ଓଡ଼ିଶାଲାଇଭ୍ ପଲିଟିକାଲ ବ୍ୟୁରୋ
ନିର୍ବାଚନ ସମ୍ପର୍କରେ ଗୁରୁତ୍ୱପୂର୍ଣ୍ଣ ଖବର ପଢ଼ନ୍ତୁ।
ଯୋଗୀଙ୍କ ହେଲିକପ୍ଟରକୁ ମିଳିଲାନି ଅନୁମତି, ମୋବାଇଲ ଫୋନରେ କର୍ମୀଙ୍କୁ ଦେଲେ ଉଦବୋଧନ
ଫୁଲବାଣୀ ଏବଂ ବ୍ରହ୍ମପୁର ଅଭିମୁଖେ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଆଜି ଆସିବାର ଥିଲା। ଏହି ଦୁଇଟି ସ୍ଥାନରେ ସେ ଦଳୀୟ ପ୍ରାର୍ଥୀଙ୍କ ପାଇଁ ପ୍ରଚାର କରିଥାନ୍ତେ। କିନ୍ତୁ ଏୟାର ଟ୍ରାଫିକ କଣ୍ଟ୍ରୋଲ (ଏଟିସି) ଯୋଗୀଙ୍କ ହେଲିକପ୍ଟରକୁ ଅନୁମତି ନଦେବାରୁ ସେ ସଭାସ୍ଥଳରେ ପହଞ୍ଚି ପାରି ନଥିବା ବିଜେ ପକ୍ଷରୁ ଅଭିଯୋଗ କରାଯାଇଛି। ଶେଷରେ ଯୋଗୀ ମୋବଇଲ ଫୋନରେ ଦଳୀୟ କର୍ମୀଙ୍କୁ ଉଦବୋଦନ ଦେଇଥିଲେ। ଯୋଗୀଙ୍କ ମୋବାଇଲ ଫୋନ ଭାଷଣକୁ ସଭାସ୍ଥଳରେ ଲୋକେ ଶୁଣିଥିଲେ।
ଯଜ୍ଞେଶ୍ୱର ବାବୁ ହେଲେ ଓଡ଼ିଶା ପ୍ରଦେଶ କଂଗ୍ରେସର ଉପ-ସଭାପତି
୨୦୧୯ ନିର୍ବାଚନ ପୂର୍ବରୁ ଓଡ଼ିଶା କଂଗ୍ରେସରେ ନୂଆ ନିଯୁକ୍ତି ହୋଇଛି। ଏଥିସହିତ ନିକଟରେ କଂଗ୍ରେସରେ ଯୋଗ ଦେଇଥିବା ଯଜ୍ଞେଶ୍ୱର ବାବୁଙ୍କୁ ଓଡ଼ିଶା ପ୍ରଦେଶ କଂଗ୍ରେସର ଉପ-ସଭାପତି ନିଯୁକ୍ତି ମିଳିଛି। ଏନେଇ ଅଲ୍ ଇଣ୍ଡିଆ କଂଗ୍ରେସ କମିଟି(ଏଆଇସିସି) ପକ୍ଷରୁ ବିଜ୍ଞପ୍ତି ଜାରି ହୋଇଛି।ସେହିପରି ଜ୍ଞାନଦେବ ବେଉରାଙ୍କୁ ଓଡ଼ିଶା ପ୍ରଦେଶ କଂଗ୍ରେସ କମିଟିର ସାଧାରଣ ସମ୍ପାଦକ ଭାବେ ନିଯୁକ୍ତି ମିଳିଛି।
କଣାସ ବ୍ଲକରେ ପଖାଳ ଖାଇଲେ ସମ୍ବିତ ପାତ୍ର
ପୁରୀ ଲୋକସଭା ଆସନ ଲାଗି ବିଜେପିର ପ୍ରାର୍ଥୀ ସମ୍ବିତ ପାତ୍ର ଜୋରଦାର ପ୍ରଚାର ଅଭିଯାନ ଆରମ୍ଭ କରିଛନ୍ତି। ଶନିବାର ପ୍ରଚାର ସମୟରେ କଣାସ ବ୍ଲକର ଆଳିବାଡ଼ି ଗାଁରେ ପଖାଳ ଖାଇଛନ୍ତି ସମ୍ବିତ ପାତ୍ର। ଆଳିବାଡ଼ି ଗାଁର ରଞ୍ଜିତ ପଲାଇଙ୍କ ଘରେ ସମ୍ବିତ ପାତ୍ର ପଖାଳ ଖାଇଛନ୍ତି। ଡହ ଡହ ଖରାବେଳେ ପଖାଳ ସାଙ୍ଗକୁ ଆଳୁ ସଜନା ଛୁଇଁ ଭଜା, ଶାଗ ଭଜା, ବଡ଼ି ଚୂରା, ପୋଟଳ ଭଜା ଇତ୍ୟାଦି ପରଷି ଦେଇଥିଲେ ରଞ୍ଜିତ ପଲାଇଙ୍କ ସ୍ତ୍ରୀ। ସମ୍ବିତଙ୍କ ସାଥିରେ ପଖାଳ ଖାଇଥିଲେ ସତ୍ୟବାଦୀ ବିଜେପି ବିଧାୟକ ଓମ୍ ପ୍ରକାଶ ମିଶ୍ର।
ଗୋଟିଏ ଲୋକସଭା ଓ ୨ଟି ବିଧାନସଭା ଲାଗି ପ୍ରାର୍ଥୀ ଦେଲା ବିଜେପି, ଜାଣନ୍ତୁ କିଏ କେଉଁଠି?
