ଓଡ଼ିଶାଲାଇଭ୍ ବ୍ୟୁରୋ
ବିଶିଷ୍ଟ ଲେଖକ ବିରଜା ମହାପାତ୍ରଙ୍କ ପ୍ରଥମ ଉପନ୍ୟାସ ‘ସାରିଆ ନାନୀ’ ଉନ୍ମୋଚିତ ହୋଇଛି। ଶୁକ୍ରବାର ସନ୍ଧ୍ୟାରେ ଭୁବନେଶ୍ଵରର ହୋଟେଲ ୭-ସାତରେ ଏକ ସ୍ଵତନ୍ତ୍ର ଉତ୍ସବରେ ଏହାକୁ ଉନ୍ମୋଚନ କରାଯାଇଛି। ପ୍ରକାଶନ ସଂସ୍ଥା ପେନ୍ ଇନ୍ ବୁକ୍ସ ଦ୍ଵାରା ପ୍ରକାଶିତ ଏହି ଉପନ୍ୟାସରେ ଓଡ଼ିଆ ଅନ୍ତରଙ୍ଗ ପଣର ନିଛକ ପ୍ରତିଛବି ଓ ଏହା ନିଶ୍ଚୟ ଏକ ପୁରସ୍କାର ଉପଯୋଗୀ ପୁସ୍ତକ ବୋଲି ଏହାର ଉନ୍ମୋଚନ ଅବସରରେ ବିଶିଷ୍ଟ ଅତିଥିମାନେ ମତପ୍ରକାଶ କରିଛନ୍ତି।
ଏହି ଉନ୍ମୋଚନ ଉତ୍ସବରେ ପୂର୍ବତନ କେନ୍ଦ୍ର ସୂଚନା ଓ ପ୍ରସାରଣ ମହାନିର୍ଦ୍ଦେଶକ ଡକ୍ଟର ଉମାକାନ୍ତ ମିଶ୍ର ଓ ବରିଷ୍ଠ ଲେଖକ ଦାଶ ବେନହୁର ଅତିଥି ଭାବେ ଯୋଗ ଦେଇଥିଲେ।
“ସ୍ୱାଧୀନତା ପୂର୍ବବର୍ତ୍ତୀ ଓ ପରବର୍ତ୍ତୀ ସମୟ ମଧ୍ୟରେ ଅଦ୍ୟାବଧି ଯେଉଁ ପରିବର୍ତ୍ତନ ଘଟିଛି ତାହାକୁ ନିଖୁଣ ଭାବେ ବର୍ଣ୍ଣନା କରିବାରେ ଲେଖକ ସଫଳ ହୋଇଛନ୍ତି। ଏହା ପାଠକ ମହଲରେ ନିଶ୍ଚୟ ଆଦୃତ ହେବ ବୋଲି ଆଶା। ଏ ଉପନ୍ୟାସର ଭାଷା ଓ କଥାବସ୍ତୁ ଗଡ଼ଜାତ ଅଞ୍ଚଳର ଭାଷା ସଂସ୍କୃତିକୁ ପ୍ରତିଫଳିତ କରିଛି। ଉପନ୍ୟାସରେ ବ୍ୟାସକବି ଫକୀର ମୋହନ ଓ କାଳଜୟୀ ଔପନ୍ୟାସିକ ଗୋପୀନାଥ ମହାନ୍ତିଙ୍କ ଶୈଳୀ, ଭାବ ଓ ଭାଷାକୁ ପାଠକେ ପୁଣିଥରେ ଭେଟିବେ”, କହିଛନ୍ତି ବରିଷ୍ଠ ଲେଖକ ଦାଶ ବେନହୁର।
“ଏହି ପୁସ୍ତକରେ ସାରିଆ ନାନୀ ଚରିତ୍ର ଆମ ଅତୀତର ଗ୍ରାମ୍ୟ ଜୀବନର ଏକ ଜୀବନ୍ତ ଚରିତ୍ର ଭାବେ ଉଭା ହୋଇଛି। ଏହା ପଢ଼ିବା ବେଳେ ପିଲାଦିନକୁ ପୁଣିଥରେ ଫେରିପାଇବା ଭଳି ମନେହେବ”, କହିଛନ୍ତି ଡକ୍ଟର ଉମାକାନ୍ତ ମିଶ୍ର।
ଉତ୍ସବରେ ନିଜର ଲେଖକୀୟ ବକ୍ତବ୍ୟ ରଖିବା ଅବସରରେ ଲେଖକ ବିରଜା ମହାପାତ୍ର କହିଛନ୍ତି ଯେ,”ସାରିଆ ନାନୀ ଚରିତ୍ର ଗୋଟିଏ ଝିଅ, ବୋହୁ, ପତ୍ନୀ ଓ ମା’ ହିସାବରେ ତାଙ୍କର ଦାୟିତ୍ୱ ନିର୍ବାହ କରୁ କରୁ ଅସାଧାରଣ ହୋଇ ଦେଶ ଗଢ଼ିବାର ଛୋଟିଆ ମଡେଲଟିଏ ତିଆରି କରିଛନ୍ତି। ପ୍ରାକ୍ ସ୍ୱାଧୀନତା କାଳର ଦୁରାବସ୍ତା ଓ ପରବର୍ତ୍ତୀ ସମୟର ବସ୍ତୁବାଦୀ ମାନସିକତା ଭିତରେ ଆମେ ଆବେଗ, ପାରିବାରିକ ଉଷ୍ମତା ଓ ବୃତ୍ତିଗତ ଉତ୍କର୍ଷ କିପରି ହରାଇ ବସିଛେ ତାହା ଏହି ପୁସ୍ତକରେ ବେଶ ସ୍ପଷ୍ଟ ବାରିହେବ।”
ବାଣୀବିହାର ୧୯୮୫-୮୭ ସ୍ନାତକୋତ୍ତର ଛାତ୍ରଛାତ୍ରୀଙ୍କ ଉଦ୍ୟମରେ ଆୟୋଜିତ ଏହି ପୁସ୍ତକ ଉନ୍ମୋଚନ ପେନ୍ ଇନ୍ ବୁକ୍ସର ନିର୍ଦ୍ଦେଶକ ତଥା କଥାକାର ଶୁଭ୍ରାଂଶୁ ପଣ୍ଡା ମଞ୍ଚ ପରିଚାଳନା କରିଥିବା ବେଳେ ଲେଖକଙ୍କ ସତୀର୍ଥ ମହାଦେବ ସେଠୀ ଧନ୍ୟଵାଦ ଅର୍ପଣ କରିଥିଲେ।
ପ୍ରାୟ ୨୯୨ ପୃଷ୍ଠାର ଉପନ୍ୟାସ ‘ସାରିଆ ନାନୀ’ ପାଠକଙ୍କ ପାଇଁ ଆମାଜନ୍ ପ୍ଲାଟଫର୍ମରେ ଉପଲବ୍ଧ ହେଉଥିବା ବେଳେ ଭୁବନେଶ୍ଵର ପୁରୁଣା ବସଷ୍ଟାଣ୍ଡ୍ ମହାନ୍ତି ବୁକ୍ ଷ୍ଟୋର ଓ ଶିବଶକ୍ତି ପୁସ୍ତକାଳୟରେ ମଧ୍ୟ ବିକ୍ରି ହେଉଥିବା ପ୍ରକାଶନ ସଂସ୍ଥା ପକ୍ଷରୁ ସୂଚନା ଦିଆଯାଇଛି।
