ଓଡ଼ିଶାଲାଇଭ୍ ବ୍ୟୁରୋ
ଇତିହାସ ରଚିବାକୁ ଆଉ ମାତ୍ର କିଛି କ୍ଷଣ ବାକି ରହିଲା। ଚନ୍ଦ୍ରପୃଷ୍ଠରେ ଅବତରଣ କରି ସାରା ବିଶ୍ୱରେ ନାଁ କରିବ ଭାରତ।
ଭାରତୀୟ ମହାକାଶ ଗବେଷଣା କେନ୍ଦ୍ର ‘ଇସ୍ରୋ’ ପକ୍ଷରୁ ପ୍ରେରିତ ଚନ୍ଦ୍ରଯାନ-୨ ଆଉ କିଛି ସମୟ ମଧ୍ୟରେ ଚନ୍ଦ୍ରପୃଷ୍ଠରେ ଅବତରଣ କରିବ। ସାରା ବିଶ୍ୱର ନଜର ବର୍ତ୍ତମାନ ଭାରତ ଉପରେ। କାହିଁକି ନାଁ, ଚନ୍ଦ୍ରର ଦକ୍ଷିଣ ମେରୁରେ ଲ୍ୟାଣ୍ଡିଂ କରିବାରେ ଚନ୍ଦ୍ରଯାନ-୨ ହେବ ବିଶ୍ୱରେ ପ୍ରଥମ।
ଅନ୍ୟପକ୍ଷରେ ଚନ୍ଦ୍ରଯାନ-୨ର ଲ୍ୟାଣ୍ଡିଂ ଦେଖିବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବେଙ୍ଗାଳୁରୁସ୍ଥିତ ‘ଇସ୍ରୋ’ ମୁଖ୍ୟ କାର୍ଯ୍ୟାଳୟରେ ପହଞ୍ଚିସାରିଛନ୍ତି। ତେବେ ଏହାର ସିଧାପ୍ରସାରଣ ଦେଖିବାକୁ ଆଜି ଅପରାହ୍ଣରେ ପ୍ରଧାନମନ୍ତ୍ରୀ ମୋଦୀ ଦେଶବାସୀଙ୍କୁ ଅନୁରୋଧ କରିଥିଲେ।
ରାତି ୧ଟା ୪୦ରେ ଚନ୍ଦ୍ରାୟନ-୨ର ବିକ୍ରମ ଲାଣ୍ଡର ଚନ୍ଦ୍ରପୃଷ୍ଠରେ ସଫ୍ଟ ଲାଣ୍ଡିଙ୍ଗ୍ କରିବ ବୋଲି ଇସ୍ରୋ ପକ୍ଷରୁ ସୂଚନା ଦିଆଯାଇଥିଲା। ଏହାର ପ୍ରାୟ ୪ ଘଣ୍ଟା ପରେ ଅର୍ଥାତ୍ ସାଢ଼େ ୪ଟାରୁ ସାଢ଼େ ୬ଟା ମଧ୍ୟରେ ରୋଭର୍ ପ୍ରଜ୍ଞାନ ବିକ୍ରମ ଲାଣ୍ଡର ଭିତରୁ ବାହାରି ଚନ୍ଦ୍ରପୃଷ୍ଠରେ ବିଚରଣ କରିବ। ତେବେ ଅବତରଣର ଶେଷ ୧୫ ମିନିଟ ଇସ୍ରୋ ପାଇଁ ସବୁଠୁ ବଡ଼ ଚାଲେଞ୍ଜ ହେବ ବୋଲି କୁହାଯାଉଛି।