ବିଜେପି ଘୋଷଣା କରିଛି ଗୋଟିଏ ଲୋକସଭା ଓ ୨ଟି ବିଧାନସଭା ଆସନ ପାଇଁ ପ୍ରାର୍ଥୀ ତାଲିକା।
ଲୋକସଭା
୧. ଜଗତସିଂହପୁର – ବିଭୁ ପ୍ରସାଦ ତରାଇ
ବିଧାନସଭା
୧. କାକଟପୁର – ରବି ମଲ୍ଲିକ
୨. କେନ୍ଦ୍ରପଡ଼ା – ସୁନାକର ବେହେରା
ସତ୍ୟବାଦୀ ବକୁ ଗାଁରେ ସମ୍ବିତ ପାତ୍ର ପୋଖରୀରେ ବୁଡ଼ ପକାଇ ଆରମ୍ଭ କଲେ ପ୍ରଚାର
ସମ୍ବିତଙ୍କୁ ବିଜେପି ପ୍ରାର୍ଥୀ କରିବା ପରଠୁ ସେ ପୁରୀ ଲୋକସଭା ଅଧୀନରେ ଆସୁଥିବା ସବୁ ବ୍ଲକ ସବୁ ଗାଁକୁ ଗସ୍ତ କରୁଛନ୍ତି। ଲୋକଙ୍କ ସମସ୍ୟା ବାବଦରେ ବୁଝୁଛନ୍ତି। ଶନିବାର ସତ୍ୟବାଦୀ ଅନ୍ତର୍ଗତ ବକୁ ଗାଁରେ ଥିବା ପୋଖରୀରେ ଗାଧୋଇ ସେ ତାଙ୍କ ପ୍ରଚାର ଆରମ୍ଭ କରିଥିଲେ।
ନବରଙ୍ଗପୁର ସଭାରେ ମୋଦିଙ୍କୁ ନବୀନଙ୍କ ମାରାଥନ ପ୍ରଶ୍ନ
ନବରଙ୍ଗପୁରରେ ଆଜି ନିର୍ବାଚନୀ ପ୍ରଚାର କରିଛନ୍ତି ବିଜେଡି ସଭାପତି ନବୀନ ପଟ୍ଟନାୟକ। ବିଜେଡି ସଭାପତି ଜନସଭାକୁ ସମ୍ବୋଧିତ କରିବା ବେଳେ ବିଜେପିକୁ ଟାର୍ଗେଟ କରିବା ସହ ଅନେକ ପ୍ରଶ୍ନ ପଚାରିଛନ୍ତି ବିଜେଡି ସଭାପତି।
ନବୀନ ପ୍ରଶ୍ନ କରିଛନ୍ତି କି, “ଧାନର ସହାୟକ ମୂଲ୍ୟ ୨ଗୁଣ କରିବା କଥା କୁଆଡ଼େ ଗଲା? ନବରଙ୍ଗପୁରରେ ନୂଆ ରେଳଲାଇନ୍ ତିଆରି କଥା କୁଆଡ଼େ ଗଲା? ମହାନଦୀ ପ୍ରସଙ୍ଗର ସମାଧାନ ହେଲା ନାହିଁ। ଚାଷୀ ବୀମାରେ କାହିଁକି ପରିବର୍ତ୍ତନ କରାଗଲା ନାହିଁ?”
“୨୦୧୯ ନିର୍ବାଚନ ଓଡ଼ିଶା ପାଇଁ ଗୁରୁତ୍ୱପୂର୍ଣ୍ଣ”
ନିର୍ବାଚନ ତାରିଖ ଘୋଷଣା ପରେ ମୋଦି ତୃତୀୟ ଥର ପାଇଁ ଓଡ଼ିଶା ଆସିଛନ୍ତି। ସୁନ୍ଦରଗଡ଼ର ରୂପିଡିହ ସାଧାରଣ ସଭାରେ ଯୋଗ ଦେଇ ମୋଦି ଉଦବୋଧନ ଆରମ୍ଭ କରିବା ପୂର୍ବରୁ ରାଜ୍ୟବସୀଙ୍କୁ ନବରାତ୍ରର ଶୁଭେଚ୍ଛା ଜଣାଇଛନ୍ତି।
“ସୁନ୍ଦରଗଡ଼ରେ ଏ ଜନସମୁଦ୍ର ଦେଖି ମୁଁ ଅଭିଭୂତ। ଦେଶ ସୁରକ୍ଷାରେ ଲାଗିଥିବା ଓଡ଼ିଶାର ସବୁ ଯବାନଙ୍କୁ ମୋର ପ୍ରଣାମ। ଆପଣଙ୍କ ଆଶୀର୍ବାଦ ମୁଁ ଭୁଲି ପାରିବିନାହିଁ। ପ୍ରଧାନମନ୍ତ୍ରୀ ନୁହେଁ ପ୍ରଧାନସେବକ ସୁନ୍ଦରଗଡ଼ ଆସିଛି”, ସୁନ୍ଦରଗଡ଼ରେ କହିଛନ୍ତି ମୋଦି।
ହାତ ଧରିଲେ ଶତ୍ରୁଘ୍ନ
ପାଟନାର ସାହିବରୁ ବିଜେପିର ସାଂସଦ ଥିବା ଶତ୍ରୁଘ୍ନ ସିହ୍ନା ଆଜି କଂଗ୍ରେସରେ ସାମିଲ ହୋଇଛନ୍ତି। ଶତ୍ରୁଘ୍ନ କିଛିଦିନ ପୂର୍ବରୁ ରାହୁଲ ଗାନ୍ଧିଙ୍କୁ ତାଙ୍କ ବାସଭବନରେ ସାକ୍ଷାତ କରିଥିଲେ। ଯାହାପରେ ସେ ଘୋଷଣା କରିଥିଲେ କି ଏପ୍ରିଲ ୬ରେ କଂଗ୍ରେସରେ ସାମିଲ ହେବେ।