ଓଡ଼ିଶାଲାଇଭ୍ ବ୍ୟୁରୋ
କିଟ୍ ବିଶ୍ୱବିଦ୍ୟାଳୟକୁ ମିଳିଛି ସମ୍ମାନଜନକ ଇଣ୍ଟରନ୍ୟାସ୍ନାଲାଇଜେସନ୍ ଷ୍ଟ୍ରାଟେଜିଜ୍ ଆଡଭାଇଜରୀ ସର୍ଭିସ୍ (ଆଇଏସ୍ଏଏସ୍) ବ୍ୟାଜ୍। ନଭେମ୍ବର ୧୩ରୁ ୧୫ ତାରିଖ ପର୍ଯ୍ୟନ୍ତ ମେକ୍ସିକୋର ପୁବେଲାଠାରେ ଅନ୍ତର୍ଜାତୀୟ ବିଶ୍ୱବିଦ୍ୟାଳୟ ସଂଘ (ଆଇଏୟୁ ବା ଇଣ୍ଟରନ୍ୟାସ୍ନାଲ୍ ଆସୋସିଏସସନ୍ ଅଫ୍ ୟୁନିଭରସିଟିଜ୍) ପକ୍ଷରୁ ‘ଟ୍ରାନ୍ଫରମିଂ ହାଇଅର୍ ଏଜୁକେସନ୍ ଫର୍ ଦି ଫ୍ୟୁଚର୍’ ଉପରେ ଅନୁଷ୍ଠିତ ଅନ୍ତର୍ଜାତୀୟ ସମ୍ମିଳନୀ ଅବସରରେ କିଟ୍ ବିଶ୍ୱବିଦ୍ୟାଳୟକୁ ଏହି ବ୍ୟାଜ୍ ପ୍ରଦାନ କରାଯାଇଛି।
ଶିକ୍ଷା ଜରିଆରେ ଅନ୍ତର୍ଜାତୀୟ କ୍ଷେତ୍ରରେ ସଫଳତା ହାସଲ୍ କରି ମାଇଲ୍ଷ୍ଟୋନ୍ ସୃଷ୍ଟି କରିଥିବା ବିଶ୍ୱବିଦ୍ୟାଳୟକୁ ଏହି ମାନ୍ୟତା ପ୍ରଦାନ କରାଯାଇଥାଏ । ଏଭଳି ସମ୍ମାନଜନକ ଅନ୍ତର୍ଜାତୀୟ ମାନ୍ୟତା ପାଇବାରେ କିଟ୍ ପ୍ରଥମ ଭାରତୀୟ ବିଶ୍ୱବିଦ୍ୟାଳୟ ହେବାର ଗୌରବ ଅର୍ଜନ କରିଛି। ଉପଯୁକ୍ତ ଯୋଜନା ଓ ରଣନୀତି ଭତ୍ତିରେ ଶିକ୍ଷାଦାନକୁ ଗୁରୁତ୍ୱ ଦେଇ ଆସୁଥିବା କିଟ୍ ବିଶ୍ୱବିଦ୍ୟାଳୟକୁ ଆଇଏୟୁ ଏହି ମାନ୍ୟତା ପ୍ରଦାନ କରିଛନ୍ତି। ଆଇଏୟୁର ସଭାପତି ପାମ୍ ଫ୍ରେଡ୍ମ୍ୟାନ୍
ଏବଂ ଏହାର ପୂର୍ବତନ ମହାସଚିବ ଇଭା ଏଗରନ୍ ପୋଲକଙ୍କ ଉପସ୍ଥିତିରେ କିଟ୍କୁ ଏହି ସମ୍ମାନ ପ୍ରଦାନ କରାଯାଇଥିଲା।
କିଟ୍ ପକ୍ଷରୁ ବିଶ୍ୱବିଦ୍ୟାଳୟର ପ୍ରତିନିଧି ଏହି ସମ୍ମାନ ଗ୍ରହଣ କରିଥିଲେ। ଯେଉଁସବୁ ଅନୁଷ୍ଠାନ ସମୟ, ପ୍ରୟାସ ଓ ସମ୍ବଳ ଉପଯୋଗ କରି ଶିକ୍ଷାର ଅନ୍ତର୍ଜାତୀୟକରଣ ପାଇଁ ଆବଶ୍ୟକ ହେଉଥିବା ମହତ୍ତ୍ୱପୂର୍ଣ୍ଣ ସାଂସ୍କୃତିକ ପରିବର୍ତ୍ତନ କରିଆସୁଥିବେ ସେହିସବୁ ଅନୁଷ୍ଠାନ ଏହି ବ୍ୟାଜ୍ ପାଇବା ପାଇଁ ମନୋନୀତ ହୋଇଥାଆନ୍ତି। ଏହା ବ୍ୟତୀତ ଅନ୍ତର୍ଜାତୀୟକରଣ ଜରିଆରେ ଶିକ୍ଷାଦାନ, ଗବେଷଣା ଏବଂ ସହଭାଗିତାକୁ ବୃଦ୍ଧି କରିବା ଦିଗରେ ଅନୁଷ୍ଠାନର ଉପଲବ୍ଧିକୁ ମଧ୍ୟ ମାନ୍ୟତା ଦିଆଯାଇଥାଏ।
ଏହି ମାନ୍ୟତା ମିଳିବା ପରେ ପ୍ରତିଷ୍ଠାତା ଡକ୍ଟର ଅଚ୍ୟୁତ ସାମନ୍ତ କହିଛନ୍ତି, ‘‘କିଟ୍ ମଧ୍ୟ ପ୍ରାରମ୍ଭରୁ ନିଜସ୍ତରରେ ଏବଂ ଅନ୍ତର୍ଜାତୀୟସ୍ତରରେ ଶିକ୍ଷା କ୍ଷେତ୍ରରେ ଉଲ୍ଲେଖନୀୟ କାର୍ଯ୍ୟ କରି ଆସୁଥିବାରୁ ଏଭଳି ସମ୍ମାନ ମିଳିବା ସମ୍ଭବ ହୋଇପାରିଛି।
୩ବର୍ଷ ତଳେ ଏକ ପ୍ରତନିଧିମଣ୍ଡଳ ସହ ଆଇଏୟୁର ମହାସଚିବ କିଟ୍ରେ ଦୀର୍ଘ ୬ଦିନ ରହି କିଟ୍ର କାର୍ଯ୍ୟକୁ ପୁଙ୍ଖାନୁପୁଙ୍ଖ ନିରୀକ୍ଷଣ କରିବା ସହ କିଟ୍ ବିଶ୍ୱବିଦ୍ୟାଳୟ କର୍ତ୍ତୃପକ୍ଷଙ୍କ ସହ ଆଲୋଚନା କରିଥିଲେ। ତିନିବର୍ଷ ପରେ ସେ ଦେଇଥିବା ରିପୋର୍ଟ ଅନୁସାରେ କିଟ୍କୁ ଏହି ବ୍ୟାଜ୍ ମିଳିଛି।
