିବାସୀ। ସେ କିନ୍ତୁ ଲୋକସଭାରେ ବିଜେଡିକୁ ପ୍ରତିନିଧିତ୍ୱ କରିବା ପାଇଁ ଚାହୁଁଛନ୍ତି। ସାମନ୍ତ ଯେଉଁ ଆଦିବାସୀ ସ୍କୁଲ କିଟ ପରିସରରେ କରିଛନ୍ତି ସେହି ପିଲା ଓ ତାଙ୍କ ପରିବାର ଲୋକଙ୍କ ଶୁଭେଚ୍ଛା ଉପରେ ଭରସା କରି ନିର୍ବାଚନ ମଇଦାନକୁ ଓହ୍ଲାଇଛନ୍ତି।
ସାମନ୍ତଙ୍କ ମୁଖ୍ୟ ପ୍ରତିଦ୍ୱନ୍ଦ୍ୱୀ ଖାରବେଳ ସ୍ୱାଇଁ ମଧ୍ୟ କନ୍ଧମାଳ ଭୋଟରଙ୍କ ପାଇଁ ଜଣେ ବାହାରର ଲୋକ। ଦଶ ବର୍ଷ ପରେ ବିଜେପିକୁ ଫେରିବା ସହିତ ତାଙ୍କୁ ଏଠାରୁ ପ୍ରାର୍ଥୀ କରାଯାଇଛି। କନ୍ଧମାଳ ଆସନ ପାଇଁ କଂଗ୍ରେସ ପକ୍ଷରୁ ଯାହାଙ୍କୁ ପ୍ରାର୍ଥୀ କରାଯାଇଛି – ମନୋଜ ଆଚାର୍ଯ୍ୟ – ଜଣେ କେବଳ କନ୍ଧମାଳର ବାସିନ୍ଦା। କିନ୍ତୁ ଭୋଟରମାନଙ୍କ ମଧ୍ୟରେ ତାଙ୍କର ପ୍ରଭାବ ଦେଖିବାକୁ ମିଳୁନାହିଁ।
କନ୍ଧମାଳ ଆସନ ସମ୍ପର୍କରେ ଗୋଟିଏ ଉଲ୍ଲେଖଯୋଗ୍ୟ ବିଷୟ ହେଉଛି ଯେ ଏହି ଲୋକସଭା ଆସନ ଟି ୪ ଜିଲ୍ଲାକୁ ନେଇ ଗଠିତ – କନ୍ଧମାଳ, ଗଞ୍ଜାମ, ନୟାଗଡ଼ ଓ ବୌଦ୍ଧ। ଏଣୁ ଖାରବେଳ ଯାହା କହିଛନ୍ତି, କେହି ଜାଣିନାହାନ୍ତି ଏଠି କିଏ ଘରର ଲୋକ ଓ କିଏ ବାହାରର ଲୋକ। ସାମନ୍ତଙ୍କ ଜନ୍ମସ୍ଥାନ ଜଗତସିଂହପୁର ଜିଲ୍ଲା ହୋଇଥିବା ବେଳେ ଖାରବେଳଙ୍କ ଜନ୍ମସ୍ଥାନ ହେଉଛି ବାଲେଶ୍ୱର ଜିଲ୍ଲା। ଏଣୁ ଜଣେ ଜଗତସିଂହପୁରରୁ ଓ ଆଉ ଜଣେ ବାଲେଶ୍ୱରରୁ ଆସି ଏଠି ଏମପି ପ୍ରାର୍ଥୀ ହୋଇଛନ୍ତି।
କନ୍ଧମାଳର ସବୁ ଯାକ ଆସନ ସମ୍ବେଦନଶୀଳ କାରଣ ଏଠି ହିନ୍ଦୁ-ଖ୍ରୀଷ୍ଟିଆନ ଓ ଆଦିବାସୀ-ସବର୍ଣ୍ଣ ଭୋଟର ରହନ୍ତି। ଖାଲି ସେତିକି ନୁହେଁ କନ୍ଧମାଳ ଏକ ମାଓବାଦୀ ପ୍ରବଣ ଜିଲ୍ଲା। ବୁଧବାର ଦିନ ନିର୍ବାଚନ କର୍ମଚାରୀ ସଂଯୁକ୍ତା ଦିଗଲଙ୍କୁ ମାଓବାଦୀମାନେ ହତ୍ୟା କରିଥିଲେ।
୨୦୦୯ ନିର୍ବାଚନ ପୂର୍ବରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବିଜେପି ସହିତ ସମ୍ପର୍କ ତୁଟାଇବା ପଛରେ ମଧ୍ୟ କନ୍ଧମାଳ ହିଁ କାରଣ ଥିଲା। ସାମ୍ପ୍ରଦାୟିକ ଦଙ୍ଗା ଓ ଧର୍ମ ପରିବର୍ତ୍ତନ ରାଜନୀତି ଉତ୍କଟ ହେବା ଫଳରେ ନବୀନ ବିଜେପିଠାରୁ ଅଲଗା ହୋଇଯାଇଥିଲେ। ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଭୋଟ ପ୍ରଚାର ପାଇଁ ଏଥର କନ୍ଧମାଳ ଆସିଥିଲେ। ଏହିଭଳି ସ୍ଥିତିରେ ଭୋଟରମାନେ କାହାକୁ ଅଧିକ ଭୋଟ ଦେଇ ନିର୍ବାଚିତ କରୁଛନ୍ତି ତାହା ଦେଖିବାକୁ ବାକି ରହିଲା।
